1 Adalese so našti ine više te izdržina, složinđam amen dai po šukar korkore te ačhova ani Atina, 2 a tumende te bičhala e Timoteje, amare phrale hem saradniko ani e Devlesiri služba zako širiba o evanđelje e Hristesoro, te zorjari hem te ohrabrini tumen ani tumari vera, 3 te na ovel niko uznemirime akale nevoljencar. Adalese so, hem korkore tumen džanen da injam odredime zako nevolje. 4 Hem čače, kad injamle tumende, angleder vaćerđam tumenđe da ka arakhen amen nevolje, hem sar so džanen, ađahar hem inele. 5 Adalese, kad našti ine više te izdržinav, bičhalđum e Timoteje te dodžanav sar terđovena ani vera. Darandiljum zako tumenđe te na anđa tumen ano iskušenje o Kušači, i da sa amaro trud inele za džabe.

6 A akana o Timotej irinđa pe tumendar hem anđa amenđe šukar vestija tumare veratar hem mangipnastar. Phenđa amenđe da pamtinena amen palo šukaripe hem da mangena palem te dikhen amen, sar hem amen tumen. 7 Adalese, phraljalen, uzalo sa amare muke hem nevolje, utešinđam amen tumara veraja. 8 Akana čače živinaja, adalese so džanaja da zorale terđovena ano Gospod. 9 Edobor radujinaja amen zbog tumende anglo amaro Devel! Našti dovoljno te zahvalina lese zako adava. 10 Dive hem rat čačikane molinaja te šaj palem te dikha tumen hem te dophera okova so falini ani tumari vera.

11 A korkoro o Devel, amaro Dad, hem amaro Gospod Isus, nek pripremini o drom zako amaro aviba tumende. 12 Nek o Gospod ćerel te barjol hem te prepherđol tumaro mangipe jekh zako aver hem zako sa o manuša, sar so hem amen isi but mangipe zako tumenđe. 13 Nek zorjari tumare vile te oven bizi mana hem sveta anglo amaro Devel hem Dad, kad amaro Gospod Isus palem ka avel sa ple manušencar.