6
1 Wal God bin meigim mi mishanri blanga im, en mi wek mijamet garram im.
En ai dalim yumob. God bin brabli kainbala langa yumob. En blanga tharran na mi askimbat yumob nomo blanga slekbek en gibap.
2 Wal yumob jinggabat det wed langa oltestaman weya im tok, “Wen imbin taim blanga God blanga kain langa yumob, imbin irrim yumob. En wen imbin taim blanga im blanga seibum yumob, imbin album yumob.” Lagijat na im tok langa oltestaman.
En ai dalim yumob. Tudei na God wandi kain langa yumob. En tudei na im wandi seibum yumob.
Ola adtaim weya mishanri bin abum
3 Wal mi nomo oldei dum enijing blanga blokim det wei blanga enibodi weya im wandi bulurrum Jisas Krais, dumaji mi nomo wandim enibodi garra faindim folt langa det wek main.
4 En blanga tharran na mi oldei shoum ebribodi mi jidan wekinmen blanga God.
5 Yumob sabi? Pipul bin oldei fait langa mi en beldim mi en pudum mi langa jeil. En aibin oldei abum detmatj wek blanga dum en nomo naf taim blanga silip en nomo naf daga blanga dagat. Bat aibin oldei go thru langa ol detlot trabul gudwei. En tharran na shoum ola pipul mi wekinmen blanga God.
6-7 Wal ai nomo bin oldei dum nogudbala ting. Aibin oldei kain langa pipul. Nomeda detlot pipul nomo bin kain langa mi, bat stil aibin kain langa olabat, en aibin laigim olabat brabliwei. En ai sabi det wed blanga God trubalawei, en mi oldei tok trubalawei du, en mi garram det Holi Spirit, en mi garram det pawa blanga God. Ol detlot ting na shoum ola pipul mi wekinmen blanga God.
Wal ai nomo fait langa pipul. Ai fait langa Seitin. Bat ai nomo fait langa im garram naif en spiya. Ai fait langa im garram ol detlot ting weya God gibit langa mi.
Yumob sabi wanim mi toktok? Mi oldei jidan raitwei langa God, en God im oldei album mi. Lagijat na mi fait langa Seitin.
8 Yu si? Sambala pipul meigim mi haibala, en sambala pipul meigim mi lobala. Sambala pipul tok nogudbalawei blanga mi, en sambala pipul tok gudbalawei blanga mi. En nomeda sambala pipul reken mi laiyawan, bat stil mi oldei tok trubalawei.
9 En nomeda sambala pipul reken dei nomo sabi mi, bat stil ebribodi sabi mi. En nomeda aibin abum detmatj trabul weya bina meigim mi dai, bat stil mi jidan laibala. En nomeda pipul bin panishim mi detmatj, bat stil nobodi bin kilim mi ded.
10 En nomeda aibin oldei nogudbinji, bat stil aibin oldei gudbinji. En nomeda mi oldei jidan powan nomo garram eni mani, bat stil mi oldei meigim loda pipul jidan ritjwan langa det wei blanga God. En nomeda mi nomo garram enijing langa dijan wel, bat stil mi garram detmatj enijing weya God bin gibit mi.
11 Wal main fren olabat deya langa Korinth, aibin tok streidat langa yumob brom main hat.
12 Ai nomo bin jadimap main hat langa yumob. Bat yumob na bin jadimap yumob hat langa mi.
13 En mi dalim yumob jis laik yumob jidan main ronwan biginini olabat. Yumob garra abum det seimwan filing laik mi, en yumob garra opinim yumob hat langa mi.
Wi kaan miksimap gudbala en nogudbala
14 Wal yumob jinggabat na. Lait en dakbala kaan jidan seimtaim. En seimwei lagijat du yumob kaan go en miksimap miselp garram detlot pipul hu nomo laigim Jisas Krais, dumaji gudbala en nogudbala kaan jidan wanbala.
15 Yumob sabi? Jisas Krais en Seitin det brabliwan laiyinbala kaan jidan fren gija. En detlot pipul hu bilib langa Jisas Krais kaan abum seimwan main laik detlot pipul hu nomo bilib langa im.
16 En det seikridwan pleis blanga God kaan jidan garram detlot drimin.
Wal yumob jinggabat na. Wi na det seikridwan pleis blanga det laibalawan God, dumaji weya God jidan, tharran na det seikridwan pleis blanga im. En langa oltestaman im tok, “God im jidan garram im pipul olabat, en im jidan God blanga olabat, en olabat jidan pipul blanga im.”
17 En blanga tharran na God det Bos blanga wi bin tok wi garra gowei brom detlot pipul hu nomo blanga im pipul. Wi garra kadimat miselp brom olabat, en wi kaan joinin langa enijing weya nomo gudwan. En God bin tok im garra gudbinji langa wi,
18 en im garra jidan dedi blanga wi, en wi garra jidan san en doda blanga im.