7
Payman yäracogcunata Tayta Dios cuydangan
1 Chaypitana cay pachapa chruscun cantunchru juc angilta cama ichrirarcagta ricarä. Chay angilcunam wayrata jarcararan pachatapis, lamartapis ni ima yüratapis mana pücananpag.
2 Chaynuypis juc angilta ricarä inti yargamunan cagpita imaypis cawag Tayta Diospa sëllun aptasha cieluman jegaycagta. Cay angilcunam cay pachata lamarta däñananpag munayninta chrasquisha caycag chruscun angilcunata fiyupa caynuy gayacuran:
3 “¡Amarag däñayrächu cay pachata, lamarta ni yüracunata Tayta Diosninchi mandanganta ruragcunapa urcunman sëllunta manaräpis chrurapäcuptïga!”
4 Chaychrümi mayarä lapan Israel ayllucunapita pachrac chruscu chrunca chruscu waranga (144,000) sëllusha caycan ninganta.
5 Sëllusha caran
Judá ayllupita chrunca ishcay waranga (12,000),
Rubén ayllupita chrunca ishcay waranga,
Gad ayllupita chrunca ishcay waranga,
6 Aser ayllupita chrunca ishcay waranga,
Neftalí ayllupita chrunca ishcay waranga,
Manasés ayllupita chrunca ishcay waranga,
7 Simeón ayllupita chrunca ishcay waranga,
Leví ayllupita chrunca ishcay waranga,
Isacar ayllupita chrunca ishcay waranga,
8 Zabulón ayllupita chrunca ishcay waranga,
José ayllupita chrunca ishcay waranga
y Benjamín ayllupita chrunca ishcay waranga.
Cieluchru achca runacuna yurag röpasha cangan
9 Chaypitana mandananpag jamacunanpa ñaupagninchru y Carnipa ñaupagninchru ichriraycagta ricarä yupaytapis mana atipaypag lapan naciunpita, lapan castapita y tucuy casta rimagcunapita runacuna yurag röpan jatisha y palmëran aptasha carcagta.
10 Paycunam fiyupa caynuy nipäcuran:
“¡Mandananpag jamacunanchru jamaraycag Tayta Diosninchi
y Carnim salvapäcamasha!”
11 Chay angilcuna muyupararcaran mandananpag jamacunan y mayor runacuna y chruscu angel niragcuna caycanganta. Paycuna mandananpag jamacunanpa ñaupagninman gongurpacaycäriran. Nircur Tayta Diosninchita adoräpäcuran.
12 Nipäcuran:
“¡Amén!
Tayta Diosninchi imaypis y imaycamapis alabasha cayculächun,
yachrag cayculächun, agradecicuna cayculächun,
respitasha cayculächun, munayniyog y callpayog cayculächun.
¡Amén!”
13 Mayor runacunapita jucnincag tapumaran: “¿Pitag chay yurag röpasha caycag runacuna? y ¿maypitatag shapäcamusha?” nir.
14 Nirä: “Gam musyanquim, tayta”.
Pay nimaran: “Cay runacunaga pasaypa nacaycunapa pasag runacunam carcan. Paycunam Carnipa yawarninwan röpanta tagshashanuy y röpanta yuragyächishanuy carcan.
15 Chaynuy carmi Tayta Diosninchi mandananpag jamacunanpa ñaupagninchru carcan. Pagas junagmi templunchru adorarcan. Mandananpag jamacunanchru jamaraycagmi paycunawan canga y paycunata cuydanga.
16 Mananam micanangachu ni yacunangachu. Intipis ni shanaypis mananam rupanganachu.
17 Mandananpag jamacunan chraupichru caycag Carnim üshacunatanuypis cuydanga. Paymi mana ushacaypa cawachicog yacu yargamogman pushanga. Diospa ñaupagninchrüga manam pipis waganganachu”.