5
Susura neneluluꞌ mana segel matesꞌ
1 Basa ma au ita baliꞌ manaendoꞌ sia kadꞌera parendaꞌ naa. Ana toꞌu susura neneluluꞌ saa sia lima onan. Lululuꞌ naa nenesuraꞌ sofeꞌ dꞌeaꞌ-mataꞌ ma nenesegel mates sia mamanaꞌ hitu.
2 Basa ma au ita ate sa mia sorga manaseliꞌ tebꞌe. Ana natane nahereꞌ nae, “Seka naꞌena hak sefi segel ma baca susura naa?”
3 Natane taꞌo naa, te nda hambu esa naꞌena hak sefi susura naa, ma baca isin sa. Mae sia sorga do raefafoꞌ, nda hambu esa naꞌena hak sa. Sia atahori mates ra mamanan o nda hambu sa boe.
4 Ita taꞌo naa, ma au nggae ei-ei, huu nda hambu atahori esa naꞌena hak sefi, ma baca isin sa.
5 Basa ma esa mia malangga ka 24 ra, olaꞌ no au nae, “We, toronooꞌ! Afiꞌ nggae. Huu mane Daud a tititi-nonosin esa manaseliꞌ, ara roꞌe E rae, singa mia leo Yahuda. Ana mbesiꞌ nalutu basa deꞌulakaꞌ ra ena. De naꞌena hak sefi segel a, ma baca susura naa isin.”
6 Rena taꞌo naa ma, au ita Lombo Anaꞌ esa ririi sia banda kahaa manaseliꞌ ra ro malangga ka 24 mana endoꞌ rereoꞌ kadꞌera parendaꞌ a, taladꞌa nara. Lombo Anaꞌ a, onaꞌ parna nenembauꞌ ena. Suran hitu ma matan o hitu boe. Mata deke kahitu nara, onaꞌ Dula-dalen mana naꞌena mata-aoꞌ hitu a boe. Lombo Anaꞌ a haitua see ndule basa raefafoꞌ ena.
7 Basa ma au ita Lombo Anaꞌ a nisiꞌ Mana endoꞌ sia kadꞌera parendaꞌ a, de haꞌi susura neneluluꞌ naa mia Lima onan.
8 Leleꞌ Lombo Anaꞌ a haꞌi susura ma, banda kahaa manaseliꞌ ra, ro malangga ka 24 ra, sendeꞌ lululangga nara beꞌutee sia matan. Ara esa-esaꞌ toꞌu maliiꞌ ra onaꞌ sasando, no manggo liloꞌ esa, neneisiꞌ no kemenyan fo rae dede tao masu maꞌameniꞌ. Hau raa maꞌameniꞌ naa, naeni Lamatualain atahori nara hule-oꞌe nara.
9 Basa ma basa see sodꞌa sosodꞌa feuꞌ sa, oi:
“Lombo Anaꞌ ia, nandaa simbo susura ia.
Lombo Anaꞌ ia, naꞌena hak sefi segel a.
Huu Ana nenetatiꞌ daiꞌ ena.
basa ma Lamatualain pake raa Na,
fo soi-tefa neu basa atahori mia basa leo ma nusaꞌ ra,
fo ruma bisa dadꞌi Lamatualain atahorin.
No taꞌo naa, atahori mia basa dedꞌeat ma negara,
bisa dadꞌi Lamatualain bobꞌonggin.
10 Lombo Anaꞌ ia, naꞌabꞌue nala basa se,
dadꞌi nusaꞌ esa.
Lombo Anaꞌ ia, tengga nala se,
dadꞌi Lamatualain atahori mana tao-ues nara.
Dei fo ara toꞌu parendaꞌ sia raefafoꞌ.
Dei fo ara tao-ues fee Lamatualain sia raefafoꞌ.”
11 Basa ma, au botiꞌ mata ngga, ma rena hara monaeꞌ sa. Ma ita banda kahaa manaseliꞌ ra, ro malangga ka 24 ra, ma Lamatuaꞌ ate nara hetar mia sorga. Ate naa ra, naen seli, losa juta-juta.
12 Basa se sodꞌa rahereꞌ oi,
“Hai soꞌu minanaru Lombo Anaꞌ mana nenetati-daiꞌ naa,
Huu Eni mana nandaa simbo hai koa-kio ma!
Eni koasan, monaen seli.
Eni suꞌi na, naen seli.
Eni dudꞌuꞌan, tandeꞌ.
Maꞌaderen, manaseliꞌ tebꞌe.
Hai soꞌu minanaru naran.
Hai fee hadꞌa-hormat neu E.
Hai koa-kio E.”
13 Basa na ma, au rena sosodꞌat esa fai. Mia basa masodꞌaꞌ ra, mae sia sorga, raefafoꞌ, ma tasiꞌ rala, basa se soꞌu hara nara fo sodꞌa-helo. Mia atahori mates mamana nara o, ara sodꞌa-helo tungga. Basa se sodꞌa-helo rae,
“Hai koa-kio Lamatualain manaendoꞌ sia kadꞌera parendaꞌ ia.
Hai o soꞌu minanaru Lombo Anaꞌ ia.
Hai fee hadꞌa-hormat neu Se.
Hai beꞌutee neu Se.
Huu Sira toꞌu parendaꞌ rakandooꞌ a!
Ma Sira koasan nda manabasaꞌ sa!”
14 Basa ma, banda kahaaꞌ manaseliꞌ naa ra, rataa rakandondoꞌ a rae, “Naa tebꞌe! Naa tebꞌe ena!” Boe ma malangga karua nulu haaꞌ naa ra sendeꞌ lululangga nara fai de beꞌutee neu Lamatualain no Lombo Anaꞌ naa.