Bbaruha hali
Bahebburaniya
Kwanjuura
Mu̱handi̱i̱ki̱ wa Bbaruha gya Bahebburaniya gigi yeegebeerwe kwahi. Bantu bandi bateekereza Apolo yooyo munyakugihandiika, bandi nibateekereza Bbaranaba, bandi nibateekereza bantu bandi, kasi bandi bo, nibateekereza nti Pau̱lo, mukwenda wa Yesu̱ Ku̱ri̱si̱to, yooyo munyakugihandiika. Bbaruha gigi baagi̱handi̱i̱ki̱i̱ri̱ mu Rooma (13:24) baagitwala mu bitebe bya beikiriza bikwahukana. Tihaloho muntu yenseenya yeegi̱ri̱ kasu̱mi̱ koonyi̱ni̱ kagyahandi̱i̱ki̱i̱ri̱mwo, bei̱tu̱ kiteekerezeb̯wa nti gyahandi̱i̱ki̱i̱rwe, mu rub̯uga lwa Yeru̱salemu̱ batakabbeeri̱ ku̱lu̱zi̱kya mu mwaka gwa 70 Yesu̱ amaari̱ kubyalwa, hab̯wakubba mu bbaruha gigi heicalamwona bintu bya kuhonga bihongwa mu Yeekaru, Nnyu̱mba gya Ruhanga (9:8-9).
Mu bbaruha gigi heicalamwo bicweka bikukira ha 60 bijuliza Kiragaanu Kikadei. Kiki kyolokeerya ki̱mwei̱ nti Yesu̱ yaadoosereerye mulimo gwa b̯u̱ragu̱ri̱ na gwa Mu̱laami̱ Mu̱handu̱. Bbaruha gigi de, gyolokya nti Yesu̱ yaadoosereerye biragiro, aleke balaami̱ ba Ruhanga batei̱ra kuhonga bihongwa murundi gundi. Yesu̱ yeeheeri̱yo kubba kihongwa kya bibii byenseenya kya murundi gu̱mwei̱ yaamala (10:10). Mu kulamba kwamwe kwa kumaliira bbaruha gigi, mu̱handi̱i̱ki̱ akwekambi̱sya bantu, “Tu̱te mitima myetu̱ hali Yesu̱ Ku̱ri̱si̱to, yogwo mu̱nyaku̱tandi̱ki̱sya kandi yaahandya kwikiriza kwetu̱.” (12:2).
Bicweka Bi̱handu̱ bya mu Bbaruha gigi nka Ku̱bi̱honderegeeni̱
(i) Mu̱handi̱i̱ki̱ ni̱yoolokya nti Yesu̱ akira baragu̱ri̱ na bamalayika mu ki̱ti̱i̱ni̱sa 1:1—4:13
(ii) Mu̱handi̱i̱ki̱ ni̱yoolokya nti Yesu̱ akira balaami̱ ba mu Yeekaru mu ki̱ti̱i̱ni̱sa 4:14—7:28
(iii) Mu̱handi̱i̱ki̱ ni̱yoolokya nti b̯uheereza b̯wa Yesu̱ b̯ukira b̯u̱b̯wo b̯wa mu kiragaanu kikadei b̯wa Ruhanga b̯u̱yaakoori̱ na bantu baamwe, kuraba mu biragiro byamwe bi̱yaaheeri̱ Musa. 8:1—10:31
(iv) Mu̱handi̱i̱ki̱ naalamba bantu mu bintu bibarabamwo b̯ukyeb̯ukye 10:32—13:7
(v) Bigambu bya kwekambi̱sya na kumaliira bbaruha 13:18-25
1
Ruhanga Naabazira mu Mwana Waamwe
1 Mu biro bya kadei, Ruhanga yaabazengi̱ na bahaaha beetu̱, mirundi minene kandi mikwahukana, kuraba mu baragu̱ri̱ baamwe.
2 Bei̱tu̱ hataati̱, mu biro bibi bya kumaliira, abazira mu Mwana waamwe Yesu̱, gi̱yaarabi̱ri̱mwo kuhanga bintu byensei̱, kandi de gi̱yaateeri̱ho kubba mukama wa bi̱byo bintu byensei̱.
3 Mwana yogwo, yo kubba na ki̱ti̱i̱ni̱sa kinene hoi̱, kyolokya Ruhanga nka kwali na ki̱ti̱i̱ni̱sa kinene hoi̱. Yogwo Mwana, yoolokya ki̱si̱sani̱ kyonyi̱ni̱ kya b̯waruhanga. Kandi de, yooyo eicalyaho nsi neiguru, naakoresya kigambu kyamwe kya b̯u̱sobozi̱. B̯u̱yaamaari̱ kikorwa kya kunaabyaho bibii, yeicaara mu kiikaru kya ki̱ti̱i̱ni̱sa kinene hoi̱ kulema na Ruhanga mwiguru.
4 Nahab̯waki̱kyo, yogwo Mwana, akiira ki̱mwei̱ bamalayika mu ki̱ti̱i̱ni̱sa, nkeibara li̱baamweti̱ri̱ kulikira mabara ga bamalayika ki̱ti̱i̱ni̱sa.
Mwana wa Ruhanga Akira Bamalayika Ki̱ti̱i̱ni̱sa
5 Malayika kyani, wa Ruhanga giyaakaweeranga bibi bigambu bi̱yaaweereeri̱ Mwana waamwe:
“Oli Mwana wange;
Kyadeeru nfooki̱ri̱ Bbaawu?”
Rundi malayika kyani, wa Ruhanga gi̱yaabazi̱ri̱ho yati:
“Gya ndibba Bbaawe,
nayo alibba Mwana wange?”
6 Kandi Ruhanga b̯u̱yaaleeti̱ri̱ mu̱zegei̱zo waamwe mu nsi, yaakobi̱ri̱ yati:
“Bamalayika, batumwa bange bensei̱, baramyenge yogwo mwana.”
7 Naakubaza ku bamalayika, Ruhanga yaakobi̱ri̱ nti,
“ahindula bamalayika naabafoora mpehu,
kandi naafoora baheereza baamwe ndimi za mworo.”
8 Bei̱tu̱ ku Mwana, Ruhanga akoba yati:
“Ee Ruhanga, kitebe kyamu kiliicalaho biro na biro,
b̯ukama b̯wamu ob̯ulemenge na b̯winganiza.
9 Wendya kukora bintu bya b̯winganiza, noonoba kukora bintu bibiibi;
kyokyo gya Ruhanga waamu, nyaaku̱teeri̱ kubba hakyendi̱ wa bei̱ra baamu,
nyaakuha ki̱ti̱i̱ni̱sa, kikukuleetera kusemererwa.”
10 Kandi de, Ruhanga aweera Mwana yati:
“Mu kubanza, Mukama waahangi̱ri̱ iguru
waahanga na nsi.
11 Bi̱byo bi̱waahangi̱ri̱ bilimalikaho, bei̱tu̱ we, olisigalaho,
byensei̱ bi̱li̱gu̱lu̱u̱sa nka kilwalu.
12 Oli̱bi̱zi̱nga mwa kubitoolaho, nka muntu kwazi̱nga kyakulwala,
kandi bilihindulwa nka muntu kwahindula naatoolamwo kilwalu ki̱gu̱lu̱u̱su̱, naalwala kilwalu kihyaka.
Bei̱tu̱ we, tohinduka,
kandi, olyomeera biro na biro.”
13 Malayika kyani, wa Ruhanga giyaakaweeranga:
“Icaara ha mukono gwange gwa b̯udyo
ku̱doosya b̯undifoora banyanzigwa baamu
katebe ka magulu gaamu.”
14 Hati̱ nu, Bamalayika boobo banaani? Bamalayika, bali myozo mya Ruhanga myatuma kuheereza bab̯wo ba Ruhanga baakwi̱za kujuna.