11
విస్వాసం
1 విస్వాసము బుల్లాట నిరీక్సింపబొడిలాట సత్యస్వరూపముకు, అంకికి నా దిగిదెల్లాట దిగిదిల్లీబులి రుజువైకిరి అచ్చి.
2 ఏ విస్వాసం ద్వారా అం పూర్వికులు పురువు దీకిరి మెప్పుపొందిగిచ్చె.
3 లొకొ పురువురొ వాక్యము వల్లరె నిర్మానమైనకిరిఅచ్చి. సడబట్టాక అంకికి దిగిదిల్లాటల్లా నాదిగిదిల్లా పదార్దాలుసంగరె నిర్మించబొడిసి బులి విస్వాసముసంగరె గ్రహించిగిలించొ.
4 విస్వాసముసంగరె హేబెలు కయీను కన్నా స్రేస్టమైలా బలి పురువుకు అర్పించిసి. పురువు తా అర్పనానె కోసం సాక్సం దిల్లాబెల్లె సెయ్యె తా విస్వాసముసంగరె నీతిమంతుడుబులి సాక్స్యము పొందిసి. సెయ్యె మొర్జిన్నన్నా తా విస్వాసముగురించి కొతాలగిలీసె.
5 విస్వాసముసంగరె హనోకు నామొర్జిల్లా అగరాక పురువు కొనిగీబాజీసి. సెయ్యె కాకు దిగదిల్లానీ కైంకి బుల్నే లేకనానె కొయిలాపనాక సెయ్యె నామొర్జిల్లా అగరె పురువుకు ఇస్టంగా రొయితై.
6 విస్వాసమునీకుంటా పురువుకు ఇస్టంగా రొవ్వురొ అసాద్యము పురువుపక్కు అయిలాలింకె సెయ్యె అచ్చిబులికిరి తాకు కుజ్జిలాలింకు పలితం దూసిబులి నమ్మిమంచి.
7 విస్వాసముసంగరె నోవహు సడ నా దిగిలా సంగతీనె గురించి పురువుసంగరె హెచ్చరించబొడిలా బెల్లె బయబక్తులు గలిగిలాలింకె తా గొరొలింకు రక్సన కోసం గుటె పడవ సిద్దం కొరిసి సడసంగరె సెయ్యె లొకొ ఉంపరె నేరం మోపికిరి విస్వాసము సంగరె కలిగిలా నీతికి వారసుడు యీసి.
8 పురువు అబ్రాహాము డక్కిలాబెల్లె విస్వాసము సంగరె సె డక్కకు లోబొడికిరి సెయ్యె స్వాస్ద్యముగా కడిగిల్లా చోటుకు బయలుదేరికిరి జేసి. ఈనె కేటికి జెమ్మంచో సెడ నా తెలిసిగీకుంటా బయలుదేరికిరి జేసి.
9 విస్వాసము సంగరె సెయ్యె తా సంగరె సే వాగ్దానముకు సమాన వారసుడు యీలా ఇస్సాకు యాకోబు బుల్లాలింకె గుడారమురె రొల్లాబెల్లె పొదరెలింకెరొ దెసొరె రొల్లాపనాక వాగ్దాన దెసొరె పరదేసులుగా జీవించిసె.
10 ఈనె పురువు కిడకు సిల్పిగా నిర్మానకుడైకిరి అచ్చొ సాస్వతమైల పునాదీనె పనికిరి సే పట్నము కోసం అబ్రాహాము ఎదురు దిక్కికుంటా అచ్చి.
11 విస్వాసము సంగరె అబ్రాహాము మొంత్రకలోరె బో యీసి ఇంకా సారా గర్బము అయినెను సక్తి పొందిసి సెయ్యె పురువుకు నమ్మిసి తా వాగ్దానము నెరవేర్చిసి.
12 సెడసంగరె మొర్నొకు పక్కుయీనెను సె జొన్నెదీకిరి సంక్యకు మెగొరె నక్సత్రములుపనికిరి, సొంద్రొ బల్లిపనికిరి గొనినార్లా సంతానము కలిగిసి.
13 అంకె సె వాగ్దానము బుల్లా పలము నా అనుబవించుకుంటా బాజీసె, దూరుతీకిరి దిక్కిరి వందనము కొరికిరి సెయ్యె బూమి అంపరె పరదేసులైకిరి యాత్రికులైకిరి అచ్చెబులి ఒప్పిగీకిరి, విస్వాసము గలిగిలాలింకైకిరి మొరిజేసె.
14 యాకిరి కొయిలాలింకె తంకస్వదేసముకు కుజ్జిలించొ బులి తంకె నిరూపించిగిల్లీసె.
15 తంకె కే దెసోదీకిరి అయిసెవొ సే దెసొకు జ్ఞాపకం కొరిగిన్నే ఇంకా జేతందుకు తంకు అవకాసం కలిగికిరి అచ్చి.
16 ఈనె తంకె ఇంక స్రేస్టమైలా దెసొ బులి పరలోకసంబంమైలా దెసొకు కోరిగిల్లీసె. సడసంగరె సెయ్యె తంకె పురువు బులిగిత్తందుకు పురువు తంకు కోసం లజ్జొపొడిని కైంకిబుల్నే తంకోసం గుటె పట్నము సిద్దిపర్చికిరి అచ్చి.
17 పురువు వాగ్దానము కొరిలా అబ్రాహాముకు తా జొర్నైలా జొన్నె పో కు బలిదేబులి మగిలాబెల్లె సెయ్యె తాకు జొర్నైలా ఏకైక పోకు బలిదీతె సంతోసముగా ఒప్పిగిచ్చి.
18 ఈనె పురువు తాసంగరె ఇస్సాకువలరె తొత్తె జొర్నైలా సంతానంవల్లరె కలిగిలాటాక మియ్యి వాగ్దానం కొరిలా సంతానం ఊసి బులి కొయిసి.
19 పురువు మొర్జిల్లాలింకంకా జీపించితందుకు సక్తిగల్లాటబులికిరి జనిలాటైలా అబ్రాహాము తా పో యీలా ఇస్సాకుకు మొర్నొతీకిరి బుల్లికిరి దీసి.
20 విస్వాసముసంగరె ఇస్సాకుకు జరగవలిసిలా సంగతీనె విసయమైకిరి యాకోబుకు ఏసావుకు ఆసీర్వదించిసి.
21 విస్వాసముసంగరె యాకోబు మొర్నొ కలొ అగరె యోసేపు పోనె జొనెజొనుకు ఆసీర్వదించికిరి తా అత్తొబడ్డి మొదలు ఉంపరె ఆనిగీకిరి పురువుకు పూజించిసి.
22 యోసేపు తాకు మొర్నొ కలో అయిలాబెల్లె విస్వాసముసంగరె ఇస్రాయేలు పోనె ఐగుప్తుకు సడదీకిరి జెవ్వురొ గురించి కొతాలక్కిరి తా అస్తికానె తంకె సంగరె దనిజాండిబులి ఆజ్ఞాపించిసి.
23 మోసే జొర్నైలాబెల్లె తా మా బో సె సన్నిపిల్లకు బొల్లెరొవురొ దిక్కిరి విస్వాసముసంగరె రొజాజ్ఞకు నాడొరొకుంటా తింటమసోనె తాకు నుచ్చిదీసె.
24 మోసే బొట్ట యీలాబెల్లె విస్వాసముసంగరె రొజారొ జో రొ పో బులి కొయిగిత్తె ఇస్టపొడిలానీ.
25 కుండె కలొ పాపబోగము అనుబవించువురొకన్నా పురువురొ మానమానెదీకిరి కొస్టొనె అనుబవించువురొ బొల్టబులిగిచ్చి.
26 ఐగుప్తురొ పలియ సంపద అల్లా అనుబవించువురొకన్నా క్రీస్తుకోసం గొప్ప అవమానం పొందితె బొల్టబులి, అగురుకు పొందిగివ్వొలిసిలా బహుమానం కోసం ద్రుస్టిరెదీగీకిరి యాకిరి కొయిసి.
27 విస్వాసము సంగరె మోసే నాదిగదిల్లా పురువుకు దిక్కుంటా స్తిరమైలాబుద్దికలిక్కిరి రొజా ఆజ్ఞకు నాడొరికిరి ఐగుప్తుకు సడదీకిరి బాజీసి.
28 ఇస్రాయేలురొ తొలిచూరు పిల్లానుకు మొర్నొదూత నామొరదీకుంటా విస్వాసముసంగరె పస్కాకు ఆచరించికిరి సే రొగుతొకు ద్వారాలుకు మక్కిసె.
29 విస్వాసముసంగరె తంకె ఆరిజిల్లా నేలంపరె సలిలాపనికిరాక గొర్ర సొంద్రొతీకిరి సలిగీకిరి బాజీసె. ఐగుప్తులింకె సాకిరికొరితెజేకిరి బుడ్డిజీసె.
30 విస్వాసముసంగరె సత్రదినోజాంక ఎరికో పట్నం చుట్టూ బుల్లిలా తరువాతరె యెరికో గోడానె కూలిజీసె.
31 విస్వాసముసంగరె రాహాబు బుల్లా దర్నింట దెసొకుపరిసీలించిలాలింకు సమాదానంగా నుచ్చిదిల్లందరె అవిదేయులైలాలింకెదీకిరి నానసించుకుంటా తప్పించబొడిసి.
32 ఇంక కెడ కొయిమంచి? గిద్యోనుకు, బారాకు, సమ్సోను, యెప్తా, దావీదు, సమూయేలు తంకు గురించి ప్రవక్తానె గురించి వివరించితందుకు సమయం చాలిని.
33 తంకె విస్వాసముదీకిరి రాజ్యాలుకు జయించిసె. నీతికార్యమునెకు జరిగించిసె. వాగ్దానాలుకు పొందిగిచ్చె. సింహాలురొ తుండొనె బుజ్జిపించిసె.
34 నియ్యకు రొల్లా బలము చల్లార్చిసె. టికిలి బుసానెకు తప్పించిగిచ్చె. బలహీనునెగా రొయికిరి బలపర్చబొడిసె. యుద్దంరె పరాక్రమసాలులైసె. సత్రుసేనలుకు పొక్కదీసె.
35 విస్వాసందీకిరి మొట్టానె మొర్నిజిన్నె తంకలింకు పునరుత్తానమువలరె ఇంకా పొందిగివ్వె. ఇంకాకుండెలింకె యీనె ఇంకా స్రేస్టమైలా పునరుత్తానము పొందిగిమ్మాసిబులికిరి విడుదల కావాలిబులి కొరిలాని.
36 ఇంక కుండె లింకె అవమానాలుకు, కొరడామడ్డొనె ఇంకా బందకాలుకు కైదికు అనుబవించిసె.
37 పొత్రొనె సంగరె మరిపించిసె, రంపాలుసంగరె కట్టిపించిగిచ్చె, సోదింపబొడిసె, కడ్గము సంగరె మొరిదీపించిగిచ్చె, గొర్రె చొమ్మోనె మేక చొమ్మోనె పొగ్గీకిరి, దరిద్రులుగా రొయికిరి కొస్టోనె పొడికిరి హింసించబొడిసె,
38 బొనొరె పొరొతొంపరె గొరోనెరె బూమి తొల్లె రొల్ల సొరంగమురె బుల్లికుంటా అచ్చె. సాలింకు యే లోకొ యోగ్యమైకిరి నీ.
39 అంకె అల్లా విస్వాసముసంగరె సాక్సం కడిగిల్లాలింకె ఈనెను, అంకె పురువుసంగరె వాగ్దానపలము అనుబవించినారె.
40 కైంకిబుల్నే అమె నీకుంటా తంకె సంపూర్నునె యీనాసి బులి పురువు అం కోసము ఇంక స్రేస్టమైలాటకు అగరాక సిద్దపర్చిసి.