26
Job bin ensim Bilded
1 Wal Job bin tok langa Bilded,
2 “Wanim yubin du blanga album langa mi wen aibin brabli wikwan? Najing.
3 Yu reken ai nomo sabi det wei blanga God? En yu reken yubin tok langa mi gudwan wed, indit?
4 Hubin album yu blanga tok ol detlot wed?” Lagijat na Job bin tok.
5 Wal Bilded bin tok, “Wal yu jinggabat detlot dedwan pipul hu sheiksheikbat langa det pleis andanith langa det bigwan solwoda weya ola dedbala pipul oldei go.
6 Nomo enijing deya langa det kantri weya ola ded pipul jidan blanga blandim miselp brom God.
7 Im na bin pudum det skai deya langa top, en im na bin pudumdan dijan graun iya langa dijan emtiwan pleis.
8 God bin meigim det klaud jidan bulap garram woda, en dei kaan basbas.
9 En detlot klaud oldei gaburrumap det mun.
10 God bin pudum raunwan mak langa midul langa det solwoda blanga kadimat det dakbala brom det lait.
11 En God bin pudum detlot pol blanga holdimap det skai wulijim im kaan buldan. Wen imbin toktokbat, tharran meigim ebrijing sheiksheik nomo lilbit.
12 Garram im pawa en klebawanwei God bin meigim det bigbala solwoda jidan kwaitwan.
13 Garram im ronwan pawa imbin meigim det skai jidan brabli braitwan, en garram im ronwan bingga, imbin binijimap det brabli bigwan dregan weya oldei jidan insaid langa solwoda.
14 Dislot pawa, im jis laik God bin tok kwaitbalawei. Wal hu gin sabi im strongbala pawa?” Lagijat na Bilded bin tok.