11
О Исус сиклярэл э сиклярдэн, со тэ пхэнэн э Дэвлэски
1 Екхвар о Исус пхэнэлас э Дэвлэски, тай кана Ов бытэрды, екх андар сиклярдэ мангляс Лэс:
— Сагбуса, сикляр амэн, со тэ пхэнас э Дэвлэски, сар о Иоанн сиклярдяс пэ сиклярдэн.
2 Ов пхэнляс лэнги:
— Кана пхэнэн э Дэвлэски, пхэнэн акаякха:
Дадэ, кажни мэ гинэл То шужо нав!
Мэ авэл То Патишайлыки!
3 Дэ амэн кажын дес амаро авдесутно манро.
4 Тай апувикер амарэ бэзя,
вай ли амэ апувикерас кажнески, кон амэнги борджи.
Ма дэ амэн тэ джяс катар дром.
5 Дэчи о Исус пхэнляс лэнги:
— Тюшундиен, екх андар тумэндэ кан авэл рати пэ амалэстэ тай кан пхэнэл: «Амал, дэ борджи ман трин питэс.
6 Мандэ опрал дром ало амал, тай мандэ ништо нанай лэс тэ дав».
7 Ай одова, сас андэ кхер, кан пхэнэл: «Ма лищие мандэ. О удар вай пханло, о пуя минрэ манца андэ тхан, нащи мэ анкха тэ ущяв тай тэ дав тут манро».
8 Пхэнав тумэнги, кай джи ов тэ на ущела тай тэ на дэл лэс, сар амалэс, ов кан ущел тай кан дэл лэс, сокабор камэл, кай одова на тэрдёл тэ мангел.
9 Оничин Мэ пхэнав тумэнги: манген — тай о Дэл тумэн кан дэл, родэн — тай кан аракхен, марэн — тай о Дэл тумэнги кан пхутрэл.
10 Вай кажни, кон мангел, одова диндёл, кон родэл, одова аракхел, тай одолэски, кон марэл, о Дэл пхутрэл.
11 Си машкарэ тумэндэ асавко дад, саво кан дэл пэ чявэс сапэс, кана кан мангел лэстэ мачес?
12 Я одова тэ мангела ванро, кан дэл лэс скарпионес?
13 Тай тумэ, кана холямэна, галён тэ дэн тумарэ пуен лачипэ, тай май зиядэ опрал о Дад кан дэл э Шужэ Духос одолэн, кон мангел Лэстэ!
О Исус кувдиел э бишужэн э Дэвлэски зораса
14 Екхвар о Исус кувды э шэйтанес э сакавимаскерэс. Тай кана о шэйтани никлисто, о мануш, саво сас сакави, зборисаило. О мануша шаштиенас.
15 Ай сарсавэ пхэнэнас:
— Ов кувдиел э шэйтанен э Веельзевулески зораса, о баро опэр бишужэ.
16 Авэра зумавэнас э Исусес тай мангенас, тэ сикавэл лэнги чюда опрал.
17 Ай о Исус джянэлас, со тюшундиен, пхэнляс лэнги:
— Вэрсаво патишайлыки, кай паляштыпэс, кан овэл чючё, тай о кхер, катэ си чингара, кан хурдёл.
18 Тай о Сатанас тэ марэлпэс мамуй пэстэ, сар кан тэрдёл лэско патишайлыки? Ай тумэ пхэнэн, кай Мэ кувдияв э шэйтанен э Веельзевулески зораса.
19 Мэ тэ кувдияв э шэйтанен э Веельзевулески зораса, дэчи со зораса кувдиен лэн тумарэ чявэ? Оничин он кан керэн тумэнги цындос.
20 Ай Мэ тэ кувдияв э шэйтанен э Дэвлэски наеса, адава сикавэл, кай о Патишайлыки э Дэвлэско ало тумэндэ.
21 Кана о зорало бутэ мултукенца мануш дикхел пал пэ кхерэстэ, лэско мангин кан овэл састо.
22 Ай кон-то май зорало тэ пэрэла опэр лэстэ тай тэ марэла лэс, ов кан лэл о мултукя, савэнги ишандиелас о сагбус, тай кан палящиел, со лиляс.
23 Кон нанай Манца, одова си мамуй Мандэ, тай кон на кидэл Манца, одова чёрэл.
Катар бишужо духос
24 Кана о бишужо духос никлёл андар мануш, ов пхирэл ки бипаненги тхана, родэл тхан тэ рагантиел, тай на аракхел лэс. Дэчи ов пхэнэл: «Тэ джяв мэ андэ кхер, андар савэстэ никлистём».
25 Кана ов авэл палэ, аракхел о кхер шужэс шулавдо тай кидино.
26 Дэчи ов джял тай лэл эфта аврэ духен, май канлыдэн, ниш ов сам, тай он авэн тай бэшэн отхэ. Тай адава э манушэски май пхаро одолэстар, ниш кай сас буруни.
Чячикано бахталипэ
27 О Исус дага пхэнэлас, кана екх джювли андар дюняс диняс бэбэря:
— Бахтали си одоя дай, кай пхиравэлас андэ пэстэ Тут тай хавдярдяс!
28 О Исус пхэнляс:
— Бахталэ одола, кон шунэн э збора э Дэвлэски тай керэн ла.
Сикаипэ э Ионеско
29 Кана о мануша кидиндилэ май бут, о Исус лиляс тэ пхэнэл:
— О дюняс адалэ вахытеско — канлыс. Ов родэл сикаипэ, ай лэски на кан овэл сикавдо нисаво сикаипэ, екх о сикаипэ э Ионеско.
30 Тай сар о Иона уло сикаипэ э дюняски, кай бэшэлас Ниневия, аякха о Чяво о Манушыкано кан овэл сикаипэ э дюняски адалэ вахытескерэски.
31 Э патишаинка катар юги кан дживиндёл ко цындос э дюняса адалэ вахытескерэса тай кан керэл цындос лэнги, вай ой али аврэ четестар ки дюняско тэ шунэл о годявэрипэ э Саламонеско. Ай анкха тумэнца Одова, Саво баро си катар Саламон.
32 О мануша, кай бэшэнас Ниневия, кан дживиндён ко цындос екхетханэ э дюняса адалэ вахытескерэса тай кан керэн лэн дошалэн, вай он ачявдэ пумарэ бэзя одолэстар, кай пхукавдяс лэнги о Иона. Ай анкха си тумэнца Одова, Саво баро катар Иона.
Катар ярэки
33 Никхон, тхарди лампа, на тхэл ла андэ погриби я тал кумани. Ами ла тхэн опэр падставка, кон авэл тэ дикхел о ярэки.
34 Ти якх си лампа тэ тэнески. Кана ти якх шужы, дэчи ли алаи то тэни пхэрдо ярэки. Ай кана джюнгали ти якх, дэчи алаи то тэни тэмина.
35 Дикх, одова ярэки, саво андэ тутэ, мэ на овэл тэмина.
36 Тэ си алаи то тэни пхэрдо ярэки тай андэ лэстэ нанай тэминако котор, ту алаи кан овэс пхэрдо ярэки, сар о ярэки э страпяко овэл опэр тутэ.
Касэвэти э фарисеенги тай э сикляримаренги э Тхэдимаскерэнги
37 Кана о Исус аякха пхэнэлас, екх фарисеи диняс икос Лэс пэстэ тэ хал лэса. О Исус ало тай лиляс тхан пал конас.
38 О фарисеи дикхляс, кай о Исус на халярдяспэс ангал хапэ, тай лачес шашты.
39 Ай о Сагбус пхэнляс лэски:
— Аки тумэ, фарисея, шужарэн кадея тай о тарелкес аврял, ай андар тумэ пхэрдэ бичялипэ тай джюнгалипэ.
40 Дэнилалэн! Та со, Одова, Кон кердяс аврял, на кердяс ли андар?
41 Дэн э чёрэн одолэстар, со си тумэндэ, дэчи алаи тумэнги кан овэл шужо.
42 Касэвэти тумэнги, фарисея! Тумэ дэн дэшто паи катар мята, катар рута тай аврэ чярендар, ай бристэн о цындос тай о дэхыпэ э Дэвлэско. Ли одова камэл тэ керэн, ли авэр тэ на ачявэн.
43 Касэвэти тумэнги, фарисея! Тумэ дэхэн тэ лэн лаче тхана андэ синагогя тай дэхэн, кана тумэн дэн сэлями андэ базаря.
44 Касэвэти тумэнги! Тумэ ушадиен э гробенги, савэ на дикхиндён. О мануша пхирэн опрал тай на джянэн.
45 Екх андар сикляримаря э Тхэдимаско пхэнляс Лэски:
— Сикляримарина, кана Ту адава пхэнэс, Ту ли амэн дэс тэлэ.
46 О Исус пхэнляс:
— Касэвэти ли тумэнги, сикляримаря э Тхэдимаски! Тумэ чен опэр мануша пхарипэ, саво нащи гелэс, ай тумэ били екхе наеса на астарэн лэс.
47 Касэвэти тумэнги! Тумэ керэн памятникя э прарокенги, савэн мудардэ тумарэ дада.
48 Адалэса тумэ сикавэн, кай тумарэ дада лачё керэнас: одола мударэнас э прарокен, ай тумэ керэн лэнги памятникя.
49 Оничин э Дэвлэско годявэрипэ пхэнляс: «Мэ кан бичялав лэндэ прарокен тай апостолен, ай он э сарсавэн андар лэндэ кан мударэн, ай аврэн кан кувдиен».
50 Оничин о дюняс адалэ вахытеско кан покинэл андар рат алаи ки прарокенго, кай чёрдило, сар ули э пху,
51 катар рат ки Авелеско тай джи ко рат ки Захариеско, э мудардэс машкарэ ко алтари тай ко храми. Ва, пхэнав тумэнги, дюняс адалэ вахытеско кан покинэл андар алаи.
52 Касэвэти тумэнги, сикляримаря э Тхэдимаски! Тумэ лилянус тумэнги о ключи катар джянлипэ. Ай тумэ сам на динянус андэ, тай одола, кон дэлас андэ, тумэ на муклянус лэн.
53 Кана о Исус никлисто андар кхер, о сикляримаря э Тхэдимаски тай о фарисея холинаса бут кхинярэнас Лэс пхучимаса.
54 Он тхэнас Лэски лавушкес, мангенас тэ астарэн збораса.