39
YAWEI im sabi blanga ola enimul
1 Wal YAWEI det trubala God bin kipgon tok, “Yu sabi wotaim detlot nenigout en detlot enimul gulum diya garra abum beibi? Yubin deya wen ol detlot yangwan beibiwan bin bon?
2-3 Haulong detlot mamiwan garra jidan femiliwei bifo dei abum beibi?
4 Bambai na ola beibiwan garra gro strongbala, en olabat garra libum olabat mami, en gowei en jidan miselp.
5 Hubin dalim detlot wailwan dongki blanga go eniweya dei wandim go?
6 Oni mi na bin album olabat blanga jidan gudwei langa det soltiwan sengraun kantri.
7 Olabat jidan longwei brom det taun garram bigismob pipul, en nobodi kaan jingat langa olabat blanga meigim olabat dum adwek.
8 Olabat wokaran langa hil kantri en lukaranbat blanga gudwan kantri garram grinwan gras.
9 “Yu reken wailwan buligi garra wandim jidan langa yu fam en dumbat adwek blanga yu?
10 Yu reken yu gin fosim im blanga grajim det graun en dregim hebiwan wadi blanga meigim det graun lebulwan?
11 Nomeda im strongwan bat stil yu kaan trastim im blanga dum ola adwek blanga yu.
12 Yu reken yu gin trastim im blanga garrimap det sid daga, en deigimbat langa det pleis weya yu kipumbat ola sid daga?”
YAWEI bin meigim det ostrij, hos en igulok
13 Wal YAWEI bin kipgon tok, “Det bigwan bard gulum ostrij oldei jandap praudbalawei, bat im nomo dum tharran blanga shoum im laigim im lilwan beibi.
14 Im oldei libum detlot eig, en im larram det graun gaburrumapbat olabat blanga kipum wombala.
15 En im nomo wori if eni enimul pudumbut detlot eig en breigim olabat.
16 Det mamiwan bard tridim detlot eig jis laik olabat nomo blanga im. Im nomo jinggabat imbin dumbat wek blanga najing.
17 Mi na, bin meigim im medwan wulijim im kaan sabi matj.
18 Bat wen im stat ranranbat im gin laf langa det men hu raidimbat brabli faswan hos.
19 Yubin gibit detlot hosis det brabli strongbala pawa, en longwan heya langa olabat nek?
20 Yubin meigim detlot hosis blanga jamp jis laik grashopa, en blanga bradin ola pipul wen dei jinginatbat?
21 Bifo detlot hosis en solja go blanga fait langa wo, detlot hosis oldei grajim det graun brabli praudbalawei.
22 Olabat nomo bradin blanga ranran faswan en fait langa wo,
23 en ol detlot raida garrimap spiya en bigbala naif, en detlot ting meigimbat bigmob nois, en ol detlot ting shain nomo lilbit langa san.
24 Wen detlot solja blowimbat det longwan wisul, ol detlot hosis kaan jandap wan pleis, en olabat galapgalap nomo lilbit blanga go langa det wo.
25 Wen detlot hosis smelim det wo, olabat ran kwikbala en jinginat wen dei irrim det longwan wisul bloblobat.
26 “Wal yubin titjim detlot igulok blanga flaiflai sauthwei kolwethataim?
27-28 Yubin titjimbat det igulok blanga bildimap nes langa haibala stoniwan pleis,
29 weya olabat gin lukdan en faindim daga?
30 Wal im beibi olabat abum bigismob daga, weya det dedwan enimul jidan.”