RI NABꞌE WUJ RI XUTZꞌIBꞌAJ RI PEDRO
Majibꞌal re
Ri taqoꞌn Pedro are nabꞌe chike ri kabꞌlajuj tijoxelabꞌ ri xya kꞌutuꞌn chike rumal ri Jesús are xkꞌojiꞌk cho ri uwachulew.
Ri kꞌisbꞌal taq uqꞌij ri Pedro xuqujeꞌ ri upatanijik xkꞌulmatajik are kꞌamal bꞌe pa ri komontyox je laꞌ pa ri tinimit Roma, pa taq ri junabꞌ 60 d C. Are xretaꞌmaj chi tajin kabꞌan kꞌax chike chi ri komontyox ri e kꞌo pa ri leꞌaj rech ri tinimit Roma (are waꞌ ri tinimit ri e kꞌo pa ri tinimit Turquía kamik) xutzꞌibꞌaj we wuj riꞌ chike rech jeriꞌ kuya kichuqꞌabꞌ rech kejeqiꞌ pa ri kikojobꞌal che ri Jesús.
Ri Silas are xeꞌjachow ri wuj ri xutzꞌibꞌaj ri Pedro, we Silas sibꞌalaj xchakun rukꞌ ri taqoꞌn Pablo. (Chawilampe ri Hechos 15:22; 17:15.)
Ri Pedro kutzijoj rij ri Silas xuqujeꞌ kubꞌij chi xtobꞌan rukꞌ ri Pedro chutzꞌibꞌaxik ri wuj.
Pa ri wuj kꞌo oxibꞌ qꞌat.
1. Pa ri nabꞌe ri Pedro kubꞌij chike ri e sikꞌil taq re ri wuj chi rajawaxaxik kakikꞌaslebꞌej ri tyoxalaj kꞌaslemal pa ronojel ri kakibꞌano.
We winaq riꞌ man aꞌj Israel taj xekꞌojiꞌk xkibꞌan ri itzel taq jastaq (man ketaꞌm ta wi uwach ri Dios) kamik kꞌut e tyoxalaj tinimit, e kachiꞌl ri utinimit ri Dios ri e sikꞌital pa ri kꞌakꞌ kꞌaslemal.
2. Pa ri ukabꞌ qꞌat ri Pedro kutzijoj rij chi we kꞌaslemal riꞌ kaya na chike ri kakibꞌan kꞌax chike ri kojonelabꞌ xuqujeꞌ chi kemayijan na jun qꞌijal.
3. Kꞌisbꞌal re, ri Pedro kutzijoj rij chi ri e sikꞌil taq re ri uwuj tajin kakiriq kꞌax rumal ri kikojobꞌal, xuqujeꞌ kubꞌij chi we riꞌ tzi kakꞌulmataj wi na.
Ri Mesías xuriq kꞌax rumal riꞌ kojonel ri kojonelabꞌ kakiriq wi na kꞌax.
Ri e tereneꞌl taq re ri Jesús kayeꞌm ri qꞌij are kape ri Dios chikisolixik pune kꞌu tajin kakiriq ri kꞌaxkꞌolal kekwinik kakikꞌutu chi e rech ri Dios.
1
1 Ri Pedro, taqoꞌn rech ri Jesucristo, kutaq rutzil kiwach ri e chaꞌtalik rumal ri Cristo, xuqujeꞌ konojel ri winaq ri e kꞌo pa ri tinimit Ponto, Galacia, Capadocia, Asia xuqujeꞌ Bitinia.
2 Ri e chaꞌtalik rumal ri kwinel laj uchak ri Dios Tataxel pa ri Uxlabꞌixel, ri xetyoxirisataj rumal xkinimaj ri Jesucristo xuqujeꞌ xeꞌtortajik rukꞌ ri ukikꞌel, kinwayeꞌj chi kikꞌamawaꞌj nimalaj toqꞌobꞌ xuqujeꞌ jaꞌmaril.
Qꞌijilaꞌtal ubꞌiꞌ ri Dios rumal ri kuꞌlibꞌal qakꞌuꞌx ri uyaꞌom
3 Qꞌijilaꞌtal ubꞌiꞌ ri Tataxel rech ri Ajawxel Jesucristo, xa rumal ri utoqꞌobꞌ xubꞌan chaqe xujalax chik junmul pa ri ukꞌastajibꞌal ri Jesucristo rech jeriꞌ kꞌo jun kꞌaslik qakuꞌlibꞌal kuꞌx
4 xuqujeꞌ kaqakꞌamawaꞌj ri qechabꞌal ri man katukin taj, man chꞌuluj taj, xuqujeꞌ man sachel taj uwach. Ri echabꞌal riꞌ, yaktal chiꞌwe pa ri kaj.
5 Rumal cher ix riꞌ ri ixchajitalik rumal ri ukwinem ri Dios rumal ri ikojobꞌal kꞌa chopan na ri qꞌij are kakꞌut chiꞌwach ri kolotajem pa taq ri kꞌisbꞌal taq qꞌij.
6 Rumal waꞌ rajawaxik kixkiꞌkotik, pune iriqom kꞌi uwach kꞌaxkꞌolal, pa taq we qꞌij kamik.
7 Ri qꞌana pwaq, pune xaq sachel uwach, pa ri qꞌaqꞌ kabꞌan wi na rilik we qas utz. Je xuqujeꞌ ri ikojobꞌal nim na ubꞌanik choch ri qꞌana pwaq, kil na we qas utz xuqujeꞌ we taqalik kaya nim uqꞌij are kape ri Jesucristo.
8 Ri ix kiloqꞌaj ri Jesucristo pune man iwilom uwach, kikojo chi kꞌolik, xuqujeꞌ sibꞌalaj kajuluwik ri ikiꞌkotemal.
9 Jeriꞌ, rumal tajin kikꞌamawaꞌj ri ikolotajem rumal ri ikojobꞌal.
10 Ri e qꞌalajisal taq utzij ri Dios xkitzijoj ri toqꞌobꞌ ri yaktalik ri kaya na chiꞌwe, aꞌreꞌ xkisolij rij jas ubꞌanik we koltajem riꞌ.
11 Are xkaj xkichꞌobꞌ rij jachike qꞌotaj xuqujeꞌ jas taq riꞌ ri kꞌaxal ri kubꞌij ri Uxlabꞌixel rech ri Cristo, ri kꞌo chike aꞌreꞌ. Ri Uxlabꞌixel xubꞌij chike jas ri kꞌax ri kuriq na ri Cristo xuqujeꞌ ri juluwem ri kape na.
12 Xqꞌalajisax chkiwach chi man aꞌreꞌ taj tajin kakipatanij kibꞌ, xane are tajin kixkipatanij ix. Xkitzijoj ri utz laj tzij ri katzijox chiꞌwe kamik rukꞌ ri ukwinem ri Uxlabꞌixel ri xtaq loq pa ri kaj. Ri angelibꞌ sibꞌalaj kakirayij rilik we jastaq riꞌ.
Man kixmakun taj
13 Rumal riꞌ qas chibꞌana ronojel ri jastaq rukꞌ etaꞌmabꞌal, qas chichomaj ri kibꞌano, chi jeqebꞌa ikꞌuꞌx pa ri toqꞌobꞌ ri kayaꞌtaj na chiꞌwe are kape ri Cristo.
14 Chixnimanoq jetaq ri kakibꞌan ri akꞌalabꞌ are kenimanik, man je ta kixnoꞌjinik jetaq ri kixnoꞌjin kanoq nabꞌe are kꞌamajaꞌ iwetaꞌmabꞌal.
15 Man kixmakun taj, rumal cher ri Dios ri xixsikꞌin apanoq tyoxalaj Dios.
16 Ri tzꞌibꞌatalik kubꞌij: Chitasa iwibꞌ che ri mak jetaq ri in nutasom wibꞌ che ri mak.
17 Jeriꞌ rumal cher are kibꞌij iTat che ri kakwinik kuqꞌat tzij pa kiwiꞌ konojel, chimochꞌo bꞌa iwibꞌ rumal cher xaq ix ikꞌowel choch ri uwachulew.
18 Iwetaꞌm chi xa xixesax loq pa ri kꞌaslemal ri xiwechabꞌej kanoq chike ri itat inan ojer. Man qꞌana pwaq man saq pwaq taj xloqꞌbꞌex iwe,
19 xane rukꞌ ri jeꞌl laj ukikꞌel ri Cristo ri paqal rajil, kajunumataj rukꞌ ri ukikꞌel ri jun laj chij ri man kꞌo ta uyabꞌ xuqujeꞌ man chꞌuluj taj.
20 Are waꞌ ri Cristo ri xuchapleꞌj itoꞌik pa taq we kꞌisbꞌal taq qꞌij riꞌ, ri xchaꞌloq rumal ri Dios are majoꞌq katiktaj loq ri uwachulew.
21 Xa rumal ri Jesús, kikojo chi ri Dios xukꞌastajisaj ri Jesús xuqujeꞌ xunimarisaj uqꞌij, rumal laꞌ wetaꞌm chi ri ikojobꞌal xuqujeꞌ ri kuꞌlibꞌal ikꞌuꞌx jeqel chirij ri Dios.
22 Kamik kꞌut chi ixchꞌajchꞌoj chik rumal xinimaj ri qas tzij, pa ri Uxlabꞌixel, qas chiloqꞌaj iwibꞌ rukꞌ ronojel iwanimaꞌ xuqujeꞌ rukꞌ ronojel ichuqꞌabꞌ.
23 Ix xixalax chik junmul, man ix rijaꞌl ta chik winaq ri xaq kamel xane maj ikamik rumal cher ix rijaꞌl chi ri utzij ri Dios ri kꞌaslik chibꞌe qꞌij saq:
24 Konojel ri winaq xaq jer e kꞌo qꞌayes, ri kijeꞌlal junam rukꞌ ri kotzꞌiꞌj ri kakꞌiy cho ri saq; are kachaqiꞌjar ri qꞌayes katzaq ri ukotzꞌiꞌjal.
25 Are kꞌu ri utzij ri Dios jeqel chibꞌe qꞌij saq.
Are waꞌ ri tzij ri utz laj tzij ri tzijotal chiꞌwe.