18
Babilonia marca ushacangan
1 Chaypitana ricarä cielupita pasaypa munayniyog juc angel yarpaycämogta. Chay angilpa chichipayninwan intëru pacha achicyaycar quëdaran.
2 Chay angel fiyupa caynuy niran:
“¡Ushacarunnam, ushacarunnam munayniyog Babilonia marca!
Cananga chay marca ticrarun diablucuna tiyananman,
mana ali espiritucunapa machrayninman y
millanaypag ävicunapa gueshtanman.
3 Borrachänanpag vïnuta upyagnuypis Babilonia marcachru runacuna olgupis warmipis jucwan jucwan puñupäcusha.
Lapan naciuncunachru runacunapis iwal-lam juchäcusha.
Cay pachachru reycuna mañösa warmiwannuy Babilonia marcawan juchäcuyman chrayasha.
Negocianticuna rïcuyäpäcusha chay marcachru runacuna imatapis munanganta rantipäcuptinmi”.
4 Chaynuypis jucna cielupita caynuy nimogta mayarä:
“Nogaman yäracamagcäga chay marcapita yarguy.
Paycunanuy juchäcarärinquiman,
paycunapa castïgun gamcunamanpis chrayaramunman.
5 Paycunapa juchancuna cieluman chrayangancama achca gotucasha.
Juchäcäringanta Tayta Dios manam gongashachu.
6 Imanuymi paycuna ruraran chaynuyla paycunatapis rurapäcuy.
Paycuna ruranganpita ishcay cuti mas rurapäcuy.
Runata nacachinganpita ishcay cuti mas nacachipäcuy.
7 Runatucur guellayniyogpita munanganta rurar rantinganpita
nacachiy y wagachiy.
Payga shongunchru yarpan:
‘Nogaga reynam caychru jamaraycä.
Nogaga viudachu manam cä.
Nogaga manam imaypis laquicushächu’ nir.
8 Chaynuy canganpitam mayänipita paypag nacaycuna chrayamunga.
Chaycuna caycan wañuy, laquicuy, micanay.
Y rupachisham canga.
Juzgag Tayta Diosninchi munayniyog captinmi chaynuy canga”.
9 Cay pachachru reycuna mañösa warmiwannuy Babilonia marcawan juchäcuyman chrayasha y guellayniyogpita munanganta rurar rantisha. Chay reycuna chay marca rupaptin goshti yargamogta ricar chay marcapita wagapäcungam y laquicäringam.
10 Fiyupa castiganganta ricarmi manchacasha carulapita caynuy nir ricaräpäcunga:
“¡Ay, ay, ay! ¡Babilonia marca!
¡Munayniyog marca!
Mayänipita castïguyqui chrayamusha”.
11 Apangan negociuncunata pipis mana rantiptin cay pachachru lapan negocianticunapis chay marca ushacanganpita wagapäcungam y laquicäringam.
12 Negociuncuna caran: öro, guellay, cuyaylapag chipipaycag rumicuna, lïnupita fïnu tëlacuna, puca tëlacuna, sëda tëlacuna, morädu tëlacuna, tucuy casta shumag olorniyog fïnu tablacuna y marfilpita, shumag väleg tablapita, broncipita, fierrupita y marmulpita imapis rurashacuna.
13 Chaynuypis canëla, perfümi, incienso, mïrra y shumag jachrapita incienso, vïno, aceite, fïnu harina, trïgu, cargacuna cag uywacuna, üshacuna, caballucuna, cärrucuna y runacunatapis ranticunanpag apapäcog.
14 Chay negocianticuna nipäcunga: “¡Cananga imapis pasaypa gustangayqui manana cannachu! ¡Shumag ali micuycuna y cuyaylapag imayquipis cagcuna mananam canganachu ni imaypis pipis taringanachu!”
15 Chay marcachru chaycunawan negociunta ruragcuna y chay runacuna rantiptin rïcuyagcuna fiyupa nacaycanganta ricar, wagaycar y laquicuycar manchacasha carulachrümi caynuy niycar quëdapäcunga:
16 “¡Ay, ay! ¡Munayniyog marca!
Lïnupita fïnu tëlawan röpasha warminuy casha.
Morädu y puca fïnu röpawan röpasha warminuy casha.
Öruwan, perlascunawan y cuyaylapag chipipaycag rumicunawan adornasha warminuy casha.
17 ¡Mayänipita achca riquësancuna ushacasha!”
Lapan büqui manejagcuna, büquichru lapan aywagcuna, büquipa lapan arognincuna y büquichru lapan arupacogcuna carulachru ichriraycar quëdapäcuran.
18 Chay marca rupaptin goshti sharcogta ricarmi fiyupa gapachracäriran: “Manam may marcapis cay munayniyog marcaman tincushachu” nir.
19 Laquicuypita umanman allpata gaycacäriran. Wagaycar y laquicur nipäcuran:
“¡Ay, ay! ¡Chay munayniyog marca!
Chay marca rïcu captinmi büquiyogcäga negociunta ranticur lapanpis rïcuyasha.
Ichanga mayänipita lapan ushacasha”.
20 “Cieluchru tiyagcuna, cushicäriy chay marca chaynuy canganpita.
Chaynuypis cushicäriy, Jesucristuman yäracogcuna, apostulcuna, Diospa willacognincuna.
Tayta Dios chay marcata ushacächisha gamcunata mana alita rurapäcushungayquipitam”.
21 Juc fuerzasapa angel mulinupa jatuncaray rumintanuy jogarcuran. Nircur lamarman jitarir caynuy niran:
“Cay rumita lamarman jitariptï illacangannuymi Babilonia munayniyog marca illacanga.
Mananam mas imaypis pipis ricanganachu.
22 Mananam imaypis cälliquicunachru arpata, quënata, ni trompëtata tucaycagta ni cantaycagta mayangachu.
Chaynuypis gamchru manam ima ruray yachrag runapis cangachu.
Mulinu agaycanganpis mananam mayacanganachu.
23 Gamchru imaypis mananam michëru rupanganachu.
Mananam casaray fiesta büllapis mayacanganachu.
Negociantiquicunam juc negocianticunapitapis mas munayniyog casha.
Brüju cayniquiwan lapan nacion runacunata engañashcanqui”.
24 Chay marca runacunam Tayta Diosninchipa willacognincunata, Jesucristuman yäracogcunata y may chaychrüpis cagcunata wañuchipäcusha.