18
O uništenje e Vavilonesoro
1 Palo adava dikhljum avere anđeo sar huljela taro nebo. Ole ine bari vlast hem lesoro sjaj osvetlinđa i phuv.
2 Ov zorale glasoja vičinđa:
“Peli! Peli i bari diz Vavilon!
Uli čher kote bešena o demonja,
hem than zako sa o bišukar duhija,
than zako sa o nečista čiriklja,
than zako sa o nečista hem odvratna zverija.
3 Adalese so sa o narodija pile
i mol oti lakiri holi hem oto lakoro blud.
Olaja e phuvjakere carija mukle pe ano blud,
a e phuvjakere trgovci barvalile
lakere barikane barvalipnastar.”
4 Tegani šunđum hem aver glaso taro nebo sar vaćeri:
“Ikljoven olatar, mle manušalen,
te na ćeren olaja grehija
hem te na arakhen tumen lakere nevolje.
5 Adalese so, lakere grehija barile đi o nebo
hem o Devel setinđa pe oto lakere bišukaripa.
6 Irinen laće palo lakere delja,
irinen laće duj puti više zako okova so ćerđa.
Ani čaša ani savi oj čhorđa averenđe
tumen duj puti više čhoren olaće.
7 Kobor muklja pe ano sjaj hem ano barikano barvalipe,
edobor muke hem tuga den la,
adalese so vaćeri ana peste:
‘Ko prestolje bešava sar carica.
Na injum udovica hem naka tugujinav.’
8 Adalese ano jekh dive ka resen la sa akala nevolje:
o meriba, i tuga hem o bokhalipe.
Ka ovel thardi jagaja,
adalese soi zoralo o Gospod o Devel, kova sudini laće.
9 A e phuvjakere carija, kola olaja mukle pe ano blud hem kola uživinde ano lakoro barikano barvalipe, ka roven hem ka kukinen palo late dikhindoj o čuro hem ola sa ani jag.
10 Ka terđoven dur olatar, ani bari dar oto lakere muke, hem ka vaćeren:
‘Jao! Jao, i bari diz Vavilon, i zorali diz!
Otojekhvar reslja tut ti osuda!’
11 A e phuvjakere trgovci ka roven hem ka tugujinen palo late, adalese so niko više naka činel lengiri roba:
12 o zlato, o srebro, o draga bara hem o biserja, o šukar lan, o lole šeja, i svila hem o skerlet, sa o vrste oto mirisno kaš hem sa o vrste predmetija oti slonovača, sa o vrste predmetija oto skupo kaš, oti bronza, oto sastren hem oto mermer,
13 o cimet, o začin, o šukar mirisija, i smirna, o tamjan, i mol hem o ulje, o parno varo hem o điv, e stoka hem e bakren, e grasten hem e kočijen, e robonen hem o manušikane duše.
14 Ačhiljan bizo šukaripa palo save te duša ine bari želja. Sa to baro barvalipe hem to sjaj propele hem nikad više naka irine len.
15 O trgovci so ćerde buti adaleja, kola ule barvale adalestar, ka terđoven po dur, ani bari dar oto lakere muke. Ka roven hem ka tugujinen,
16 vaćerindoj:
‘Jao! Jao, i bari diz!
Injanle urjavdi ano šukar lan, ano skupa lole šeja hem ano skerlet. Injanle ukrasime zlatoja, dragone barencar hem biserencar.
17 Otojekhvar sa adava baro barvalipe ulo uništime!’
Hem sa o kapetanja e brodonengere hem sa o putnici, o mornarija hem okola kola ćerena buti ko more, terdine po dur.
18 A dikhindoj o čuro hem ola sa ani jag, vaćerde: ‘Savi diz inele edobor bari sar akaja?’
19 On čhorde i prašina upro pumare šere hem runde hem tugujinde, vaćerindoj:
‘Jao! Jao, i bari diz!
Olakere barvalipnaja barvalile
sare kolen ko more ine brodija,
a oj otojekhvar uli uništime!’
20 Radujinen tumen zbog olakoro uništenje, nebo hem tumen o manuša e Devlesere, hem o apostolja hem o proroci, adalese so o Devel osudinđa la zako okova so ćerđa tumenđe!”
21 Tegani jekh zoralo anđeo vazdinđa i stena bari sar o bar e mlinesoro hem frdinđa la ano more, vaćerindoj: “Ađahar zorale ka ovel frdime hem i bari diz Vavilon, i nikad više te na ovel arakhli!
22 Nikad više ana tute naka oven muzičarija,
naka šunđon zvukija oti harfa, oti frula ni oti truba!
Nikad više ana tute naka aračhoven zanatlije oto nijekh zanati!
Nikad više ana tute naka šunđol o zvuk oto mlin!
23 Nikad više ana tute naka sijajini o svetlost e svetiljkakoro!
Nikad više ana tute naka šunđol o glaso e mladoženjasoro ili e borjakoro!
Te trgovci inele najbare manuša ki phuv.
Sa o narodija hovavdile te mađijendar.
24 Hem ano late aračhilo o rat e prorokonengoro hem e Devlesere manušengoro
hem sarijengoro kola inele mudarde ki phuv.”