20
Pur jõ pahhi me cumã hàpên catêjê jarẽn xà
Matew 20.1-16
1 Mã Jeju te hipêr me cumã hũjarẽn ne me cumã:
— Côjkwa kam Pahpãm himpej xà te amji kam hapac xà pê ihhêj rũm pĩxô krô kre catêjê jõ pahhi pyràac. Ne ma hãn ne iràràtia na, cumã me hàpên catêjê japên to pra, cute mehkwỳ cajpar, ne hàpên xà na me ajpẽn par prãmte.
2 Ne pê pjê ata kam, pê amcro pyxit to me hàpên jahpan xà na ihpore hypyxit to ajco me amji mã amgõ. Na ri mehkôat amcro pyxit to me hàpên to pyt jahpan xà na ihpore ihhypyxit to me cumã hàmjõr xà na cute me ajpẽn par. Ne ma cute me hàpên xàwỳr mehkujahêc, mã me hàpên to mõ.
3 — Mã ramã ahna pyt jàpir, mã ma krĩ cape na hipêr cumã me hàpên catêjê japênto tẽ. Ne curi cute me hũmre kwỳ te nee ampo to mehàpên nare, ne cama ame ipa atajê kwỳ pupun.
4 Mã me cumã: “Ca ha me hanea ne me imã ijõ pĩxô to apê, wa ha ate me gàpên xàatajê jahpan xà na catyt kam me amã amgõ” hane.
5 Mã ma me mõ.
— Mã ramã pyt me pahkrã jimoc kam hỹr xàa kam, cutehipêr itajê to hajỹar, ne cute me haprôr, cumãme hàpên xà caxuw. Ne ramã pyt pec to mõ, mã cute hipêr itajê to hajỹar.
6 Ne ramã pyt xàr xàa wỳr, mã ma hacpỹ mã curi cute me cumã hàpên catêjê japrôr xà wỳr amji jaxàr. Ne cute hipêr me hũmre kwỳpupun, mã mehkrĩ, mã cute mehcukij to: “Ampo na mã ita kam ampo to me gàpên nare kam, me ana pyt?” hajỹr.
7 — Mã me cumã: “Ampo na? He nee jũm te me imã me ijàpên xà nõ jarẽn nare na ri” hajỹr. Mã pĩxô na pur jõ pahhi te mempar ne me cumã: “Ca ha hanea ne imã me apê” hajỹr.
8 — Mã pyt xàr xàa kam, mã pĩxô na pur jõ pahhi te cumã me hàpên catêjê jõ pahhi na hàhwỳr ne cumã: “Me hàpên catêjê mã akij, ne me cumã gàmjõr pa. Ne ca ha hapua na ite me haprôr atajê mã mam gàmjõr kam tẽ, ne hapua na ite mam me haprôr itajê mã amgõ” hajỹr. Mã harkwa kôt cute ton.
9 — Mã ramã pytre kam, me hàpên kam cute me to ihtẽm catêjê atajê teahpỹanre na ihpore ihhy pyxit ne mencwỳr par.
10 Mã iràràtia na cute me hàpên kam ihtẽm catêjê atajê, ihtỳj me hirôa pê me hàmcwỳr na me amji cãmjĩ cakrô, mã cute me cumã ihporeihhy to ihcahkũm atajêa jõr.
11 Mã cute amencwỳr, ne me hõ pahhi na mehcakôc kam mehtẽm.
12 Ne me cumã: “Pỳhàpà! Pom hapua na me hũmre jàpên kênre itajê jàmcwỳr xà me, me ijàmcwỳr xà ita pipẽan ajte? Wa iràràtia na ite me ijàpênkam itẽm. Ne amcro mã me ijũcanãar kam, ite me ijàpên to pyt cakrô, mã ajte me ijàmcwỳr xà itajê pipẽan!” hajỹr.
13 — Mã pĩxô na pur jõ pahhi te me cumã harkwa to: “Me ikwỳ nõ catêjê me ikampa, wa nee ite to ihnõ cupan nare. Mãr cu pahte ihpore hy pyxit peaj na ate me gàpên to pyt na, pahte me ajpẽn par ta?
14 Me gõ pore incwa, ne ma me gũrkwa wỳr me to pra. Wa mam ite hũmre mã ijõ pore to ijàmjõr to prãm ata to, wa ite hapua nahũmre itajê mã ijàmjõr, ne me ato ipipẽn partu.
15 Xà wa ha nee ajkĩ ite ijõ pore to ijàmjõr na prãm ata to ijàmjõr nare? Xà ca ite me to impejtixà ita jũ na, ca ame kam acryc?” — hajỹr.
16 Ne Jeju te harẽn jicu xà kam me cumã:
— Quê ha jũ caxuw Pahpãm pê pĩxô na pur jõ pahhi ata pyràac. Ne mehkryjre me, me cati to ajpẽan. Ne hapua na me ipa itajê me, mam me ipacatêjê to ajpẽan — hajỹr.