3
Job bin nogudbinji blanga det dei wen imbin bon
1 Wal Job bin tok nogudbalawei blanga det dei wen imbin bon.
2-3 Imbin tok, “God, yu binijap det dei wen aibin bon, en det naitaim wen main dedi en mami bin meigim mi.
4 Yu fogedabat det dei en meigim im jidan dakbala.
5 Yu jandim brabli hebiwan klaud blanga meigim det dei jidan nogud en dakbala.
6 Yu binijap det naitaim en meigim im jidan brabli dakbala olagijawan, en yu nomo kaundimap det dei langa det yiya.
7 Nomo larram enibodi garra meigim beibi, en nomo larram enibodi jinginat gudbinjiwei langa det seimwan nait.
8 Larram detlot klebabalamen singim det dei en meigim im jidan nogudwan. En dei gin singim det brabli bigwan krokadail gulum Labaiyathan weya jidan langa det solwoda du.
9 En larram detlot moningsta jidan dakbala, en deigimwei detlot lait, en nomo larram det san gidap,
10 dumaji langa det dei na aibin bon langa dijan wel weya oldei gibitbat mi trabul.” Lagijat na Job bin tok.
Job bin askim wotfo im nomo bin dai wen imbin bon
11 Wal Job bin kipgon tok, “Wotfo ai nomo bin dai wen aibin bon?
12 Wotfo main mami bin nesimbat mi en gibitbat mi milk en larram mi jidan laibala?
13-15 If ai bina dai wen aibin bon, ai bina deya garram ol detlot king en ol detlot boswan wekinmen, hubin bildimbek olabat bigwan haus igin, en garram detlot boswan hubin jidan garram detmatj gol en detmatj silba. En ai nomo bina wori.
16 Wotfo ai nomo bin dai bifo aibin bon? If olabat bina berrim mi ai nomo bina lukinatbat langa det san tudei.
17 Langa det greibyad na ol detlot nogudbala men nomo meigim eni trabul en ol detlot hubin nokap olabat nomo wori na.
18-19 Ol detlot haibalawan en ritjwan pipul jidan deya, en ol detlot prisanamob, en ol detlot wekinmen hu jidan laiga prisana. Olabat ol jidan friwan na, nomo garram enibodi blanga meigim olabat dumbat adwek na.” Lagijat na Job bin tok.
Job bin askim God wotfo imbin larram im jidan laibala
20 Wal Job bin kipgon tok, “Wal wotfo God bin wandim pipul blanga jidan laibala langa dijan kantri garram loda trabul?
21 Dei oldei wandi gajimbat ola gudbala ting, bat wen dei abum trabul, dei jis wandi dai.
22 Nomo enijing kaan meigim olabat gudbinji. Olabat jis wandi dai, en go langa det greibyad weya olabat garra oldei jidan gudbinjiwei.
23 Wotfo mi kipgon jidanbat laibala wen God bin jadimap det roud blanga mi? Im nomo dalim mi wanim garra hepin langa mi. En ai kaan ranawei brom im.
24 Ai nomo bin dagat en dringgim enijing. Mi jis kraikraibat oldei.
25 Aibin brabli bradin blanga detlot nogudbala ting garra hepin langa mi basdam, en imbin lagijat na.
26 Mi nomo garram enijing blanga meigim mi gudbinji, en blanga meigim mi silip gudwei. Oni trabul en wori kaman langa mi.” Lagijat na Job bin tok.