8
О джювля джян э Исусеса
1 Пал атхэ о Исус пхирэлас андар диз андэ диз, андар гав андэ гав, пхукавэлас Лошано Габэри катар Дэвлэско Патишайлыки. Лэса сас о дэшудуй апостоля,
2 тай сарсавэ джювля, савэ сас аиндимэна катар джюнгалэ духя тай катар дукха: э Мария, кай бучёлас Магдалина, андар савятэ никлистэ эфта шэйтаня,
3 э Иоанна, э ромни э Хузаски, саво дикхел палко кхер ки Иродеско, э Сусанна тай бут авэра. Адала джювля керэнас ярдыми э Исусески тай Лэски сиклярдэнги андар одолэстэ, со сас лэндэ.
О пхукаипэ катар мануш, кай чел о гив андэ пху
4 Ко Исус генэ авэнас мануша андар бутэ дизэндэ. Тай кана кидиняспэс бут дюняс, Ов пхукавдяс лэнги пхукаипэ:
5 — О мануш никлисто тэ чел андэ пху о гив. Тай кана ов чёрэлас лэс, сарсаво гив пэло паш ко дром, тай сас таптадимэ тай чюкудимэ э чирикленца.
6 Авэра пэлэ опрэ баруно тхан, тай, сар никлистэ, о ирнэкя шукилэ, кай на рэсэлас пани.
7 Авэра пэлэ андэ хлядя, тай кана о хлядя барилэ, пханлэ лэн.
8 Авэра пэлэ опэр лачи пху. Он никлистэ тай динэ шэлвар бут гив одолэстар, кай сас чито андэ пху.
Пхукавдяс адава, о Исус лачес пхэнляс:
— Кастэ си кана, тэ шунэн, мэ шунэл!
9 Кана о сиклярдэ пхучлэ, состар адава пхукаипэ,
10 о Исус пхэнляс:
— Тумэнги дино, тэ джянэн о гараипэ э Дэвлэски Патишайлыкеско, ай аврэнги алаи ачёл пхукаипэ, саво он на галён,
«тэ дикхен, ай на дикхен,
тэ шунэн, ай на галён».
11 Аки, со си адава пхукаипэ: гив — адава си э Дэвлэски збора.
12 Гив, кай пэло паш ко дром, — адава одола, кон шунэн э збора, ай дэчи авэл о Шэйтани тай чёрэл э збора андар лэнги илэндэ, тэ на пакян он тай тэ на овэн кутардимэна.
13 Гив, кай пэло опэр бар, — адава си одола, кон лошаса лэл э збора, кана шунэл ла. Ай лэндэ нанай корини. Ханик он пакян, ай кана авэл о вахыти о пхаро, он дурён.
14 Гив, кай пэло андэ хлядя, — адава си одола мануша, савэ шунэн э збора, ай вахытестар кажындесенги касэвэтя, барвалипэ тай соса манген тэ чялён, дурярэл лэн, тай о имишы лэнго на барёл.
15 Гив, кай пэло опэр лачи пху, — адава о мануша, савэ шунэн э збора, гаравэн ла андэ лачё тай андэ шужо ило тай анэн имиша андар одолэстэ, кай сас зоралэ андэ пакяпэ.
Пхукаипэ катар тхарди лампа
16 Никхон э тхарди лампа на тхэл тал какаи я тал кравати, ами тхэн опэр падставка, кон авэл тэ дикхел о ярэки.
17 Нанай ништо тэныки, со на овэлас би сикавдо, тай нанай ништо гаравдо, со на овэлас би джянло тай на никлисто аври.
18 Тай дикхен лачес, сар тумэ шунэн, вай кастэ си, одолэс кан овэл дино генэ, тай кастэ нанай, кан овэл линдо ли одова, со, сар лэски фаизэл, лэстэ си.
О Исус пхэнэл Пэ чячиканэ хорандастар
19 Ко Исус алэ Лэски дай тай о пхрала, тай андар бут дюняс нащи пашылэ Лэстэ.
20 Кон-то Лэски пхэнляс:
— Ти дай тай Тэ пхрала тэрдэ аври тай манген Тут тэ дикхен.
21 О Исус пхэнляс лэнги:
— Ми дай тай Мэ пхрала — одола, кон шунэл збора э Дэвлэски тай керэл ла.
О Исус тэрдярэл э балвал
22 Екхвар о Исус пхэнляс Пэ сиклярдэнги:
— Кан накхас околэ ригатэ ки панеско.
Он бэшлэ андэ лодка тай динэ джялдави.
23 Бискай он накхенас о пани, о Исус суто. Бирдэн опэр пани ваздиндили бари балвал, тай э лодка лиляс тэ учярэл о пани, аякха, кай он улэ андэ хатастэ.
24 Дэчи о сиклярдэ пашылэ ко Исус тай джянгавдэ Лэс, тай пхэнлэ:
— Сикляримарина, Сикляримари, амэ бугулдияс!
Тай джянгавдило о Исус тай тхэдяс тэ тэрдёл э балвал, тай о пани. Тай тэрдилэ э балвал тай о пани, тай уло тэныки.
25 — Кай тумаро пакяпэ? — пхэнляс о Исус э сиклярдэнги. Он трашанилэ тай шаштимэна пхученас екх аврэстар:
— Кон Ов, кай джи э балвалянги тай э панески пхэнэл, тай тхэн кан Лэс?
О Исус кувдиел э шэйтанен андэ чёчкадэс
26 Он алэ андэ пху ки герасиненги, кай мамуй ки Галилея.
27 Кана о Исус никлисто андар лодка ки пху, Лэстэ мамуй никлисто мануш андар диз, андэ лэстэ сас шэйтаня. Опэр лэстэ чёктан на сас савутя, тай бэшэлас ов на андэ кхерэстэ, ами андэ склепя.
28 Кана ов дикхляс э Исусес, ов читяспэс Лэски чянгендэ тай диняс бэбэря алаи пэ сэсеса:
— Со Ту мандар мангес, Исус, Чяво Уче Дэвлэско? Мангав Тут, ма кхиняр ман!
29 — вай о Исус пхэнляс э бишужэ духоски тэ никлёл андар адалэ манушэстэ.
О шэйтани екхараи джялас андэ адалэ манушэстэ, тай дэчи, джи кана лэс пхандэнас джянджирэнца о васта тай о чянга тай дикхенас пал лэстэ, ов чинэлас о джянджира, тай о шэйтани кувдиелас лэс ки биманушэнги тхана.
30 О Исус пхучляс лэс:
— Сар си то нав?
— Легион, — пхэнляс одова, вай андэ лэстэ гелэ бут шэйтаня.
31 Тай он мангенас э Исусес тэ на бичялэл лэн андэ бездна.
32 Надур паш ко горас адава вахыти чярявэнаспэс бут чёчкадэс, тай о шэйтаня манглэ э Исусес тэ мукел лэн тэ джян андэ лэндэ. Ов мукляс.
33 Кана о шэйтаня никлистэ андар адалэ манушэстэ тай гелэ андэ чёчкадэс, алаи о чёчкадэс читэпэс опрал горас андэ пани, тай бугулдылар.
34 О чёбаня э чёчкадэнги дикхлэ, со уло, прастанилэ тай пхукавдэ алаестар андэ диз тай агорял.
35 Кидинэпэс мануша тэ дикхен, со уло. Пашылэ ко Исус, он дикхлэ, кай о мануш, андар савэстэ никлистэ о шэйтаня, бэшло ко чянга ки Исусески, урявдо тай годявэр, тай трашанилэ.
36 Савэ дикхлэ, пхукавдэ лэнги одолэстар, сар сас аиндимэ андэ савэстэ сас шэйтаня.
37 Дэчи алаи, кон бэшэл андэ Герасински пху, лилэ тэ манген э Исусес тэ джял лэнги тханэндар, вай лачес трашанилэ. О Исус бэшло андэ лодка тай ало палэ.
38 О мануш, андар савэстэ никлистэ о шэйтаня, мангелас, тэ лэл лэс Пэса, ай о Исус бичялдяс лэс тай пхэнляс:
39 — Джя палэ кхерэ тай пхукав, со кердяс туки о Дэл.
Одова гело, тай пхукавэлас алаи андэ диз одолэстар, со кердяс лэски о Исус.
О Исус аиндэрдиел джювля тай дживиндярэл чяёря
40 Кана о Исус ало палэ, Лэс дэнас сэлями бут дюняс, вай алаи ишандиенас Лэс.
41 Лэстэ пашыло мануш, о нав савэско Иаир, саво сас баро мануш андэ синагога, тай пэло Лэски чянгендэ, лиляс тэ мангел э Исусес, тэ авэл лэстэ кхерэ:
42 лэстэ сас екх чяй, савяки сас паш ко дэшудуй брэш, мэрэлас. О Исус гело отхэ машкарэ ко бут дюняс, савэ тасавэнас Лэс алаи катар рига.
43 Андэ дюняс сас джювли, дэшудуй брэш латэ чёрдёлас рат. Ой тхэдяс опэр врачя алаи, со сас латэ, ай никхон нащи ла аиндэрды.
44 Ой пашыли палал ко Исус тай колисаили ко чети Лэски опрунэ савутендэ. Тай бирдэн тэрдило о рат.
45 — Кон Мандэ колисаило? — пхучляс о Исус. Никхон на пхукавэласпэс, тай о Пётар пхэнляс:
— Сикляримарина, агорял Тутэ бут дюняс та дэн бутуря алаи катар рига!
46 Ай о Исус пхэнляс:
— Кон-то Мандэ колисаило. Мэ тэнеса галилём, сар андар Мандэ никлисти зор.
47 Дэчи э джювли галили, кай нащи гаравдяспэс, пашыли, изравни, тай пэли ангал Исус. Ангал алаи ко дюняс ой пхукавдяс, соски ой Лэстэ колисаили тай сар бирдэн сас аиндимэ.
48 Дэчи о Исус пхэнляс лаки:
— Ми чяй, то пакяпэ аиндэрды тут. Джя лачимаса.
49 О Исус дага на бытэрды тэ зборизэл, кай ало мануш андар кхер ки барэско э синагогакерэско.
— Ти чяй мули, — пхэнляс ов, — ма кхиняр генэ э Сикляримарес.
50 Шунляс адава, о Исус пхэнляс э Иаирески:
— Ма траша, екх пакя, тай э чяёри кан овэл кутардимэ.
51 Кана Ов диняс андэ кхер, на мукляс никхон, тэ дэл Лэса, екх э Пётарэс, э Иоаннес, э Яковес тай э дадэс э дэяса э чяёрякерэн.
52 О дюняс ровэнас тай гаулизэнас пал латэ.
— Тэрдён тэ ровэн, — пхэнляс о Исус, — вай ой на мули, ами сути.
53 Он лилэ тэ асан Лэстар, вай джянэнас, кай э чяёри мули.
54 О Исус лиляс ла вастэстар тай пхэнляс:
— Пуёс, ущи!
55 О духос э чяёряко ало палэ латэ, тай ой бирдэн ущини. О Исус пхэнляс, тэ дэн ла тэ хал.
56 О дад тай э дай сас шаштимэна, ай о Исус тхэдяс лэн никхаски тэ на пхукавэн одолэстар, со уло.