14
Detlot pipul blanga YAWEI garra kambek langa olabat ronwan kantri
1 Wal aibin tok, “YAWEI det trubala God garra kain langa detlot Isreil pipul, en im garra pikimat olabat blanga jidan im ronwan pipul olabat igin. Im garra bringimbek olabat langa olabat ronwan kantri en najalot pipul garra joinap garram detlot Isreil pipul du.
2 Wal najalot pipul garra album detlot Isreil pipul blanga gobek langa olabat ronwan kantri dumaji YAWEI bin gibit det kantri langa detlot Isreil pipul. En ol detlot Isreil pipul garra jidan bos langa detlot pipul hubin oldei jidan bos langa olabat, en detlot pipul garra jidan laiga prisana en dumbat adwek.
3 “YAWEI garra larram yumob Isreil pipul jidan kwaitbala, dumaji yumob bin oldei jidan sedwan en abumbat detmatj pein en bin dumbat adwek olataim.
4 Afta na yumob garra meigimbat fan langa det king blanga Bebalon wen yumob singsingbat dijan song.
‘Det king, det brabli krulbala enimul, im binij na!
Im kaan kilim melabat enimo.
5 YAWEI bin binijimap det pawa blanga ol detlot nogudbala king.
6 Olabat bin oldei jidan brabli krulwan,
en nomo bin stap dumbat nogudbala ting langa ola pipul brom ebri kantri.
7 Ola pipul langa ebri kantri garra jidan brabli gudbalawei na.
Olabat garra brabli gudbinji en oldei singsingbat hepiwan song.
8 King blanga Bebalon, ol detlot saiprastri en sidatri blanga Lebanan brabli gudbinji,
dumaji nobodi kaan kadimdan olabat enimo.
9 ‘King blanga Bebalon, det pleis weya ola dedbala pipul oldei jidan,
im weidabat blanga yu gudbinjiwei.
Detlot spirit blanga detlot boswan hubin dai longtaim bin irrimbat yu kaminap.
10 En olabat garra tok, “Wal yu brabli wikwan du na, jis laik melabat.
11 Yu jidan iya langa dijan pleis blanga ola dedbala pipul,
en det praudbalawei blanga yu bin binij,
en ola myusik bin binij du.
Detlot wem garra jidan blanga yu bleingkit,
en detlot meggit garra jidan blanga yu sweig.”
12 ‘King blanga Bebalon, yubin jis laik det braitwan moningsta,
bat yubin buldan na brom skai langa dijan wel!
Yubin binijimap ola pipul brom najalot kantri,
en yu na bin binijap du.
13 Yubin tok miselp, “Ai garra gowap langa skai,
en ai garra meigim main pleis deya.
Ai garra jidan mowa haibala langa ol detlot sta,
en ai garra jidan garram detlot drimin weya jidan langa speshalwan hil langa nowathsaid.
14 Ai garra jidan mowa haibala langa detlot klaud, jis laik det brabli haibala God.”
15 Bat tudei na yu jidan deya andanith langa dijan wel garram ol detlot dedbala pipul.
16 En ola pipul hu luk yu jidan dedbala garra hatjamp en tok,
“Dijan na det men hubin meigim dijan wel sheiksheikbat,
en ola pipul langa ola kantri sheiksheikbat nomo lilbit, indit?
17 Im na bin gajim ola pipul brom ebri taun en deibin jidan prisana,
en im nomo bin larram olabat go fri en gobek langa olabat kantri en hom.
Im na bin meigim ola kantri jidan wulijim deset kantri.”
18 Wen eni king dai, dei oldei pudum im bodi langa brabli speshalwan greib.
19 Bat yu, dei kaan pudum yu bodi langa speshalwan greib.
Dei kaan berrim yu bodi.
Im garra jis leidan eniweya ontop langa graun,
en ola solja garra wokwok ontop langa yu jis laik breikinwan wadi,
en dei garra tjakam yu en ola solja bodi langa stoniwan hol.
20 Dei kaan gaburrumap yu langa det graun laik najalot king.
Yubin meigim yu kantri jidan rabishwan,
en yubin medrimbat yu ronwan pipul olabat.
Yu brabli krulbala enimul!
Dei nomo wandim sabi blanga yu femilimob enimo.
21 Dei garra kilim yu sanmob blanga peibek yu blanga yu brabli nogudbalawei.
Olabat kaan abum dijan kantri.
Olabat kaan bildimap eni taun eniweya iya langa dijan graun.
22 ‘YAWEI det boswan God bin meigim pramis blanga binijimap Bebalon en ebriwan hu jidan deya, wulijim nobodi kaan jinggabat blanga olabat enimo.
23 Im garra binijimap ola pipul jis laik det brum weya swipimwei ola rabish,
en det kantri garra jidan nogudwan garram loda woda,
en oni detlot wailwan enimul garra jidan deya.’ ”
YAWEI garra panishim Asiriya
24 Wal aibin kipgon tok, “YAWEI det boswan God bin meigim dijan pramis na, ‘Wal ebrijing garra hepin jis laik aibin tok.
25 Ai garra binijimap ol detlot Asiriya pipul hu oldei jidan langa main kantri, en ai garra bitsimap detlot pipul hu oldei gogobat langa main bigwan hil. En ai garra meigim main pipul jidan fri, en detlot Asiriya pipul kaan gibit adtaim langa main pipul olabat enimo.
26 Aibin meigim dijan plen na blanga ola kantri ebriweya, en oni mi na, det brabli boswan, en mi na garra panishim pipul langa ebri kantri.
27 Wal mi na YAWEI, det boswan God bin meigim dijan plen. Mi redibala na blanga dum wanim aibin tok. Nomo enibodi kaan stapam mi.’ Lagijat na YAWEI bin tok.”
YAWEI garra panishim detlot Filastain pipul
28 Wal aibin kipgon tok, “Langa det yiya wen King Eihes bin dai, YAWEI bin gibit mi dijan mesij na,
29 ‘Ol yumob Filastain pipul, yumob nomo jidan gudbinji dumaji det wadi bin breik na weya bin oldei panishimbat langa yumob. Det wadi na garra jidan wulijim jigiwan sneik, en afta im garra jidan wulijim det brabli poisinwan sneik.
30 Bat jis laik det stakmen oldei faindim brabli gudbala pleis blanga im ship, wal ai garra maindimbat ola po pipul en olabat garra jidan gudbalawei. Bat ai garra meigim sambala pipul jidan hanggriwan, en najalot pipul garra gitkil.
31 “ ‘Ol yumob Filastain pipul, yumob lafta kraikraibat langa detlot geit blanga yumob taun. Yumob jidan brabli bradin, dumaji ola solja jidan redibala na en dei kaminap laiga loda smok brom nowathwei.’ Lagijat na YAWEI bin tok.
32 “Wal if eni mesinja kaman brom Filastain, yumob garra tok, ‘YAWEI na bin bildimap Jerusalem. Nomeda im pipul olabat bin jidan brabli powan, olabat garra jidan seifwei deya na.’ ”