45
1 إِ ؤُمقّْرَانْ ن إِمغْنَاجنْ. س ثغْنِينْثْ ن ’ثْلِيلِّيشِينْ‘. زڭْ أَيْثْ ن قُورَاحْ. أَخمِّي. إِزْڒِي ن ثَايْرِي.
2 زڭْ وُوڒْ إِنُو إِدُّوقّزْ-د
إِجّْ ن وَاوَاڒْ ذ أَصبْحَانْ،
قَّارغْ إِ ؤُجدْجِيذْ مِينْ سّْوجْذغْ،
إِڒسْ إِنُو ذ ڒقْڒمْ ن إِجّْ ن ؤُمَارِيرْ إِمحْضنْ.
3 ”شكْ ثشْنِيذْ خْ مَارَّا ثَارْوَا ن بْنَاذمْ،
ڒْْخَاضَارْ إِتّْوَازدْجعْ خْ إِينْشِيشنْ نّشْ،
خْ ؤُيَا إِبَاركْ إِ شكْ أَربِّي إِ ڒبْذَا.
4 بْيسْ سِّيفْ خْ ثْمسَّاضْثْ نّشْ،
أَ بُو-ثغْرُوضْثْ،
ثِيسِّيقْثْ نّشْ ذ ڒْعزّْ نّشْ.
5 وَاهْ، ڒْعزّْ نّشْ! إِڒِي ثْفڒْحذْ،
نْذهْ ذِي طّْوعْ ن ثِيذتّْ،
ضِيدّْ إِ ڒحْصَارثْ ن ثْسڭْذَا.
أَفُوسْ نّشْ أَفُوسِي أَذْ شكْ إِسّڒْمذْ
ثِيمسْڒَايِينْ سَّاڭّْوَاذنْثْ.
6 فْڒِيثْشَاثْ نّشْ قضْعنْثْ،
- وَاهْ، ڒڭْنُوسْ أَذْ وْضَانْ سَاذُو ؤُفُوسْ نّشْ -
شُوقنْثْ ؤُڒْ ن ڒْعذْيَانْ ن ؤُجدْجِيذْ.
7 ڒْكُورْسِي نّشْ إِڭلّْذنْ، أَ أَربِّي،
أَقَا-ث إِ ڒبْذَا قَاعْ.
أَزدْجَاضْ ن ثْڭلْذِيثْ نّشْ
ذ إِجّْ ن ؤُزدْجَاضْ ن ثْسڭْذَا.
8 شكْ ثتّخْسذْ ثَاسڭْذَا ؤُ ثْشَارّْهذْ ڒْغَارْ.
خْ ؤُيَا إِ شكْ إِذْهنْ، أَ أَربِّي، أَربِّي نّشْ
س زّشْثْ ن ڒفْرَاحثْ
ثِيوَا إِ إِعْشِيرنْ نّشْ.
9 مَارَّا ڒعْبَايَاثْ نّشْ
أَمْ مِيرُّو ذ وشْفِيڒْ ذ ڒْقَارْفَا،
زِي ڒقْصُورْ ن ڒْعَاجْ سّْفَارَّاحنْ شكْ
س ؤُزنْزُونْ خْ إِفِيڒَانْ ن ڒْڭَامْبْرِي،
10 يسِّيسْ ن ؤُجدْجِيذْ أَقَا-ثنْثْ
جَارْ ثِينوْجِيوِينْ نّشْ إِوقَّارنْ،
ثَاسْڒِيثْ ن ؤُجدْجِيذْ ثْبدّْ أَشْ خْ ؤُفُوسِي،
س ورُّوضْ زڭْ وُورغْ إِغْڒَانْ قَاعْ زِي ؤُفِيرْ.
11 سڒْ، أَ يدْجِي، خْزَارْ، أوْشْ أَمزُّوغْ نّمْ!
تُّو ڒْڭنْسْ نّمْ ذ ثَادَّارْثْ ن بَابَامْ!
12 خنِّي أَجدْجِيذْ أَذْ إِمّژْرِي ذڭْ وَاژْرِي نّمْ،
مَاغَارْ نتَّا ذ سِيذِي نّمْ!
بنْذقْ زَّاثسْ!
13 يدْجِيسْ ن صُورْ س إِشْثْ ن ثَارْزفْثْ،
وَاهْ، أَيْثْ ن بُو-وَاڭْڒَا ن إِجّْ ن ڒْڭنْسْ
أَذْ أَرْزُونْ أَذْ خَامْ أَرْضَانْ.
14 يدْجِيسْ ن ؤُجدْجِيذْ
أَقَا-ت ذ أَعُودْجِي مَارَّا ذَاخڒْ،
أَرُّوضْ نّسْ ذ إِجّْ ن ؤُمُوذِي
زڭْ ؤُفِيڒُو ن وُورغْ.
15 أَذْ ثتّْوَانْذهْ غَارْ ؤُجدْجِيذْ
ذڭْ وَارُّوضْ س ثِينْثَاثْ إِفَارْزنْ.
ثِيعْزَارِييِّينْ ثِينِّي ت إِضفَّارَانْ،
أَقَا أَثنْثْ ذ ثِيمدُّوكَّاڒْ نّسْ
نِّي د غَاركْ تّْوَاوْينْثْ.
16 أَقَا تّْوَاوْينْثْ س ڒفْرَاحثْ ذ وَارْشقْ،
أَمُّو إِ غَا أَذْفنْثْ
غَارْ ڒقْصَارْ ن ؤُجدْجِيذْ.
17 ثَارْوَا نّشْ أَذْ إِڒِينْ
ذڭْ ومْشَانْ ن ڒجْذُوذْ نّشْ،
شكْ أَذْ ثنْ ثڭّذْ ذ ڒْحُوكَّامْ
ذِي مَارَّا ثَامُّورْثْ.
18 نشّْ أَذْ إِذَارغْ إِسمْ نّشْ
ذِي كُوڒْ جِّيڒْ ذ كُوڒْ جِّيڒْ أَوَارْنِي أَسْ.
خْ ؤُيَا، أَذْ شكْ قَاذَانْ
مَارَّا ڒڭْنُوسْ إِ ڒبْذَا قَاعْ.“