3
O Isusi po baro e Mojsijastar
1 Adalese, sveta phraljalen, tumen kola isi tumen udeo ano nebesko poziv, dikhen tumen upro Apostoli hem Prvosvešteniko oti amari vera – upro Isus.
2 Ov inele verno e Devlese kova čhivđa le te ovel prvosvešteniko, sar so hem o Mojsije inele verno ano sa o čher e Devlesoro.
3 A palem, o Isus zaslužini po bari čast nego o Mojsije, sar so hem o graditelji zaslužini po bari čast oto čher savo izgradinđa.
4 Adalese so, svakoi čher izgradime nekastar, ali o Devel izgradinđa sa so postojini.
5 O Mojsije inele verno ano e Devlesoro čher sar sluga, sar te šaj svedočini oto stvarija save tek ka oven mothovde.
6 Ali o Hrist verno upravini e Devlesere čhereja sar Čhavo. A amen injam lesoro čher te ićeraja o pouzdanje hem i nada savaja hvalinaja amen.
Upozorenje protiv i nevera
7 Adalese, sar so o Sveto Duho phenela:
“Avdive, kad šunena lesoro glaso,
8 ma oven phandle vilesere sar so inele tumare pradada kad pobuninde pe,
ano dive oto iskušenje ani pustinja.
9 Saranda berš tumare pradada dikhle mle delja,
a palem izazivinde man hem iskušinde man.
10 Adalese holjanđum upri adaja generacija hem phenđum:
‘Lengere vile uvek cidena pe mandar,
hem na pendžarena mle droma.’
11 Ani holi tegani haljum sovli:
‘Nikad naka đerdinen ano mlo than oto odmor.’ ”
12 Phraljalen, pazinen te na ovel nekasoro vilo tumendar bišukar hem neverno, pa te cidel pe e dživde Devlestar.
13 Nego, svako dive ohrabrinen jekh avere, dok god phenela pe “avdive”. Ađahar nikas tumendar te na prelel o greh hem te ćerel tumaro vilo te ovel phandlo.
14 Adalese so, sarijen amen isi udeo ano Hrist te ićeraja amen đi o kraj zorale ko pouzdanje savo ine amen ano početak.
15 Sar soi pisime ano Sveto lil:
“Avdive, kad šunena lesoro glaso,
ma oven phandle vilesere sar so inele tumare pradada kad pobuninde pe.”
16 Kolai adala so šunde e Devlesoro glaso, pa pobuninde pe? Nane li adala sa okola kolen o Mojsije ikalđa taro Egipat?
17 Hem upra kaste o Devel saranda berš inele holjame? Na li upro okolende kola grešinde, kasere telija mule ani pustinja?
18 Hem kase adava halja pe sovli da naka đerdini ko lesoro than oto odmor te na okolenđe kola inele neposlušna?
19 Ađahar dikhaja da našti ine te đerdinen ko lesoro than oto odmor zbog adava so na verujinde.