9
Manetualain here na lahenda Israel ara
1 Ita fo riꞌ nanahekeꞌ too Kristus, dedea matetuꞌ. De, au ta dedea fufudiꞌ neuꞌ emi. Au dale ana boboko ka boe nafada au nae, Manetualain Dula-dale Na ator au dale ka.
2-3 Au afada leo iaꞌ: au dale ka susa. Au ameda an beraꞌ a leoꞌ na, nana huu au afarene lahenda kara. Au nau fo lahenda nusa Yahudi kara boe nanahekeꞌ ro Kristus, tehuu dodouꞌ ta ramahere Ni fa. Uniꞌ ko leo au bisa soi enoꞌ fee si, au sadia hule fo Manetualain huku au, ela kati si. Ma au boe sadia hule fo Manetualain heo heni au eme Kristus mai, fo ela au lahenda kara bisa nanahekeꞌ ro Ni.
4 Sekona te sira nana, lahenda Israel, riꞌ lahenda nusaꞌ esa fo naua-nanale nan seli. Neme fai a ulu na mai Manetualain soꞌu naa si dadi reuꞌ Ria ana nara so. Ana natudu kuasa kahere Na soa-neuꞌ asa. Ana heke hehelu-barataa rupaꞌ ara, no si. Ana fee Atoran Na neuꞌ asa. Sira siꞌ doꞌo-tabe neuꞌ Ana, ma ralalau Ni. Ana helu nau natudu dale malole Na neuꞌ asa.
5 Sira nana tititi-nonosiꞌ reme ami bei-baꞌim, siꞌ baꞌi Abraham, baꞌi Isak, ma baꞌi Yakob (lahenda hai nadeꞌ ‘Israel’ neme baꞌi Yakob mai). Ma Kristus, nana riꞌ Manetualain helu memaꞌ neme fai a ulu na, fo nau feen mai, Ria boe tititi-nonosiꞌ neme ami lahenda Yahudi a bei-baꞌi mara mai. Kristus nana riꞌ Manetualain fo pareta basa-basan boe. De naraa kalu lahenda io-oa Ni losa doo na neu. Tebe!
6 Leo mae lahenda Israel dodouꞌ bei ta sipoꞌ Kristus, tehuu lahenda ta bisa rafada rae, Manetualain hehelu-barata na ta dadi. Huu fo ta basa lahenda fo dadi reme bei-baꞌi Israel nana, Manetualain lahendan fo riꞌ Ana here naa si.
7 Conto leo-leoꞌ, lahenda dodouꞌ dadi reme ami bei-baꞌim, riꞌ baꞌi Abraham. Tehuu sira basa ta Abraham tititi-nonosin fo Manetualain here a. Manetualain nafada neuꞌ Abraham nae, “Au alelaꞌ noi o tititi-nonosim fo riꞌ dadi reme o anam Isak mai.”
8 Ria sosoa na nae, neme fai a uluꞌ na mai losaꞌ besaꞌ ia, ta basa tititi-nonosiꞌ fo reme ita lahenda Yahudi a baꞌin Abraham mai, riꞌ dadi reuꞌ Manetualain ana nara. Adaꞌ noi tititi-nonosiꞌ fo riꞌ neme Manetualain hehelu na neuꞌ Abaraham a, riꞌ Manetualain rekeꞌ asa reuꞌ Ria ana matetu nara.
9 Manetualain heke hehelu-barataaꞌ no Abraham nae, “Teu manamaiꞌ ia te, Au atafali seluꞌ mai. Tepoꞌ ria te, o saom Sara boki na ana touꞌ esa so.”
10 Ta noi ria fa. Ami baꞌim Isak no saon Ribka boki ana kaduaꞌ.
11-12 Tepoꞌ fo Ribka bei ta boki si, ara bei ta tao hata malole do hata tadaluꞌ. Leo mae leoꞌ na, tehuu Manetualain nafada memaꞌ Ribka laꞌe-neuꞌ ana fo riꞌ kalua nauluꞌ nae, “Neuꞌ ko aꞌa a noi-tao fee fadi na.” Manetualain nafada leoꞌ na, ela natudu nae, maneniko Ana here na lahenda esa, Ana bubuluꞌ nau pake lahenda ria fo tao leo beaꞌ. Boe ma Manetualain here na fadiꞌ a ela dadi neuꞌ Ria lahendan. Ana ta nahani nau nita fadiꞌ a tao leo beaꞌ, nana huu Manetualain bubuluꞌ memaꞌ so.
13 Sama leoꞌ Manetualain nafada nai Ria Susura Makamoi Na laꞌe-neuꞌ ana kaduaꞌ sira nae,
“Au here Yakob,
tehuu Au tipa heni Esau.”
14 De ita bei tae ubeaꞌ? Bate ruma nau rae, “Manetualain naetuꞌ dedeaꞌ ta beibeberaꞌ?” Ta bisa fa!
15 Fai a ulu na Manetualain nafada neuꞌ baꞌi Musa nae,
“Au atudu dale kasian ka neuꞌ lahenda fo Au here a.
Ma Au sue-lai lahenda fo Au tudu a.”
16 De Manetualain natudu dale kasian Na neuꞌ lahenda, ta huu lahenda ria hihii-nanaun do, nonoi-tataon, tehuu no Manetualain hihii-nanaun.
17 Sama leoꞌ manaduiꞌ nai Susura Makamoiꞌ a, Manetualain dedea no mane Masir a nae, “Au soꞌu o dadi mane, nana huu Au nau pake o, fo atudu kuasa Ka neuꞌ lahenda dodouꞌ. No ria na, lahenda rai dae-bafoꞌ ia katemaꞌ bisa soꞌu-fua Au nade Ka.”
18 De maneniko Manetualain nau tao na lahenda esa laka batu, sona Ana tao tuka Ria hihii Na. Ma kalu Ana nau natudu dale kasian Na neuꞌ lahenda esa, sona Ana tao tuka Ria hihii Na boe.
Manetualain bisa natudu dale kasian Na, tehuu Ana ta sipoꞌ tadaluꞌ a
19 Uniꞌ ko leo lahenda fo nadedea laka neuꞌ au nae, “Kalu leoꞌ na, de maneniko Manetualain nau tao hata esa, sona bea riꞌ bisa nalena laka neuꞌ Ana? Taꞌa, hete? Ubeaꞌ taon de Ana nau sale ita? Ria ta beibeberaꞌ!”
20 Kalu hapu ruma afi leo naꞌ, au ataa leo iaꞌ: “O afi mae o ia, nana bea?! O nau madedea laka neuꞌ Manetualain, do?” Bosoꞌ leo naꞌ! Huu fo nai Manetualain Susura Makamoi Na daleꞌ manaduiꞌ nae, “Maneniko lahenda tao hata esa, hapun nai bea hata ria bisa natane natafaliꞌ lahenda fo tao ni a nae, ‘Ubeaꞌ taon de o tao au leoꞌ ia!?’ ”
21 Conto leo-leoꞌ mana tao ureꞌ a. Neme dae pilas kaboaꞌ esa mai, ana nanuu haak fo nau tao na kusi makadilaꞌ esa, ela lahenda io ni. Ria boe nanuu haak pake dae kaboaꞌ ria fo tao mamana kadafuꞌ, tuka noi ria hihii-nanaun.
22 Leoꞌ na boe neuꞌ Manetualain. Ana nanuu haak fo tao tuka Ria hihii-nanaun. Ana nau natudu neuꞌ basa lahenda ra nae, Ana namanasa ma ta sipoꞌ lahenda tao tadaluꞌ hata-hata esa boeꞌ. Ria boe nau natudu neuꞌ lahenda nae, Ana nanuu kuasa dodou-inaꞌ, tehuu Ana bei nanenete neuꞌ lahenda tatao sala rupa nara. Sekona te lahenda fo tao salaꞌ, ara roi rahaniꞌ ledo-fai na fo ralulutuꞌ.
23 Ana nanenete leo naꞌ, ela natudu neuꞌ lahenda dodouꞌ nae, Ana nau natudu dale kasian Na neuꞌ lahenda ruma. Sira nana, siꞌ Ana here memaꞌ asa fo nau soꞌu nadedema si. No ria na Ana nau lahenda bubuluꞌ rae, Ria riꞌ kahereꞌ nan seli.
24 Ita boe nai daleꞌ sama-sama to lahenda fo riꞌ Ana soꞌu nadedema si a. Ana here memaꞌ ita fo dadi teuꞌ Ria lahenda nara. Ita ruma teme lahenda Yahudi a, ma ruma teme lahenda nusa fekeꞌ ara.
25 Fai a ulu na, Manetualain pake mana nesi matan Hosea, de duiꞌ laꞌe-neuꞌ lahenda fo ta Yahudi fa nae,
“Lahenda fo fai a ulu na ta Au lahenda ki fa,
tehuu Au nau aloo si ae,
‘Emi nana, Au lahenda ki.’
Ma lahenda nusaꞌ fo fai a ulu na Au ta sue si fa,
tehuu Au nau aloo si ae,
‘Emi nana, lahenda nusaꞌ fo Au sue-lai.’ ”
26 Ria boe duiꞌ nae,
“Nai na,
nai mamanaꞌ fo Manetualain nafada si nae,
‘Emi ta dadi meuꞌ Au lahenda Ki!’
Neuꞌ ko Manetualain fo Masodaꞌ a nau nafada si nae,
‘Besaꞌ ia emi dadi meuꞌ Au ana kara so!’ ”
Ana dedea leoꞌ na, nana huu Ana kasian neuꞌ lahenda fo ta Yahudi ra fa.
27 Manetualain mana nesi mata feken, Yesaya parnaa naloo bou-bou laꞌe-neuꞌ lahenda Israel ara nae,
“Leo mae lahenda Israel ara dodou-inaꞌ asa,
sama leoꞌ soroaeꞌ nai tasiꞌ a suu na,
tehuu noi lahenda bai anaꞌ riꞌ neuꞌ ko Ramatuaꞌ a poꞌi-tata naa si,
reme sira sala-siko nara mai.
28 Neuꞌ ko losa ledo-fain,
fo Ramatuaꞌ a naetuꞌ basa lahenda nai dae-bafoꞌ ia dedean,
sama leoꞌ Ana nafada memaꞌ so.
Ana ta nahani soꞌ,
tehuu Ana nalale huku si!”
29 Fai a ulu na, Yesaya boe nafada laꞌe-neuꞌ lahenda Yahudi ra nae,
“Ita taua-tanale,
nana huu Ramatuaꞌ a Mana Kuasa Nan Seli,
nataaꞌ ita tititi-nonosin ruma hapu sodaꞌ.
Maneniko ta leo naꞌ fa, sona
ita sapu-lalo,
sama leoꞌ lahenda kota Sodom ara no Gomora ra.”
Tutui Malole soa-neuꞌ lahenda Israel fo ta nau ramanene Manetualain
30 De ita nau tae ubeaꞌ? Tae, lahenda fo ta Yahudi fa rai basa mamanaꞌ ain, fo riꞌ maulu na ta saka enoꞌ ela nau malole ro Manetualain, besaꞌ ia malole ro Ni so, nana huu ara ramahere Yesus Kristus.
31 Sekona te lahenda Israel ara, soba nau tao tuka Musa Atoran na ela ara bisa malole ro Manetualain, tehuu ta dadi boeꞌ.
32-33 Ubeaꞌ taon de ara ta bisa malole ro Manetualain? Nana huu ara nau tao tuka adaꞌ noi Atoran, fo ela Ana sipoꞌ asa, sama leoꞌ lahenda dale roos, tehuu ara tao Yesus Kristus neuꞌ lahenda fo ta naraa ramahere Ni fa. Huu no sira namahere taan ria, de sama leoꞌ ara ratundu nai “batu natunduꞌ” esa. Ia riꞌ nai Manetualain Susura Makamoi Na nae,
“Mete-mitaꞌ!
Au peda-fua Lahenda esa
nai lete Sion, nai kota Yerusalem.
Lahenda ria sama leoꞌ batu esa,
fo tao na lahenda ratundu.
Tehuu bea riꞌ namahere Ni, sona
ta parluu maeꞌ.”
Batu ria, nana riꞌ Yesus. Tehuu lahenda Israel ara tipa heni Ni. Ria sama leoꞌ ara ratundu, de ara tuꞌu reu nana huu batu ria.