RI UKABꞌ WUJ RI XUTZꞌIBꞌAJ RI JUAN
Majibꞌal re
Ri winaq ri xtzꞌibꞌan ri nabꞌe wuj re Juan xuꞌtaqchiꞌj ri kojonelabꞌ rech kejeqiꞌ pa ri kikojobꞌal, are xtzꞌibꞌan we wuj riꞌ chike nikꞌaj komontyox chik jawjeꞌ ri e kꞌo wi ri esal taq kiwach aꞌjtijabꞌ ri kakiya ri kꞌutuꞌn xuqujeꞌ ri noꞌjibꞌal jetaq ri kakichomaj aꞌreꞌ.
Ri wuj re ri ukabꞌ Juan kujunamaj ri komontyox rukꞌ jun ixoq xuqujeꞌ ri kojonelabꞌ ri e kꞌo pa ri komontyox keꞌjunumax rukꞌ ri ral ri ixoq.
Ri xtzꞌibꞌan we wuj riꞌ kubꞌij chi ri komontyox ri kꞌo wi areꞌ aꞌlaxik rukꞌ ri komontyox ri kutaq wi bꞌik ri uwuj. (kuya jun rutzil kiwach ri naqꞌatal chike kakibꞌan ri e tereneꞌl taq re ri Jesús, kꞌo jun rutzil wach chik ri kajunumataj rukꞌ riꞌ rutzil wach pa ri kꞌisbꞌal re ri uwuj ri Pedro).
Ri xtzꞌibꞌan we wuj riꞌ kubꞌij chi areꞌ jun kꞌamal bꞌe. Ri kaqil waral are chi e nikꞌaj winaq ri e kꞌo pa we komontyox e petinaq pa solinik rumal riꞌ kubꞌij chike chi utz karilo chi tajin kebꞌin pa ri qas tzij. Kuya ubꞌixik chike ri komontyox chi man kuya taj keꞌkitoꞌo ri esal taq kiwach aꞌjtijabꞌ xa ta ne jubꞌiqꞌ.
Pune xa kꞌin laj nitzꞌ we wuj riꞌ katzijon kꞌu chirij chomanik ri nim ubꞌanik.
1
1 In in kꞌamal bꞌe, kintaq rutzil kiwach ri komontyox ri chaꞌtalik xuqujeꞌ ri e kojonelabꞌ, ri sibꞌalaj keꞌnloqꞌaj pa ri qas tzij man xaq xwi ta ri in xuqujeꞌ konojel ri ketaꞌmam uwach ri qas tzij.
2 We qas tzij riꞌ kꞌo pa qanimaꞌ xuqujeꞌ kakꞌojiꞌ qukꞌ ronojel qꞌij.
3 Ri toqꞌobꞌ, toqꞌobꞌisan wach xuqujeꞌ ri jaꞌmaril rech ri Tataxel Dios xuqujeꞌ ri uKꞌojol Jesucristo, qas kakꞌojiꞌ na qukꞌ pa ri qas tzij xuqujeꞌ pa ri loqꞌanik.
4 Sibꞌalaj xkiꞌkot wanimaꞌ are xeꞌnriq jujun chiꞌwe tajin kakichakubꞌej ri jastaq rech ri qas tzij, jetaq ri taqanik ri xuya ri Tataxel Dios chaqe.
5 Wachalal, kamik kixinbꞌochiꞌj kaqaloqꞌaj qibꞌ chiqajujunal. Man jun kꞌakꞌ taqanik taj ri tajin kintzꞌibꞌaj chiꞌwe xane are waꞌ ri xbꞌix loq chaqe pa ri majibꞌal rech ronojel.
6 Ri loqꞌanik are chi kaqachakubꞌej ri utaqanik ri Dios, xuqujeꞌ kujkꞌojiꞌ pa ri loqꞌanik jetaq ri xitatabꞌej loq pa ri majibꞌal rech ronojel.
7 Rumal kꞌu cher sibꞌalaj e kꞌi winaq ri xaq e subꞌunelabꞌ e kꞌo choch ri uwachulew, man kakiqꞌalajisaj taj chi ri Jesús xalax choch ri uwachulew jetaq jun winaq, ri man kuqꞌalajisaj taj chi jeriꞌ xkꞌulmatajik, xaq jun subꞌunel riꞌ xuqujeꞌ ukꞌulel ri Cristo riꞌ.
8 Qas chiwilaꞌ man kitukij taj ri utz laj chak qabꞌanom iwukꞌ rech jeriꞌ tzꞌaqat ri tojbꞌal iwe kikꞌamawaꞌj.
9 Xapachin ri kel kanoq chirij ri ukꞌutuꞌn ri Cristo, man kꞌo ta Dios riꞌ pa ranimaꞌ, are kꞌu ri kajeqiꞌ pa ri ukꞌutuꞌn ri Cristo, kꞌo riꞌ ri Tataxel Dios xuqujeꞌ ri Kꞌojolaxel pa ranimaꞌ.
10 Xuqujeꞌ we kꞌo ne jun kixusolij ri man rukꞌaꞌm ta bꞌik we kꞌutuꞌn riꞌ man kikꞌamawaꞌj ta cho iwachoch, xuqujeꞌ man kiya ta utz upetik.
11 Rumal chi xapachin ri kukꞌamawaꞌj jun chike waꞌ we winaq riꞌ cho rachoch xuqujeꞌ kuya utz upetik, kux rachiꞌl ri winaq riꞌ pa ri umak.
12 Kꞌi jastaq ri kawaj na kinbꞌij bꞌi chiꞌwe, man kawaj ta kꞌut kintzꞌibꞌaj bꞌik rumal cher are kawaj kixeꞌnsolij rech qas kintzijon iwukꞌ chwinaqil rech jeriꞌ katzꞌaqat ri qakiꞌkotemal.
13 Kakitaq rutzil iwach konojel ri alaxik, ri e chaꞌtalik, ri e kꞌo wukꞌ.