13
O Isus vaćarol taro manuš savo čhudol o seme ki phuv
(Mk 4,1–9; Lk 8,4–8)
1 Ane gova đive iklilo o Isus taro čher thaj bešlo pašo jezero te sikavol.
2 But manuša ćidije pe paše leste, golese đelo ano čamco, bešlo a von ačhile ki obala.
3 Thaj but vaćarda lenđe ane paramiča sar kaja:
“Dikh, iklilo o manuš savo sejil.
4 Thaj kana sejisada, nesave semenura pele ko drom, thaj avile e čiriklja thaj sa xalje len.
5 A avera pele pe barale thana, kaj ni sasa but phuv thaj o seme sigate barilo, golese kaj ni sasa duboko phuv.
6 Thaj kana o kham sasa zuralo, i biljka phabili thaj šućili golese kaj ni sasa la duboko koreno.
7 Nesavo seme pelo ane kangre, al barile kangre thaj i biljka tasadili.
8 A nesavo seme pelo ki šukar phuv thaj anda bijandipe savo sasa tranda (30), šovardeš (60) thaj šel (100) droma po baro taro kova so sejisade.
9 Kas isi kana te šunol nek šunol.”
Sose o Isus vaćarol ane paramiča
(Mk 4,10–12; Lk 8,9–10)
10 Tegani avile pašo Isus lese sikade thaj pučlje le: “Sose tu vaćare lenđe ane paramiča?”
11 A vov vaćarda: “Tumenđe dija pe te džanen so si garajipe taro Carstvo e neboso, a lenđe ni dija pe.
12 Golese, kas isi džanglipe ka dol pe lese thaj ka avol le po but. A kas naj džanglipe, ka lol pe i kova so isi le.
13 Golese me vaćarav lenđe ane paramiča, golese kaj e manuša dičhen a ni dičhen thaj šunen a ni šunen thaj ni haljaren.
14 Thaj gija pherdol o proroštvo savo o Dol dija e Isaijase, savo vaćarol:
‘Ka šunen thaj ka šunen,
al ni ka haljaren,
ka dičhen thaj ka dičhen,
al ni ka shvatin.
15 Golese kaj zurajle e ile kale manušenđe,
phareste šunen pe kanencar,
thaj phanglje pe jakha,
te ni dičhen jakhencar,
thaj kanencar te ni šunen,
thaj ilesa te ni haljaren,
thaj te ni irin pe premal mande
te sastarav len.’
16 A blago tumare jakhenđe golese so dičhen thaj tumare kanenđe so šunen.
17 Čače vaćarav tumenđe, kaj but prorokura thaj čačutne sa e ilesa manglje te dičhen so tumen dičhen, a ni dikhlje thaj te šunen so tumen šunen, a ni šunde.
O Isus sikavol i paramič taro seme
(Mk 4,13–20; Lk 8,11–15)
18 Šunen akana, so značil i paramič taro manuš savo sejil.
19 Kana khoni šunol o Lafi taro Carstvo thaj ni haljarol, avol o beng thaj čhorol so si sejimo ano leso ilo. Gova si o seme so si po drom sejimo.
20 A o seme savo si sejimo ko baralo than si gova savo šunol o Lafi e Devleso thaj sigate ano radujipe lol pese gova.
21 Al naj le koreno ane peste thaj ni ačhol but. Kana avol o bilačhipe il traden le pašo Lafi, sigate perol.
22 Kova seme savo si sejimo ane kangre si gova savo šunol o Lafi, al e brige kale svetose thaj o xoxaipe e barvalimaso tasaven o Lafi thaj ačhol bizo bijandipe.
23 A o seme savo si sejimo ki lačhi phuv si gova savo šukar šunol o Lafi thaj haljarol le. Tegani čače anol šukar bijandipe a jekh seme anol po šel (100) semenura, nesavo seme anol po šovardeš (60) semenura thaj nesavo seme bijanol po tranda (30) semenura.”
O Isus vaćarol i paramič taro điv thaj taro kukolj
24 O Isus vaćarda lenđe aver paramič: “O Carstvo e neboso si sar manuš savo sejisada lačho seme ane po polje.
25 A kana e manuša sute, avilo leso dušmano, sejisada kukolj maškaro điv thaj đelo.
26 Kana barilo o điv thaj anda bijandipe, sikadilo thaj o kukolj.
27 Tegani avile e manuša save služin e manuše kaso sasa o polje thaj vaćarde lese: ‘Gospodarona, na li šukar seme tu sejisadan ani ćiri njiva? Kotar akana kukolj?’
28 A vov vaćarda lenđe: ‘O dušmano gova ćerda.’
A e manuša save služin vaćarde lese: ‘Manđe li akana te dža te ikala o kukolj?’
29 A vov vaćarda: ‘Na, te ikalden o kukolj, šaj te ikalen o điv.
30 Ačhaven nek baron katane dži ko ćidipe thaj ko vreme e ćidimaso ka vaćarav kolenđe so ćiden: Ćiden angleder o kukolj thaj phanden le ke snopura te phabarav le, a o điv čhuven ano than kaj čhuvav mingro điv.’ ”
O Isus vaćarol i paramič taro seme e gorušicako
(Mk 4,30–34; Lk 13,18–21)
31 O Isus vaćarda lenđe vadži jekh paramič: “O Carstvo e neboso si sar jekh seme tari gorušica, savo lol o manuš thaj sejil ki piri njiva.
32 A vov si čače emcikno tare sa e semenura, al kana barol, po baro si tare sa e biljke ano vrt thaj kana ćerdol kaš, e čiriklja e nebose aven thaj ćeren gnezdura thaj bešen pe lese granke.”
O Isus vaćarol i paramič taro kvasaco
33 Pale gova vaćarda vadži jekh paramič: “O Carstvo e neboso si sar kvasaco savo lol i džuvli thaj čhuvol ane biš (20) kile aro sa dži kaj ni uštol o humer.”
34 Sa kava o Isus vaćarola e manušenđe ane paramiča. Thaj bize paramiča khanči ni vaćarda lenđe.
35 Gijate pherdilo gova so o proroko vaćarda:
“Ka putrav ane paramiča mo muj,
ka vaćarav kova so si garado taro postanko e svetoso.”
O Isus sikavol so si i paramič taro điv thaj o kukolj
36 O Isus ačhada e manušen thaj đelo ano čher. Avile paše leste lese sikade thaj vaćarde: “Sikav amen so si i paramič taro kukolj ani njiva.”
37 A vov vaćarda lenđe: “Gova savo sejil lačho seme si o Čhavo e manušeso
38 thaj i njiva si o sveto. Lačho seme si e čhave e Devlese carstvose, a o kukolj si e čhave e benđese.
39 A o dušmano savo sejisada len si o beng, a o ćidipe si o kraj e svetoso, a kola so ćiden si e anđelura.
40 Sar o kukolj ćidol pe thaj jagasa phabarol pe, gija ka avol ko krajo e svetoso.
41 Me o Čhavo e manušeso ka bičhalav me anđeluren thaj von ka ćiden tare mingro Carstvo sa e manušen save čhuvena averen pe grehura thaj save phađena e Devleso zakon.
42 Thaj ka čhuden len ani jagali kubava. Thaj gothe but ka roven thaj ka škripin dandencar.
43 Tegani e pravedna manuša ka sijajin sar o kham ano Carstvo pe Dadeso. Kas isi kana nek šunol.”
O Isus vaćarol i paramič taro garado barvalipe
44 O Isus vadži vaćarda: “O Carstvo e neboso si sar barvalipe garado ano polje. Kana o manuš arakhlja le, palem garada le thaj radosno džal thaj biknol sa so isi le te bi ćinola gova polje.”
O Isus vaćarol i paramič taro manuš e biserencar
45 O Isus vaćarda: “Vadži si o Carstvo e neboso sar trgovco savo rodol šukar bisera.
46 Pa kana aračhol jekh but kuč biseri, džal sa biknol so isi le thaj ćinol le.”
O Isus vaćarol i paramič tari mreža savasa dolen pe mačhe
47 O Isus vaćarda: “Vadži o Carstvo e neboso si sar mreža savi čhudol pe ano more thaj dolol tare sa e vrste mačhe.
48 Kana pherdol, ikalen i mreža upre pi obala thaj bešen. E lačhe mačhen save ikalde čhuven ane čare, a e bilačhen čhuden palal.
49 Gija ka avol ko krajo e svetoso. Ka ikljen e anđelura, ka crden e bilačhe manušen tare čačutne
50 thaj ka čhuden len ani jagali kubava. Gothe but ka roven thaj ka škripin dandencar.”
Nevo thaj purano barvalipe
51 Pučlja len o Isus: “Haljarden li sa kava?”
Vaćarde lese: “Va, Gospode.”
52 A vov vaćarda lenđe: “Golese svako učitelji taro Mojsijaso zakon savo avol sikado taro Carstvo e neboso, ka avol sar čherutno savo ikalda andari pi riznica o nevo thaj o purano barvalipe.”
E Isuse ni manđen ano Nazaret
(Mk 6,1–6; Lk 4,16–30)
53 Thaj kana o Isus vaćarda sa kala paramiča, đelo gothar.
54 Đelo ano than kaj barilo, sikada ani lenđi sinagoga a e manuša sesa but zadivime thaj vaćarde: “Kotar lese gasavo džanglipe thaj zuralipe?
55 Naj li kava e kaštunaleso čhavo? Naj li lesi dej i Marija thaj lese phrala o Jakov, o Josif, o Simon thaj o Juda?
56 Lese pheja naj li akate maškar amende? Kotar lese sa kava?”
57 Thaj golese ni prihvatisade le.
A o Isus vaćarda lenđe: “O proroko si bizo čast samo ano than kaj barilo thaj ano čher piro.”
58 Thaj ni ćerda but čudura gothe golese kaj sesa bipačavne.