24
1 وَارْ تَّاسمْ.
زڭْ إِرْيَازنْ إِعفَّاننْ،
وَارْ أَرزُّو شَا ثْمُونثْ أَكِيذْسنْ.
2 مَاغَارْ ؤُڒْ نْسنْ إِتّقّرْ غَارْ ؤُردّدْجْ،
أَوَاڒنْ ن إِينْشِيشنْ نْسنْ
إِ د-إِتّْوَاينْ غَارْ أَرْژِييّثْ.
3 ثَادَّارْثْ ثتّْوَابْنَا س ثِيغِيثْ،
ثتّْوَاسّمْثنْ س ڒفْهَامثْ،
4 س ثُوسّْنَا تّْوَاعمَّارنْ
إِخَّامنْ ن ذَاخڒْ،
س مَارَّا أَڭْڒَا إِغْڒَانْ ذ وَاڭْڒَا إِڒِيقّنْ.
5 أَرْيَازْ أَمِيغِيسْ إِجْهذْ،
أَرْيَازْ ن ثُوسّْنَا يَارنِّي ذِي جّهْذْ نّسْ،
6 مَاغَارْ إِتّْخصَّا
أَذْ إِتّْوَانْذهْ ؤُمنْغِي س ؤُذبَّارْ،
ؤُ س ڒمْغَارثْ ن ؤُمْشَاوَارْ أَذْ يِيڒِي ؤُسنْجمْ.
7 ثِيغِيثْ ثُوعْڒَا خْ ؤُبُوهَاڒِي،
نتَّا وَارْ يَارزّمْ أَقمُّونْ نّسْ
ذِي ثوَّارْثْ ن ثنْذِينْثْ.
8 ونِّي إِتّْخَارِّيصنْ ذِي ڒْغَارْ،
أَذْ أَسْ ڒَاغَانْ أَرَّايْسْ ن بُو-ثحْڒَايْمشْثْ.
9 ڒمْوَايَاڒْ ن ؤُخَارّصْ ن ؤُبُوهَاڒِي ذ دّنْبْ،
ؤُ أَمسْثهْزِييْ ذ نّْعِي إِ بْنَاذمْ.
10 مَاڒَا ثَارْخُوذْ زڭْ إِخفْ نّشْ
ذڭْ وَاسّْ ن ڒحْصَارثْ،
أَمُّو ؤُڒَا ذ جّْهذْ نّشْ أَذْ ثتّْوَاحْصَارْ.
11 سنْجمْ إِنِّي إِتّْوَاطّْفنْ
مَاحنْذْ أَذْ تّْوَانْغنْ،
إِنِّي ثنْ إِتَّاوْينْ
غَارْ مَانِي ثنْ إِ غَا نْغنْ،
سْبدّْ إِ-ثنْ!
12 مَاڒَا شكْ أَذْ ثِينِيذْ:
”خْزَارْ، أَقَا وَارْ نسِّينْ وَالُو خْ مَانْ أَيَا!“،
مَا ونِّي إِوزّْننْ ؤُڒَاونْ،
وَارْ ث إِسَّارْڭِيبْ؟
ونِّي إِحطَّانْ ڒعْمَارْ نّشْ، إِسّنْ إِ-ث!
نتَّا أَذْ إِخدْجصْ بْنَاذمْ
عْلَاحْسَابْ ڒْخذْمثْ نّسْ.
13 أشّْ ثَامّنْثْ، أَ مِّي،
مَاغَارْ نتَّاثْ ثصْبحْ،
ثَامّنْثْ ن ثغْرَاسْثْ
أَقَا ذ ثْمِيژِيذْثْ إِ وَانغْ نّشْ.
14 أَمُّو إِ ثدْجَا ثُوسّْنَا ن ثِيغِيثْ
إِ ڒعْمَارْ نّشْ.
مَاڒَا ثُوفِيذْ ت، خنِّي ثدْجَا ثِيوشَّا،
ڒَْايَاسْ نّشْ وَارْ إِتّْوَاقطّعْ شَا.
15 أَ أَعفَّانْ، وَارْ ثتّْحَامَا
خْ ثْزذِّيغْثْ ن ؤُمْسڭّذْ،
وَارْ هدّمْ أَمْشَانْ ن وَاريّحْ نّسْ!
16 مَاغَارْ أَمْسڭّذْ
أَذْ إِوْضَا سبْعَا ن ثْوَاڒَاوِينْ،
أَذْ د-إِكَّارْ عَاوذْ،
مَاشَا إِعفَّاننْ أَذْ نّْقَارْضنْ س ڒْغَارْ.
17 وَارْ فَارّحْ إِ ؤُوطُّو ن ڒعْذُو نّشْ،
مَاڒَا نتَّا إِنْقَارْضْ،
أجّْ ؤُڒْ نّشْ وَارْ إِفَارّحْ،
18 مَاحنْذْ سِيذِي وَارْ ث إِژَارّْ
ؤُ مَانْ أَيَا أَذْ يِيڒِي ذ ڒْعِيبْ ذِي ثِيطَّاوِينْ نّسْ،
أَڒَامِي نتَّا أَذْ خَاسْ إِسّْحيّذْ أَغْضَابْ نّسْ.
19 وَارْ تّْخيِّيقْ أَطَّاسْ
خْ ونِّي إِتّڭّنْ ڒْغَارْ،
وَارْ تَّاسمْ زڭْ إِعفَّاننْ،
20 مَاغَارْ أَقَا ونِّي إِتّڭّنْ ڒْغَارْ
وَارْ غَارسْ ثِيوشَّا،
ڒفْنَارْ ن إِعفَّاننْ أَذْ إِتّْوَاسّخْسِي.
21 أَ مِّي، ڭّْوذْ سِيذِي ذ ؤُجدْجِيذْ،
وَارْ تّْخدْجضْ شَا إِخفْ نّشْ
أَكْ-ذ يِينِّي إِخْسنْ أَذْ نْقڒْبنْ كُوڒْشِي،
22 مَاغَارْ أَذْ د-يَاسْ ؤُضيّعْ نْسنْ
ذڭْ إِجّْ ن ؤُمُورْ،
وِي إِسّْننْ أَنڭَّارُو أَعفَّانْ
ن إِسڭّْوُوسَا نْسنْ؟
أَوَاڒنْ إِوزْننْ ن أَيْثْ ن ثِيغِيثْ -ثَاسْغَارْثْ 2
23 ؤُڒَا ذ يِينَا ذ أَوَاڒنْ إِوزْننْ ن إِمِيغِيسنْ.
أَسْفَارْزْ ن وُوذْمَاونْ ذِي دّعْوثْ
وَارْ إِدْجِي شَا مْلِيحْ.
24 ونِّي إِقَّارنْ إِ ؤُعفَّانْ: ”شكْ ذ أَمْسڭّذْ!“،
وَانِيثَا أَذْ ث نعْڒنْ ڒڭْنُوسْ،
أَذْ ث شَارْهنْ شُّوعُوبْ.
25 مَاشَا إِنِّي ثنْ إِ غَا إِحَاكْمنْ،
أَذْ إِڒِينْ مْلِيحْ،
لْبَارَاكَا س مَارَّا ڒْخَارْ أَذْ غَارْسنْ د-ثَاسْ.
26 أَمْ إِجّنْ ونِّي إِسُّوذُومنْ إِينْشِيشنْ،
أَمُّو إِ يدْجَا ونِّي د-إِتَّارَّانْ
س وَاوَاڒنْ إِسڭّْمنْ.
27 سوْجذْ ڒْخذْمثْ نّشْ بَارَّا،
كمّڒْ إِ-ت إِ يِيخفْ نّشْ ذڭْ إِيَّارْ،
ؤُشَا بْنَا ثَادَّارْثْ نّشْ أَوَارْنِي مَانْ أَيَا!
28 وَارْ تِّيڒِي ذ أَشهَّاذْ بْڒَا سِّيبّثْ
خْ جَّارْ نّشْ.
مَا إِعدّڒْ أَذْ ثْغَارّذْ س إِينْشِيشنْ نّشْ؟
29 وَارْ قَّارْ: ”أَمْ مَامّشْ إِ ذ أَيِي إِڭَّا،
أَمُّو إِ د-أَسْ غَا ڭّغْ ؤُڒَا ذ نشّْ!“،
مَاغَارْ نشّْ أَذْ د-خڒْفغْ زِي كُوڒْ إِجّنْ
عْلَاحْسَابْ ڒْخذْمثْ نّسْ.
30 نشّْ كّغْ خْ ييَّارْ ن إِجّْ ن ؤُمعْڭُوزْ،
خْ ؤُمَارْجعْ ن ؤُضِيڒْ ن إِجّْ ن بْنَاذمْ
س وُوڒْ نّسْ وَارْ إِمْثِيننْ.
31 خْزَارْ، ثْڭعّذْ-د خَاسْ مَارَّا ثيْزِيثْ،
ثذْڒَا ثْزڭّْوَارْثْ ؤُذمْ ن ثمُّورْثْ نّسْ،
أَقَا ڒْحِيضْ نّسْ ن وژْرُو إِتّْوَاهْذمْ.
32 ڒَْامِي ت ژْرِيغْ، كْسِيغْ ت غَارْ وُوڒْ إِنُو،
ژْرِيغْ ت ؤُشَا كْسِيغْ ت أَمْ يِيجّْ ن ؤُوبّخْ.
33 ”أجّْ أَيِي أَذْ طّْصغْ شْوَايْثْ ذْرُوسْثْ،
شْوَايْثْ ذْرُوسْثْ ن ؤُنُوذمْ،
شْوَايْثْ ذْرُوسْثْ ن ؤُبُوزّڒْ س إِفَاسّنْ ضفْصنْ،
34 ذِينِّي د غَا يَاسْ زّڒْضْ نّشْ،
ؤُڒَا ذ ڒغْبنْ نّشْ
أَمْ يِيجّْ ن ورْيَازْ س ڒسْنَاحْ.“