9
Jisas bin dalim im wekinmen blanga dum wek
Methyu 10:5-15; Mak 6:7-13
1 Bambai na Jisas bin jingat langa det twelbala wekinmen blanga im, en imbin tok, “Ai gibit yumob pawa blanga andimwei nogudbala spirit en blanga meigim sikbala pipul gudbala.
2 En yumob garra go ebriweya na en dalimbat ola najalot pipul blanga bulurrum det nyubalawei blanga God.
3 En wen yumob go, yumob kaan deigim enijing garram yumob. Yumob kaan garrimap wokinstik o beig o daga o mani o speyawan klos.
4 En wen yumob kamat langa eni taun en dei welkam yumob, wal yumob garra jidan langa det wan haus raidap yumob gowei brom det taun.
5 En wen yumob kamat langa eni taun en dei nomo welkam yumob, wal yumob garra gowei brom det taun. Bat bifo yumob gowei, yumob garra sheikim ola das brom yumob fut blanga gibit olabat woning, dumaji God garra panishim olabat.” Lagijat na Jisas bin tok langa im wekinmen olabat.
6 Afta na detlot wekinmen bin gowei, en deibin go ebriweya langa ola lilwan taun, en deibin dalimbat ola pipul det gudnyus, en deibin meigimbat ola sikbala pipul gudbala.
Herod bin wandi luk Jisas
Methyu 14:1-12; Mak 6:14-29
7 Wal det nyus blanga Jisas bin spredat ebriweya, en det gabman bos blanga Gelali bin irrim ol detlot ting bin hepining ebriweya. Det gabman bos bin neim Herod, en im nomo bin sabi hu Jisas, dumaji sambala pipul bin tok, “Jon Beptis bin gidap laibala.”
8 En najalot pipul bin tok, “Nomo. Det speshalwan mesinja blanga God hubin jidan longtaim neim Ilaija bin kambek.” En najalot pipul bin tok, “Nomo. Najawan mesinja hubin wokaran iya longtaim bin gidap laibala.”
9 Wal Herod bin tok, “Aibin kilim Jon Beptis ded, dumaji aibin kadimof im hed. Bat hu dijan men? Aibin irrim im oldei dumbat olkain klebabala ting.” Lagijat na Herod bin tok. En imbin oldei wandi trai blanga luk Jisas.
Jisas bin fidim 5,000 men
Methyu 14:13-21; Mak 6:30-44; Jon 6:1-14
10 Bambai na wen detlot twelbala speshalwan mishanri blanga Jisas bin kambek langa im, deibin dalim im blanga ol detlot ting weya deibin dumbat, en afta imbin wandi go garram olabat langa det taun gulum Bethsaida.
11 Wal wen ola pipul bin irrim deibin wandi go langa det taun, deibin gajimap Jisas langa roud, en Jisas bin welkam detlot pipul, en imbin dalimbat olabat blanga det nyubalawei blanga God, en imbin meigim ola sikbala pipul gudbala.
12 Wal wen imbin gulijap sangodan, detlot wekinmen blanga Jisas bin kaman langa im, en deibin tok, “Dijan im leit na, en wi longwei brom taun. Wal yu lafta jandimwei detlot pipul na wulijim dei gin go langa detlot gulijapwan fam en lilwan taun blanga baiyim olabat daga en faindim rum blanga silip.”
13 Bat Jisas bin tok, “Yumob na gibit olabat daga.”
Wal detlot wekinmen bin tok, “Melabat garram oni faibala damba en dubala fish! Yu wandim melabat garra go en baiyim daga blanga ol dislot pipul iya?”
14 Lagijat na hatjampwei deibin tok langa Jisas, dumaji 5,000 men bin deya.
Wal Jisas bin dalim im wekinmen olabat blanga kadimatbat detlot pipul en meigim olabat jidan garram 50 pipul langa ebri grup,
15-16 en wen deibin jidan lagijat, Jisas bin gajim det faibala damba en det dubala fish, en imbin lukap langa top, en imbin gibit theingks langa God, en afta imbin breigim detlot daga, en imbin gibit langa im wekinmen olabat blanga gibitatbat langa detlot pipul.
17 Wal ebribodi bin dagat na, en deibin ol sedisfaid, en afta detlot wekinmen bin bilimap twelbala baskit garram ola leftobawan daga.
Pida bin tok Jisas Krais na det Masaiya
Methyu 16:13-19; Mak 8:27-29
18 Bambai na wandei wen Jisas bin preiprei miselp, im wekinmen olabat bin go langa im, en imbin askim olabat, “Hu ola pipul reken mi?”
19 Wal detlot wekinmen bin tok, “Sambala pipul reken yu Jon Beptis, en sambala pipul reken yu det speshalwan mesinja blanga God hubin jidan longtaim neim Ilaija, en sambala pipul reken yu najawan longtaimwan mesinja.”
20 Wal Jisas bin askim olabat, “Wal wotabat yumob? Hu yumob reken mi?”
En Pida bin tok, “Yu na Krais det Masaiya weya God bin jandim.”
Jisas bin tok im garra abum trabul en dai
Methyu 16:20-28; Mak 8:30—9:1
21 Wal Jisas bin dalim olabat nomo blanga dalimbat enibodi hu im,
22 en imbin tok, “Mi na det Speshalwan Men, en ai garra abum loda trabul, dumaji ola boswan olmen en ola haibala serramonimen en ola lowamen garra ol tjakidawei mi, en dei garra kilim mi ded. Bat thrideistaim ai garra gidap brom dedbala en jidan laibala.” Lagijat na Jisas bin tok langa im wekinmen olabat.
23 Afta na Jisas bin jingat langa detlot najalot pipul blanga kaman langa im en im wekinmen olabat, en wen deibin kaman langa im, imbin dalim olabat, “If enibodi wandi kaman langa mi, wal im kaan jinggabat im ronselp. Ebridei im garra jidan redi blanga dai blanga mi, en im garra bulurrum mi.
24 En if enibodi jinggabat blanga seibum im ron laif, wal wen im dai, im garra dai olagija. Bat if enibodi lujim im laif blanga mi, wal nomeda im dai, bat stil God garra meigim im jidan laibala.
25 “Wal im nogud blanga enibodi if im hipimapbat detmatj enijing blanga im ronselp iya langa dijan wel en im lujim im laif.
26 En if enibodi sheim blanga mi en det gudnyus main, wal ai garra sheim langa im du wen ai kambek garram det shainiwan lait main garram ola einjul garram detmatj pawa brom main Dedi.
27 “Trubala ai dalim yumob. Sambala yumob iya bifo yumob dai, yumob garra luk det pawa blanga God wen mi kambek blanga jidan bos brabli.” Lagijat na Jisas bin tok langa detlot pipul.
Ilaija en Mosis bin tok langa Jisas
Methyu 17:1-8; Mak 9:2-8
28 Brom deya nekswik Jisas bin deigim detlot thribala wekinmen blanga im neim Pida, Jon en Jeims, en deibin go ontop langa wan hil blanga prei.
29 Wal wen Jisas bin preiprei, im feis bin tjeinj, en det klos blanga im bin go brabli shainiwan en brabli waitwan,
30 en streidawei dubala men bin deya toktok garram im. Det dubala men bin neim Mosis en Ilaija,
31 en dubala bin luk brabli shainiwan, dumaji dubala bin kaman brom hebin, en dubala bin toktok garram Jisas blanga hau im garra dai langa Jerusalem, dumaji God bin meigim det plen blanga Jisas lagijat na.
32 Wal Pida en det naja dubala wekinmen bin silip, en wen deibin weikap, deibin luk Jisas bin jidan shainiwan, en deibin luk det naja dubala men jandapbat deya wansaid langa Jisas,
33 en afta wen det dubala men bin gowei brom Jisas, Pida bin tok, “Bos, gudwei yubin bringimap melabat iya. Wal melabat garra meigim thribala hampi. Wanbala blanga yu en wanbala blanga Mosis en wanbala blanga Ilaija.” Lagijat na Pida bin tok, bat im nomo bin sabi wanim imbin tok.
34 Wal wen Pida bin stil toktok, wanbala klaud bin kamat langa olabat deya, en det shedo bin gaburrumap olabat, en detlot thribala wekinmen bin bradin wen det klaud bin gaburrumap olabat,
35 en deibin irrim God tok brom det klaud, “Dijan main san. Aibin pikimat im, en yumob garra lisin langa im.”
36 Wal afta wen God bin binij toktok, detlot thribala wekinmen bin luk Jisas bin jandap miselp. En detlot thribala wekinmen bin jidan kwaitwan, en dei nomo bin dalim enibodi wanim deibin luk.
Jisas bin deigimat det nogudbala spirit brom insaid det lilboi
Methyu 17:14-18; Mak 9:14-27
37 Brom deya neksdei Jisas en detlot thribala wekinmen bin godan brom det hil, en loda pipul bin kaman langa Jisas.
38 Wal wan men hubin deya garram detlot pipul bin kaman langa Jisas, en imbin tok, “Titja, mi askim yu blanga luk main san. Im na main oni san.
39 En wanbala nogudbala spirit oldei grebum im, en im meigim im jingat en deigim fit, en im meigim spit kamat brom im mawus. Det nogudbala spirit oldei ardimbat im, en im kaan gowei brom im.
40 Aibin askim yu wekinmen olabat blanga andimwei det nogudbala spirit. Bat dei nomo bin abum det pawa blanga andimwei im.”
41 Wal wen det men bin tok lagijat, Jisas bin tok, “Wotfo yumob kaan bilib brabliwei? Haulong ai garra stap iya garram yumob? Haulong ai garra kipgon shoumbat yumob?”
En langa det men Jisas bin tok, “Yu bringimap yu san iya.”
42 Wal wen deibin bringimap det lilboi langa Jisas, det nogudbala spirit bin tjakam det lilboi langa graun, en imbin meigim im deigim fit.
Wal Jisas bin dalim det nogudbala spirit blanga gowei brom det lilboi, en det lilboi bin gudbala na, en Jisas bin gibitbek im langa im dedi,
43 en wen detlot pipul bin luk det pawa blanga God, deibin ol hatjamp brabliwei.
Jisas bin titjimbat im wekinmen olabat
Methyu 17:22,23; Mak 9:30-32
44 Afta na wen detlot pipul bin stil jinggabat wanim Jisas bin dumbat, imbin tok langa im wekinmen olabat, “Yumob jinggabat dijan wed na. Mi na det Speshalwan Men, en dei garra gibit mi langa detlot men hu garra kilim mi ded.”
45 Wal detlot wekinmen nomo bin sabi wanim Jisas bin tokinabat, dumaji God bin blandim det wed brom olabat, en deibin bradin blanga askim Jisas blanga dalim olabat wanim imbin tok.
Wujan im mowa haibala langa melabat
Methyu 18:1-5; Mak 9:33-37
46 Afta na detlot wekinmen bin stat agamin gija, en deibin askimbat miselp, “Wujan im mowa haibala langa melabat?”
47 Wal Jisas bin sabi wanim olabat bin jinggabat, en imbin gajim wanbala lilwan biginini, en imbin meigim im jandap wansaid langa im,
48 en imbin tok, “If yu album lilwan biginini dumaji yu laigim mi, wal im jis laik yu album mi. En if yu album mi, wal yu album main Dedi hubin jandim mi du. If yu wandim jidan haibala, wal yu garra meigim miselp lobala.” Lagijat na Jisas bin tok.
49 Wal Jon bin tok langa Jisas na, “Bos, melabat bin luk wan men bin andimwei dibuldibul, en imbin yusumbat yu neim. En melabat bin dalim im blanga stap, dumaji im nomo wekinmen blanga yu laik melabat.”
50 Wal Jisas bin dalim olabat, “Yumob nomo wandi stapam im, dumaji if enibodi nomo tok nogudbalawei blanga mi, wal im langa wi said.”
Sambala pipul nomo bin wandim Jisas
51 Bambai na wen imbin gulijap taim blanga God garra deigimbek Jisas langa hebin, Jisas bin jinggabat blanga go langa Jerusalem,
52 en imbin jandim sambala wekinmen lida langa im langa wan lilwan taun deya langa det kantri gulum Sameriya blanga meigim ebrijing redi blanga im.
53 Bat detlot pipul langa det taun nomo bin wandim Jisas blanga jidan deya, dumaji deibin sabi imbin wandi go langa Jerusalem.
54 Wal wen det dubala wekinmen blanga Jisas neim Jeims en Jon bin luk detlot pipul nomo bin wandim Jisas blanga jidan deya, dubala bin askim im, “Bos, yu wandim minbala garra jingat blanga meigim faiya kamdan brom hebin en barnimap dislot pipul?”
55 Wal Jisas bin lukaran langa det dubala wekinmen, en imbin graul langa dubala,
56 en afta im en im wekinmen olabat bin gowei langa najawan taun.
Detlot pipul hu wandi bulurrum Jisas
Methyu 8:19-22
57 Wal wen Jisas en im wekinmen olabat bin wokwok langa roud, wan men bin tok langa Jisas, “Ai garra bulurrum yu ebriweya yu go.”
58 Wal Jisas bin dalim im, “Detlot wail dog gulum foks garram hol weya dei oldei silip. En ola bard garram olabat nes weya dei oldei silip du. Bat mi det Speshalwan Men, en ai nomo garram eniweya blanga silip en abum spel.”
59 Wal langa najawan men Jisas bin tok, “Yu bulurrum mi.”
En det men bin tok, “Bos, yu larram mi gobek basdam en lukaftum main dedi raidap im dai en ai berrim im.”
60 Wal Jisas bin dalim im, “Yu larram ol detlot pipul hu kaan bulurrum mi lukaftum det olmen, en yu go en dalimbat ola pipul blanga det nyubalawei blanga God.”
61 Afta na najawan men bin tok langa Jisas, “Bos, ai garra bulurrum yu. Bat yu larram mi gobek en askim main femili basdam.”
62 Wal Jisas bin dalim im, “If enibodi wandi wek blanga God, en im kipgon jinggabat enikain ting, wal God kaan yusum im blanga dumbat im wek.”