3
Chuden te ačhavel o Chramos
1 O Šalamun chudňa te ačhavel o Chramos le RAJESKRO andro Jeruzalem pro verchos Morija, kaj pes sikaďa o RAJ leskre dadeske le Davidoske; pre oda than, savo o David pripravinďa, pro humnos, savo cinďa le Ornanostar, savo sas Jebusejis.
2 Chudňa les te ačhavel akor, sar imar kraľinelas štarto berš, dujto čhon the dujto džives.
3 O Chramos, so o Šalamun ačhavelas, sas džinďardo bišuefta (27) metri a buchlo eňa metri.
4 E angluňi veranda sas ajsi buchľi sar o Chramos a uči eňa metri. Andral sas obthoďi le žuže somnakaha.
5 E bari hala andro Chramos obthoďa le cedroskre kašteha, so obcirdňa le somnakaha a pre oda somnakaj šukares kerďa o palmi the lanci.
6 O Chramos andral obthoďa le vzacne barenca a o somnakaj ande andral e phuv Parvajim.
7 Le somnakaha obcirdňa o fali, o kašta pro stropos, o prahi, o zarubňi the o vudar a pro fali diňa te randel avri le cheruben.
8 Paľis kerďa o andruno than, so pes vičinelas o Neksveteder than. Sas eňa metri džinďardo the eňa metri buchlo a obthoďa les biš (20) tonenca somnakaha.
9 O somnakune lecegi važinenas buter sar jepaš kilos. The o uprune thana obcirdňa le somnakaha.
10 Andro Neksveteder than kerďa duje cheruben a obcirdňa len le somnakaha.
11-13 Ola cherubi ačhenas le mujeha ko vudar. Dojekhes sas duj bare kridli a dojekh kridlos sas džinďardo 220 centimetri. Lengre kridli sas rozcirdle avke, hoj o kridlos jekhe cheruboskro pes chudelas jekha falatar a o kridlos le dujtoneskro pes chudelas avra falatar. Peskre dujte kridlenca pes chudenas jekh avrestar maškaral. Lengre rozcirdle kridli sas jekhetane eňa metri.
14 O pochtan andro Chramos anglo Neksveteder than kerďa le belave, lole the fijalove pochtanestar a diňa upre te sivel le cheruben.
O duj brondzune slupi
15 Anglo Chramos diňa te ačhavel duj slupi, save sas buter sar 15 metri uče, a pre lengro agor o brondzune kriti, save sas uče 220 centimetri.
16 O kriti upral o slupi sas šukares obthode le prephandle lancenca. Kerďa the šel (100) granatoskre phaba a thoďa len pro lanci.
17 Ola duj slupi ačhaďa anglo Chramos. Le južne sluposke diňa nav Jachin a le severne sluposke Boaz.