7
إِفْرَايِيمْ وَارْ إِخْسْ أَذْ إِثُوبْ
1 ”أَمْ سّْڭنْفِيغْ إِسْرَائِيل، ثتّْوَاعَارّْ ڒْمُوعْصِييّثْ ن إِفْرَايِيمْ ذ ثُوعفّْنَا ن سَامَارْيَا، مَاغَارْ نِيثْنِي تّڭّنْ س ڒْغشّْ. أَشفَّارْ إِتَّاذفْ ؤُ إِشْثْ ن بَانْذِييَّا ثتّْكشَّاضْ ذِي بَارَّا.
2 مَاشَا وَارْ قَّارنْ عمَّارْصْ ذڭْ وُوڒْ نْسنْ، أَقَا نشّْ أَذْ خَارّْصغْ ذِي مَارَّا ڒْغَارْ نْسنْ. خنِّي ڒخُّو، نّْضنْثْ أَسنْ ثْمڭَّا نْسنْ، أَقَا أَثنْثْ زَّاثْ إِ وُوذمْ إِنُو.
3 نِيثْنِي سّْفْرَاحنْ أَجدْجِيذْ س ڒْغَارْ نْسنْ ؤُ ڒْحُوكَّامْ سّْفْرَاحنْ ثنْ س إِخَارِّيقنْ نْسنْ.
4 نِيثْنِي مَارَّا ذ إِمْزنَّاينْ، أَقَا أَثنْ أَمْ يِيجّْ ن ؤُفَارَّانْ نِّي إِتّْوَاسّحْمَانْ زڭْ ؤُخبَّازْ. وَانِيثَا أَذْ إِسّْبدّْ زڭْ ؤُشمُّوضْ أَوَارْنِي ڒَامِي ڭّْوِينْ أَرشْثِي أَڒْ إِسْممْ قَاعْ.
5 ذڭْ وَاسّْ ن ؤُجدْجِيذْ نّغْ سّْهڒْشنْ ڒْحُوكَّامْ إِخفْ نْسنْ س ڒْحَاذُوقْ ن بِينُو. نتَّا إِسّْوِيژّضْ أَفُوسْ نّسْ إِ يِيمسْثهْزَاينْ.
6 خْمِي د-تّْقَارَّابنْ، يَارقّْ ؤُڒْ نْسنْ أَمْ يِيجّْ ن ؤُفَارَّانْ زِي ثْحْرَايْمشْثْ نْسنْ. إِتّطّصْ ؤُخبَّازْ نْسنْ دْجِيڒثْ ثكْمڒْ. غَارْ صّْبحْ يَارقّْ ؤُفَارَّانْ أَمْ ثْمسِّي إِتّحْذُوذُوقنْ.
7 نِيثْنِي مَارَّا حمَّانْ أَمْ يِيجّْ ن ؤُفَارَّانْ ؤُ نِيثْنِي تّتّنْ ڒْقُوضَاثْ نْسنْ. مَارَّا إِجدْجِيذنْ نْسنْ أَذْ وْضَانْ، وَارْ ذِينْ ؤُڒَا ذ إِجّْ جَارْ أَسنْ إِ د خَافِي غَا إِڒَاغَانْ.“
8 ”إِفْرَايِيمْ إِجَّا إِخفْ نّسْ إِسُّورْ جَارْ ڒڭْنُوسْ، إِفْرَايِيمْ ذ إِشْثْ ن ثفْضِيڒْثْ وَارْ ثتّْوَاسّْنقْڒبْ شَا.
9 إِبَارَّانِييّنْ سَارْضنْ جّهْذْ نّسْ، وَارْ أَكِيذسْ إِتِّيشِي. ؤُڒَا ذ أَشُوَّافْ نّسْ إِتّْشَابْ، وَارْ أَكِيذسْ إِتِّيشِي.
10 أَعفَّارْ ن إِسْرَائِيل أَذْ خَاسْ إِذْعَا، مَاغَارْ نِيثْنِي وَارْ دِّيكّْوِيڒنْ شَا غَارْ سِيذِي، أَربِّي نْسنْ، ؤُ وَارْ ث أَرْزُونْ شَا ذِي مَارَّا مَانْ أَيَا.
11 إِفْرَايِيمْ إِڭَّا أَمْ يِيشْثْ ن ثذْبِيرْثْ أَحَافِي، وَارْ ذَايسْ ڒفْهَامثْ. نِيثْنِي تّْڒَاغَانْ خْ مِيصْرَا، ڭُّورنْ غَارْ أَشُّورْ.
12 خْمِي ڭُّورنْ نِيثْنِي، تّْبزَّاعغْ نشّْ ثْرَاشَّا إِنُو خَاسنْ، أَذْ ثنْ د-سّهْوِيغْ أَمْ يِيجْضَاضْ ن ؤُجنَّا، أَذْ ثنْ وبّْخغْ خْ ڒحْسَابْ ن ڒخْبَارْ زِي جّْهثْ ن ثْمسْمُونْثْ نْسنْ.
13 ؤُشْثْ خَاسنْ مَاغَارْ نِيثْنِي أَروْڒنْ زَّايِي. أَكحّضْ خَاسنْ، مَاغَارْ نِيثْنِيعدَّانْ خَافِي. نشّْ ڭِّيغْ أَذْ ثنْ فْذِيغْ، مَاشَا نِيثْنِي نَّانْ خَافِي إِخَارِّيقنْ.
14 نِيثْنِي وَارْ د-سْغُوينْ شَا غَارِي س وُوڒْ نْسنْ، خْمِي طّْصنْ نِيثْنِي خْ ڒشْثُو نْسنْ تّْشثْشَانْ. نِيثْنِي تّْمُونَانْ ذِي طّْوعْ ن إِمنْذِي ذ بِينُو ن جْذِيذْ، أَقَا تّْغنَّانْ خَافِي.
15 نشّْ ذَارّْبغْ ؤُ سّْجهْذغْ إِغَادْجنْ نْسنْ، مَاشَا نِيثْنِي تّْخَارَّاصنْ ذَايِي ذِي ڒْغَارْ.
16 نِيثْنِي تّْعَاقَّابنْ، مَاشَا وَارْ إِدْجِي غَارْ ؤُمْعُودْجِي خْ كُوڒْشِي. أَقَا أَثنْ أَمْ يِيجّْ ن ڒْقوْسْ إِخطَّانْ، ڒْحُوكَّامْ نْسنْ وطَّانْ زِي سِّيفْ، زِي سمّْ إِنقّنْ ن يِيڒسْ نْسنْ. س ؤُينِّي أَذْ خَاسنْ ڭّنْ ثِيضحَّاشْ ذِي ثمُّورْثْ ن مِيصْرَا.“