RI WUJ RI XUTZꞌIBꞌAJ RI SANTIAGO
Majibꞌal re
Ri Santiago jun chike ri e rachalal ri Jesús, jun kꞌamal bꞌe pa ri komontyox pa ri tinimit Jerusalén are kaminaq chik xuqujeꞌ kꞌastajinaq chik ri Jesús.
Ri Santiago ubꞌiꞌnam Jacobo sibꞌalaj xnimaxik rumal ri noꞌjibꞌal ri xuya chike ri e kojonelabꞌ. (Chawila Hechos 15:13-21.) Ri Santiago xutzꞌibꞌaj ri utz laj kꞌutuꞌn xuqujeꞌ noꞌjibꞌal xutaq bꞌik chike ri e kojonelabꞌ che ri Jesús ri e tukininaq pa ri nimalaj tinimit re Roma.
Ri xutzꞌibꞌaj chike xubꞌinaꞌj uwuj ri Santiago. We wuj riꞌ kuchapleꞌj rukꞌ jun wuj ri xtaq bꞌik chike nikꞌaj winaq ri naj e kꞌo wi.
We wuj riꞌ man kajunumataj ta rukꞌ nikꞌaj wuj re ri qꞌotaj riꞌ. Chupam kꞌo kꞌambꞌejabꞌal taq noꞌj ri katzijon chirij jastaq ri choqꞌaqꞌ ubꞌanik, kꞌo tzijonik, xuqujeꞌ ronojel ri kutzijoj kajunumataj rukꞌ ri wuj re etaꞌmabꞌal ri kaqarik pa ri wuj re Proverbios rachiꞌl Eclesiastés.
Ri wuj re Santiago kajunumataj rukꞌ ri nikꞌaj wuj chik re etaꞌmabꞌal xaq kutoqꞌij jas rajawaxik kubꞌan jun rech kukꞌaslebꞌej ri kꞌaslemal pa ri jeꞌl laj utikoꞌn ri Dios.
Ri Santiago kutzijoj rij jastaq jacha ta ne ri tobꞌanik che ri mebꞌaꞌ, ri utz ukojik ri qꞌinomal, ri ukojik ri raqꞌ jun, chꞌajchꞌojil pa ri kꞌaslemal, ri nukꞌuj ibꞌ pa ri wok ke ri kojonelabꞌ re ri Cristo, puꞌwiꞌ ronojel ri ayeꞌnik are taq kariq ri kꞌaxkꞌolal.
Ri utz laj etaꞌmabꞌal sibꞌalaj kꞌo kutayij rech kakꞌaslebꞌex jun utz laj kꞌaslemal pa taq ri qꞌij junabꞌ are xtzꞌibꞌax we wuj riꞌ.
1
1 In in Santiago, patanil re ri Dios xuqujeꞌ rech ri Ajawxel Jesucristo. Kintaq rutzil kiwach konojel ri e kabꞌlajuj puq winaq aꞌj Israel ri e tukininaq choch ri uwachulew.
2 Wachalal, chixkiꞌkotoq are kiriq sibꞌalaj kꞌi uwach kꞌaxkꞌolal.
3 Iwetaꞌm chik chi are kape kꞌaxkꞌolal chiꞌwij kubꞌan chiꞌwe chi kixjeqiꞌk pa ri ikojobꞌal.
4 Xuqujeꞌ ri jeqelem kubꞌano chi utz kibꞌan che ri chak rech qas ix tzꞌaqat xuqujeꞌ maj kajawataj chiꞌwe.
5 We kꞌo jun chiꞌwe ri man kꞌo ta retaꞌmabꞌal, chuta che ri Dios. Ri Areꞌ kuya na chiꞌwe. Man kixuyaj taj we kita che.
6 Chitaꞌ rukꞌ kojobꞌal, man kakabꞌalaj ta ikꞌuꞌx are kito rumal cher ri winaq ri kakabꞌalaj ukꞌuꞌx kajunumataj rukꞌ ri jaꞌ ri kꞌo pa ri plo xaq kasalabꞌax wi rumal ri kyaqiqꞌ.
7 We kꞌo jun winaq jewaꞌ kubꞌano, marayeꞌj kukꞌamawaꞌj xa ta ne jun ujastaq che ri Dios.
8 Jeriꞌ rumal man qas ta jeqel ukꞌuꞌx riꞌ pa ri kubꞌano.
9 Ri alaxik ri mebꞌa rajawaxik nim kunaꞌo rumal nim ubꞌanik.
10 Xuqujeꞌ ri alaxik ri qꞌinom rajawaxik kumochꞌ ribꞌ rumal ri ubꞌanik. Ri qꞌinom winaq kajunumataj rukꞌ ri kotzꞌiꞌj ri kakꞌiy cho ri saq, xaq sachel uwach.
11 Are kel loq ri qꞌij rukꞌ ri ukꞌatanal kuchaqiꞌjarisaj ri qꞌayes. Katzaq ri ukotzꞌiꞌjal, man jeꞌl ta chik kakaꞌyik. Jeriꞌ kakꞌulmataj na rukꞌ ri qꞌinom xuqujeꞌ ri uqꞌinomal.
12 Utz rech ri winaq ri man katzaq taj pa mak, rumal cher are kayaꞌtaj na che ri korona ri utzujum ri Dios chike ri kakiloqꞌaj ri ubꞌiꞌ.
13 Mubꞌij jun are kataqchix pa mak chi are ri Dios xintaqchiꞌnik, rumal cher ri Dios man kataqchiꞌx taj pa mak xuqujeꞌ makutaqchiꞌj ta chi jun pa mak.
14 Xane ri winaq kaqaj pa mak rumal kajurux bꞌik rumal ri itzel taq urayinik.
15 Are kakꞌiy ri urayinik jun chubꞌanik mak, kalax ri makaj pa ranimaꞌ, ri makaj are kachapleꞌx ubꞌanik, kukꞌam loq kamikal.
16 Loqꞌalaj taq wachalal, ¡misubꞌ iwibꞌ!
17 Ronojel ri utz xuqujeꞌ tzꞌaqatalaj sipanik chikaj kape wi, rukꞌ ri Tataxel ri xtikowik ri qꞌij xuqujeꞌ ri ikꞌ xuqujeꞌ ronojel ri chꞌumil ri kaqilo xuqujeꞌ man kaqil taj. Ri Dios man kakꞌexetaj ta wi man kajunumataj ta rukꞌ ri muꞌj ri xa kakꞌexenik.
18 Xa rumal ri urayinik ri Dios xubꞌan chaqe xujalaxik chik junmul rumal ri tzij rech qas tzij, rech je kujuxik ri tikoꞌn ri qas kꞌo kutayij.
Rajawaxik kachakubꞌex ri utzij ri Dios
19 Loqꞌalaj taq wachalal, naꞌtaj we riꞌ chiꞌwe: Rajawaxik ix sakꞌaj chutayik ri kabꞌix chiꞌwe, xuqujeꞌ man aninaq taj kitzalij uwach xane qas chichomaj na jas ri kibꞌij, xuqujeꞌ man aninaq taj kayakataj iwoyawal.
20 Rumal cher ri royawal ri winaq man kubꞌan taj chi kape ri urayibꞌal ukꞌuꞌx ri Dios.
21 Rumal kꞌu waꞌ chitzaqa kanoq ronojel makaj xuqujeꞌ etzelal ri sibꞌalaj nim kꞌo choch ri uwachulew, rech kixkwinik kikꞌamawaꞌj rukꞌ mochꞌochꞌem ri tzij ri xtik pa iwanimaꞌ, ri tzij riꞌ kakwinik kixukolo.
22 Makakubꞌiꞌ ta ikꞌuꞌx xwi kita ri utzij ri Dios, riꞌ xaq kisubꞌ iwibꞌ xane rajawaxik kibꞌano ri kubꞌij ri utzij ri Dios.
23 Ri winaq ri xaq xwi xutatabꞌej ri utzij ri Dios man kuchakubꞌej taj, kajunumataj rukꞌ ri winaq ri karil ribꞌ pa jun kaꞌyebꞌal,
24 are kil taj ribꞌ chupam, kasachan che jas kabꞌantajik.
25 Ri kajeqiꞌk pa ri sukꞌ taqanik ri kuya kiritajem xuqujeꞌ kuchap ukꞌuꞌx kakꞌojiꞌ chupam, man kasachan taj che ri xutatabꞌej, kukꞌamawaꞌj na ri tewechibꞌal are kuchakubꞌej ri tzij.
26 We kꞌo jun kubꞌij chi kojonel, man kuqꞌil ta kꞌut ribꞌ chubꞌixik etzelal, maj kutayij riꞌ ri kubꞌij.
27 Ri utz laj kojonem ri man chꞌuluj taj choch ri Dios ri Tataxel, are kichajixik ri e maj kitat kinan xuqujeꞌ ri e malkaꞌn taq ixoqibꞌ, xuqujeꞌ tasoj ibꞌ che ri etzelal rech ri uwachulew.