19
Awařen n Yasuɛ x řemřac d waǧaf
1 Ařami ikemmeř Yasuɛ awařen-a, iffeɣ zi Ljalil, yiweḍ ɣar jjwayeh n temmurt n Yahudiyya, ɣar ujemmaḍ n yeɣzar n L’Urdun.
2 Aqa iḍfar i-t ijj n řɣaci d ameqqran, issgenfa i-ten dinni.
3 Usin-dd ɣares uřa d Ifarisiyyen, tuɣa arezzun ad t jarrben, nnan as: “Ma iḥeǧeř i weryaz ad iǧef i temɣart nnes zi mkuř sibbet?”
4 Yarra-dd, inna asen: “Ma war teɣrim ca belli wenni ten dd-ixeřqen zeg umezwaru, ixřeq i-ten-dd d awtem d tewtemt,
5 uca aqa inna: ‘S uyenni ad ismeḥ weryaz di babas d yemmas, ad iqqen ɣar temɣart nnes, uca tnayen idsen nni ad iřin d ict n ddat’?
6 S uya war ttiřin ɛad d tnayen, maca d ict n arrimet. S uyenni min issmun AREBBI, war t ibeṭṭi bnadem.”
7 Nnan as: “Mayemmi yumur Musa xenni, maḥend ad iwc tabrat n waǧaf, ḥima ad as iǧef?”
8 Inna asen: “Musa ijja kenniw ad teǧfem i temɣarin nwem zi ssibbet n řeqsaḥet n wuřawen nwem, maca war iǧi ammu zeg umezwaru.
9 Maca Necc ad awem iniɣ: Wenni i ɣa iǧfen i temɣart nnes, břa ma tezna nettat, uca ad yiwi icten nneɣni, aqa netta izenna, u wenni i ɣa iwyen tamɣart tenni i iǧfen, aqa uřa d netta izenna.”
10 Imeḥḍaren nnes nnan as: “Mařa ammu i teǧa tmesřact jar bnadem d temɣart nnes, xenni nhřa ma ad imřec.”
11 Maca Netta inna asen: “War iǧi marra zemmaren ad qebřen awař-a mɣir inni umi temmewc ad t iqbeř.
12 Minzi aqa din inni ittwaqessen, minzi nitni d inni dd-ittwaxeřqen ammu zeg uɛeddis n yemmatsen, uca aqa din inni ittwaqessen, minzi nitni ttwaqessen zeg ifassen n iwdan, uca aqa din inni ittwaqessen, minzi nitni qessen ixef nsen di ṭṭweɛ n Tgeldit n ijenwan. Wenni izemmaren ad t iqbeř, ejj i-t ad t iqbeř.”
Yasuɛ ibarek iḥenjiren imeẓyanen
13 Řexdenni iwyen as-dd iḥenjiren imeẓyanen maḥend ad xasen issars afus nnes uca ad asen iksi s řmeɛruf, maca imeḥḍaren nnes webbxen ten.
14 Maca Yasuɛ inna asen: “Jjem iḥenjiren ad ɣari dd-asen, war ten mennɛem ca, minzi Tageldit n ijenwan i yinni am nitni.”
15 Issars xasen afus nnes uca iruḥ ssenni.
Yasuɛ ak-d webřiɣ wenni d bab n wagřa
16 Uca xzar, iqarreb-dd ijjen, inna as: “A Amseɣɣar Aṣebḥan, min ɣa ggeɣ d aṣebḥan ḥima ad ɣari tiři Tudart ittduman?”
17 Inna as Yasuɛ: “Mayemmi d ayi třaɣid ‘Aṣebḥan’? War iǧi ḥed d aṣebḥan mɣir Ijjen, aqa-t d AREBBI. Maca mařa texsed ad tadfed ɣar Tudart, ṭṭef di tweṣṣa.”
18 Inna as: “Man tina?” Inna as Yasuɛ: “War neqq, war zenni, war tticar, war cehhed s ẓur,
19 weqqar babac d yemmac uca ad texsed jjar nnec am yixef nnec.”
20 Abřiɣ inna as: “Aqa ḍfareɣ timesřayin-a marra zi temẓi inu. Min d ayi ittxiṣṣen ɛad?”
21 Yasuɛ inna as: “Mařa texsed ad tiřid tkemmřed, ruḥ, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ijenwan. Xenni as-dd, ḍfar ayi-dd.”
22 Řami isřa webřiɣ awař-a, iruḥ icḍen, minzi tuɣa ɣares aṭṭas n wagřa.
23 Xas uca inna Yasuɛ i imeḥḍaren nnes: “S tidett, Necc ad awem iniɣ, aqa yewɛar x bab n wagřa ad yadef ɣar Tgeldit n ijenwan.
24 Uca Necc ad awem iniɣ ɛawed, aqa ihwen i weřɣem ad yekk zi tiṭṭ n tsineft x bu wagřa ad yadef ɣar Tgeldit n AREBBI.”
25 Umi tt sřin imeḥḍaren nnes, nnxeřɛen, nnan: “Wi izemmaren xenni ad iṭṭef Tudart ɛad?”
26 Am tuɣa daysen ixezzar Yasuɛ, inna asen: “Ɣar iwdan man aya war izemmar, maca ɣar AREBBI kuřci di tzemmar nnes!”
27 Xenni yarra-dd Buṭrus, inna as: “Xzar, aqa neccin nejja kuřci, neḍfar i Cek. Min ɣarneɣ i ɣa yiřin?”
28 Yasuɛ inna asen: “S tidett, Necc ad awem iniɣ, i kenniw inni d ayi dd-iḍfaren, aqa xmi ɣa tiři marra ddunect d jdid, xmi ɣa iqqim Mmis n bnadem x řɛarc n uɛuǧi nnes, aqa uřa d kenniw ad teqqimem x tenɛac n řekrasi igellden, ḥima ad tḥekmem x tenɛac n tqebbař n ayt n Israil.
29 Kuř ijjen wenni isemḥen di tudrin niɣ deg aytmas niɣ di suyᵉtmas niɣ di babas niɣ deg yemmas niɣ di temɣart nnes d tarwa nnes uřa deg yeyyaren di ṭṭweɛ n Yisem inu, ad iksi mya n tseqqar uca ad iwart Tudart ittduman.
30 Maca aṭṭas n yinni iǧan d imezwura ad iřin d ineggura, uca ineggura ad iřin d imezwura.”