Апостолонэндирэ рындоря
Пативалэ амала!
Тумэ ритярэн андэ васт лил, саво тердо андай дуй котора: «Радосаво Лав Лукастар» и «Апостолонэндирэ рындоря». Онэ лэдуй сас запистросардэ екхэ манушэса Лукаса, саво сас Исусоско сытярно. Онэ исин котор андай Библия, Дэвлэско Лав. Ежэи Библия терди андай дуй барэ котора «Пхурано Завето» и «Нэво Завето». Андо «Пхурано Завето» роспхэнэлпэ, сар ашыля пэ пхув жувимос, а кадя ж палав Израилёско народо, саво о Дэл вытидя важ Пэсти. Андо «Нэво Завето» запистросардо пала жувимос лэ Исусоско Христоско, ай кадя ж роспхэнэлпэ, сар ашыля кхандири тай сар вой розжыляпэ пай пхув.
Ежэно лав «Евангелия» пэрэандярэлпэ, сар «Радосаво Лав». Када лав пала кода, со дуй мия бэрш павпалэ андэ люма авиля Исусо Христосо, саво акхарэлпэ Фэрисаримари, пала кода со Вов жувэлас амэнца, састярэлас и сытярэлас манушэн, эртисарэлас лэнди бэзэха, муля пала всаворэ мануша и жундиля. А кадя ж пала кода, со Вов упалэ рисавэла андэ кадья люма. Евангелии ашыле андэ англуно вако амаря эра и сас пистросардэ пэ греческо шыб. Штар Евангелии, савэ пистросардэ Исусостирэ апостолонэнца (Матфеёса и Иоаноса) и апостолонэндирэ пашэ амалэнца (Лукаса и Маркоса), андо Нэво Завето тердён майанглал. Пала лэндэ жал лил «Апостолонэндирэ рындоря». Андэ латэ роспхэнэлпэ пала кода, сар Исусостирэ апостолоря розандярэнас Радосаво Лав Дэвлэско, а кадя ж пала кода, сар тховэнаспэ англунэ кхандиря. Кадя ж андо англуно вако ашыле лила Исусостирэ сытярнэндирэ и лил «Откровение». Всаворэ кала лила стидэ андэ екх лил, саво сас акхардо «Нэво Завето», андэ саво исин бишта ехта лила.
Пэ адесутно дес лила Нэвэ Заветостирэ, а фэдэр Евангелии, пэрэандярдэ пэ всаворэ шыба люматирэ, савэндэ исин пистросаримос. Библия исин майпхурано лил андай манушэндиро пистросаримос. Амэ патяс, со тумэ кадя ж пативаса прилэна кадья драго дума.
Амэ всаворэ водестар наисарас всаворэн, ко терэнас бути, кала кадва лил гытосарэнас важ публикацыя: пэрэандимаренди, редакторонэнди и бутэнди ромэнди, савэ шунэнас и бинэнас кадва лил, кала лэс гытонас. Баро наис тумэнди!
Тэ дэл о Дэл тумэнди бахт!
Пативаса тумэндэ,
Бутярнэ пай организацыя «Пэрэандимаря ла Библиятирэ андэ Украина».
1
Исусо ваздэлпэ по болыбэн
1 Пативало Феофило, андэ мэрно англуно лил мэ пистросардэм палай вся, со Исусо терэлас и состэ Вов сытярэлас,
2 жыкай кодва дес, кала припхэндя Свэнтонэ Духоса вытидэнди Лэса апостолонэнди, со трэбуй тэ терэн, и сас залино по болыбэн.
3 Кала Вов пэрэандярдя и грыжа, сикадяпэ лэнди жундэса и бут допхэнэлас, со када чячимос. И саранда дес сикавэласпэ лэнди и пхэнэлас палав Тхагаримос Дэвлэско.
4 Екхвар, кала онэ сас екхэтанэ, Вов припхэндя лэнди тэ на ашавэн Иерусалимо, нэ тэ ажутярэн кода, пала со дя лав о Дад.
— Пала када тумэ ашундэ Мандар.
5 Иоано болэлас паеса, ай кала прожана найбут деса, авэна болдэ Свэнтонэ Духоса.
6 Кола, савэ стидэпэ котэ, пушле Лэс:
— Рай, Ту со, стидэспэ тэ рисарэс андэ кадья вряма тхагаримос Израилёско?
7 Вов пхэндя лэнди:
— Най тумаро рындо тэ жанэн деса и вряма, савэ о Дад тховдя Пэстирэ зораса.
8 Нэ кала пэр тумэндэ сжала Свэнто Духо, тумэ прилэна зор и авэна Мэрнэ допхэнимаря андо Иерусалимо, пай всавори Иудея, Самария и кав дурутнэ тхана пай всавори пхув.
9 Вов пхэндя када, и англай лэндирэ якха сас вазгло упрэ, и облако гарадя Лэс.
10 Онэ дикхэнас по болыбэн, сар Вов ваздэласпэ. И акэ, андэ кодья вряма паша лэндэ авиле дуй мануша андэ парни йида.
11 И пхэндэ:
— Мурша галилеяноря! Со тумэ тэрдён и дикхэн упрэ? Кадва Исусо, Саво сас залино тумэндар по болыбэн, рисавэла кадя ж, сар тумэ дикхле Лэс, кала Вов ужалас.
Апостолоря вытидэн Матфеёс по тхан Иудаско
12 Тунчи онэ рисайле андо Иерусалимо пав плай, саво акхарэлпэ Оливково. Вов сас найдур форостар, по дром, саво домукэлпэ тэ прожал андо суботнё дес.
13 И сар онэ зажыле андо чер, вазглепэ андо тхан упрэ, кай онэ жувэнас андэ кодья вряма. Котэ сас Пэтро и Иоано, Иаково, Андреё, Филипо, Фома, Варфоломеё, Матфеё, Иаково, шаво Алфеёско и Симоно Зилото, тай Иуда, шаво Иаковоско.
14 Всаворэ онэ екхэтанэ мангэнаспэ Дэвлэс. Катэ сас коисавэ жувля и Мария, дэй Исусостири, и Лэстирэ пхрала.
15 Андэ кодья вряма Пэтро вщиля машкар пхрала пав патявимос и пхэндя (сас стидэ варикай шэл биш манушэн):
16 — Пхралалэ! Трэбуй сас тэ терэлпэ кода, со андэ Пистросаримос пхэндя Свэнто Духо Давидостирэ уштэнца палав Иуда. Вов сас пхурэдэр колэнго, савэ линэ Исусос.
17 Вов сас амэнца и терэлас апостолонэндири бути,
18 нэ приля замакхлэ ловэ и тиндя мал. Котэ вов пэля и кадя арэсляпэ, со лэстэ пхариля о пэр, и выпэле всаворэ лэстирэ пора.
19 И када ужангле всаворэ, ко жувэлас андо Иерусалимо, и акхардэ кадья мал пэ лэндири шыб Акелдама, со исин «Ратэстири мал».
20 Андэ лил Псалморя пистросардо:
«Мэк лэско чер авэла шушо,
тай тэ на жувэл котэ нико»
и
«Лэско тхан мэк залэл авэр».
21 Амэнди трэбуй тэ вытидас екхэс манушэс, саво сас машкар амэндэ всавори вряма, пав всаворэ тхана, кай пхирэлас Рай Исусо,
22 кола вряматар, кала лэс болэлас Иоано, жыкай кодва дес, кала Вов сас залино амэндар. Сар и амэнди, лэсти трэбуй сас тэ дикхэл, со Исусо жундиля мулэндар.
23 Онэ вытидэ дуен: Иосифос, саво акхарэлпэ Вар-Сава, и инке акхарэлпэ Иусто, и Матфеёс;
24 и манглепэ Дэвлэс тай пхэндэ:
— Ту, Рай, жанэс всаворэндирэ водя. Сикав андай кала дуй екхэс, савэс Ту вытидян
25 тэ прилэл кадай бути и апостолимос, саво ашавдя Иуда, кай тэ жал кордэ, каринг лэсти сас сындосардо.
26 Онэ шутэ жребиё, и вов выпэля лэ Матфеёсти, и кодва сас прилито кай дэшуекх апостолоря.