94
God im jadjim ebribodi
1 YAWEI, yu det God hu oldei panishim ol detlot jigiwan bos.
Yu gitwail en panishim olabat na.
2 Yu na oldei jadjimbat melabat holot.
Yu gidap en panishim detlot praudbala pipul.
3 Haulong detlot nogudbala pipul garra jidanabat gudbinjiwei?
Haulong mowa YAWEI?
4 Haulong detlot pipul hu dumbat nogudbala ting garra kipgon laigimbat miselp en jidanbat praudbalawei wen dei dumbat detlot nogudbala ting?
5 Dei jidan jigiwan bos en meigim yu pipul olabat adwek brabliwei, YAWEI.
Dei ardimbat yu pipul olabat.
6 Dei kilim ded ola widogel en detlot biginini hu nomo garram mami en dedi.
En dei medrim pipul hubin kaman brom najawan kantri blanga jidan langa wi kantri.
7 En dei tok, “YAWEI nomo luk wi. Det God blanga Isreil nomo sabi wanim wi dumbat.”
8 Main pipul olabat, yumob brabli siliwan pipul.
Wotaim yumob garra len?
9 God bin meigim wi irriwol, bat yumob reken God kaan irrim yumob!
Imbin meigim wi ai, bat yumob reken im kaan luk langa yumob!
10 Im graulim ola pipul langa najalot kantri, bat yumob reken im kaan panishim ola wikitwan bos blanga wi!
Im na titja blanga wi holot, bat yumob reken im nomo sabi enijing!
11 YAWEI sabi wanim detlot pipul jinggabat,
en im sabi detlot ting nomo garram eni pawa.
12 YAWEI, ol detlot pipul hu irrim yu en weya yubin titjimbat olabat ol yu lowa garra jidan gudbinjiwei.
13 Yu larram ol detlot hu irrim yu abum spel brom ola trabul raidap det taim weya yu redi blanga binijimap detlot nogudbala pipul.
14 YAWEI kaan neba gibit bekboun langa im pipul olabat.
Im kaan neba libum ol im pipul olabat.
15 Langa ola kothaus ebribodi garra abum feyago igin,
en ola pipul hu dumbat ola rait ting garra bekimap tharran.
16 Hubin jandap blanga mi langa ola nogudbala pipul?
Hubin bekimap mi brom ola brabli wikitwan pipul?
17 If YAWEI nomo bin album mi, ai bina godan langa det pleis weya ola dedbala pipul oldei go.
18 Aibin tok, “Mi buldan”,
bat det filing blanga yu weya yu laigimbat pipul olataim bin lidimap mi.
19 Wen mi hatjamp en wori,
yu lidimap mi en meigim mi gudbinji.
20 Yu nomo laigim ola nogudbala jadj hu oldei gibit adtaim langa pipul.
Dei nomo jadjim pipul raitwei garram ol yu lowa.
21 Dei meigim plen blanga ardimbat ola gudbala pipul,
en kilimbat ded ola pipul hu nomo bin dum enijing rong.
22 Bat YAWEI maindimbat mi, jis laiga seifwan haus.
Main God lukaftumbat mi jis laik wen mi blandim miselp langa bigwan ston.
23 Im garra panishim olabat blanga ola brabli nogudbala ting deibin dumbat en im garra binijimap olabat brabliwei.
YAWEI det trubala God blanga wi garra binijimap olabat.