2
Asenjem s arḍa n Arebbi, s l’iman
1 Uřa d kenniw tuɣa temmutem s ddnub nwem u s tubbuheřya nwem
2 min di tuɣa tuyurem ɛlaḥsab tudart n kuř ass n ddunect-a, ɛlaḥsab řxaḍar n uzeǧif n ṣṣulṭa x wazzay n řeɛwin, u ɛlaḥsab řxaḍar n arruḥ nni ixeddmen di tarwa n řmuɛṣiyyet.
3 Uřa d neccin tuɣa nruḥ qbeř di ccɣuřat nni, umi neḍfar nnecwat n weysum nneɣ, negga min ixs weysum nneɣ d nneyyet nneɣ, u tuɣa aneɣ d tarwa n weɣḍab qaɛ am inneɣni.
4 Maca AREBBI iccur s arreḥmet s tayri nnes tameqqrant i zi xaneɣ iɛizz.
5 Řami tuɣa aneɣ ɛad d imettinen di ddnub nneɣ, aqa yarr aneɣ-dd ɣar tudart ak-d Lmasiḥ, u s arḍa nnes issenjem aneɣ
6 u issnekkar aneɣ-dd akides uca issɣima aneɣ akides deg ijenwan di Yasuɛ Lmasiḥ,
7 ḥima ad isscen afeyyeḍ n wagřa n arḍa nnes d tcuni nnes di zzmanat i dd ɣa yasen, wenni xaneɣ dd-yusin s Yasuɛ Lmasiḥ.
8 Minzi s arḍa nnes nettwassenjem, s l’iman, war iǧi zzaywem, aqa-tt d tawhibt n AREBBI,
9 war teǧi s řxedmet, maḥend war ittuff uřa d ijj.
10 Maɣar neccin d axeřqi nnes, nettwaxřeq-dd di Yasuɛ Lmasiḥ ḥima ad negg řexdayem tiṣebḥanin nni d aneɣ issewjed AREBBI qbeř, maḥend ad nuyur daysent.
Lmasiḥ aqa-t řehna nneɣ
11 S uyenni ɛeqřem, aqa zic tuɣa kenniw d řegnus ɛlaḥsab jjadira n arrimet, tᵉttwasemmam ‘nbřa axtan’ zeg inni tuɣa s wextan nni iǧan d řxedmet n ifassen deg weysum.
12 Di řweqt nni tuɣa kenniw břa Lmasiḥ, d iɣriben zi jjihet n řeḥkamet n Israil, aqa tiggʷjem am ibarraniyyen x Řɛahd n lwaɛd. Tuɣa kenniw břa asitem u břa AREBBI di ddunect.
13 Maca řexxu, di Yasuɛ Lmasiḥ, aqa kenniw inni tuɣa iggʷejen, aqa řexxu tudsem-dd s Idammen n Lmasiḥ.
14 Maɣar Netta d řehna nneɣ am d yarra tnayen nni ɣar yijj, aqa Netta ihdem aɣbar n řeqwar wenni tuɣa ten ibḍan.
15 Deg weysum n arrimet nnes ibḍeř Netta řeɛdawet d Ccariɛa n tweṣṣa ak-d tweṣṣa i-dd-iḍfaren, ḥima ad dd-ixřeq di ṭṭbiɛet n Yixef nnes tnayen nni ɣar ijj n bnadem n jdid am ittegg řehna.
16 Aqa Netta isseṣřeḥ tnayen nni ak-d AREBBI deg ict n Arrimet u inɣa řeɛdawet s ṣṣalib nnes.
17 Yusa-dd ḥima ad ibarreḥ s Řexbar Aṣebḥan n řehna nni, i yinni tuɣa iggʷejen u i yinni tuɣa yudsen,
18 minzi zzayes nzemmar ad nadef s tnayen idneɣ s yijj n Arruḥ ɣar Babatneɣ.
19 S uya kenniw war teǧim d ibarraniyyen uřa d imeɛzab, maca kenniw d imezdaɣ n tendint n imqeddasen d tarwa n taddart n AREBBI.
20 Tᵉttwabnam x dsas n rrusul d inabiyyen, uca Netta d Aẓru Azeǧif n teɣmart, aqa-t d Yasuɛ Lmasiḥ.
21 Zzayes i ɣa ittwabna řebni marra, ad iyma uca ad idweř d ict n Zzawect Tameqqrant Iqeddsen di SIDI,
22 am zzayes i ɣa tᵉttwabnam uřa d kenniw, ad tiřim d tazeddiɣt n AREBBI di Arruḥ.