Makuru Garungi Gakukwatagana na Yesu̱ Ku̱ri̱si̱to nka Ku̱gaahandi̱i̱ki̱i̱rwe
Matayo
Kwanjuura
Kitabbu kya Makuru Garungi Gakukwatagana na Yesu̱ Ku̱ri̱si̱to nka Ku̱gaahandi̱i̱ki̱i̱rwe Matayo kili ki̱mwei̱ ha bitabbu binei bya Kiragaanu Kihyaka, bi̱byo bibaza ha Makuru Garungi gakukwatagana na b̯womi b̯wa Yesu̱ Ku̱ri̱si̱to. Bitabbu bindi byobyo: Mari̱ko, Lu̱u̱ka na Yohaana.
Kitabbu kiki kyahandi̱i̱ki̱i̱rwe Matayo, munyakubba de yeegebeerwe nka Leevi̱. Matayo yogwo yaalingi omwei̱ ha bakwenda i̱ku̱mi̱ na babiri ba Yesu̱. Ateekerezeb̯wa kubba yaaki̱handi̱i̱ki̱ri̱ harabi̱ri̱ho myaka nka nkaaga Yesu̱ amaari̱ kubyalwa. Yaaki̱handi̱i̱ki̱i̱ri̱ Bayudaaya, naagyendeera kwolokya nti Yesu̱ yooyo Ku̱ri̱si̱to, Mutongoole wa Ruhanga, Ruhanga gi̱yaakomi̱ri̱ kubba mu̱ju̱ni̱, kandi baragu̱ri̱ ba Ruhanga gi̱baaragu̱rengi̱ho. Mu kitabbu kiki, Matayo yaahandi̱i̱ki̱ri̱ bintu binene bikukwatagana na b̯ukama b̯wa Ruhanga. Bayudaaya baalingi na kyeni̱hi̱zo, nibakuteekereza nti Ku̱ri̱si̱to b̯wali̱i̱za, alibba mukama wa b̯ukama b̯wa mu nsi gigi. Mu kitabbu kiki, Matayo yaasoboleeri̱ bintu binene bikukwatagana na b̯ukama b̯wa Ruhanga b̯wa mwozo, mwa kugaana nteekereza gi̱gyo gibaalingi nagyo.
Kitabbu kiki kijuliza hoi̱ Kiragaanu Kikadei. Nahab̯waki̱kyo kyadoori̱-b̯u̱dwi̱ kubba kitabbu kyakubanza mu Kiragaanu Kihyaka, hab̯wakubba kikiteeraniza kurungi ku Kiragaanu Kikadei.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
Kubyalwa kwa Yesu̱ Ku̱ri̱si̱to na ntandiko gya b̯uheereza b̯wamwe 1—4
B̯uheereza b̯wa Yesu̱ na bintu bikukira b̯unene bi̱yeegeseerye 5—25
Lulengu lwa hakyendi̱ lwa b̯uheereza b̯wa Yesu̱ nib̯uzookera mu ku̱kwa na kuhimbooka kwamwe 26—28
1
B̯ubyalwa b̯wa Yesu̱
(Lu̱u̱ka 3:23-28)
1 B̯ubyalwa b̯wa Yesu̱ Ku̱ri̱si̱to, wa mulula lwa Mukama Dau̱di̱, kandi wa mulula lwʼI̱bbu̱rahi̱mu̱, b̯walingi yati:
2 I̱bbu̱rahi̱mu̱ yaabyeri̱ I̱saka,
I̱saka yaabyala Yakobbo,
Yakobbo yaabyala Yu̱da na bei̱ra baamwe.
3 Yu̱da yaabyeri̱ Pereezi̱ na Zeera, maawaab̯u naali Tamali̱,
Pereezi̱ yaabyala Hezi̱rooni̱,
Hezi̱rooni̱ yaabyala Ramu.
4 Ramu yaabyeri̱ Aminadaabbu,
Aminadaabbu yaabyala Nahasooni̱,
Nahasooni̱ yaabyala Salu̱mooni̱.
5 Salu̱mooni̱ yaabyeri̱ Bbowaazi, maa yogo Bbowaazi naali Rahabbu̱,
Bbowaazi yaabyeri̱ Obbeedi̱, maa Obbeedi̱ naali Ru̱u̱si̱,
Obbeedi̱ yaabyeri̱ Yese,
6 Yese yaabyala Dau̱di̱, mukama.
Dau̱di̱ yaabyeri̱ Sulumaani, na yogwo mu̱kali̱ munyakubba muka U̱ri̱ya.
7 Sulumaani yaabyala Rehobbowaamu,
Rehobbowaamu yaabyala Abbi̱ya,
Abbi̱ya yaabyala Asa.
8 Asa yaabyeri̱ Yehosafaati,
Yehosafaati yaabyala Yolaamu,
Yolaamu yaabyala U̱zi̱ya.
9 U̱zi̱ya yaabyeri̱ Yosaamu,
Yosaamu yaabyala Ahaazi̱,
Ahaazi̱ yaabyala Heezeki̱ya.
10 Heezeki̱ya yaabyeri̱ Manaase,
Manaase yaabyala Amoni̱,
Amoni̱ yaabyala Yosi̱ya.
11 Yosi̱ya yaabyeri̱ Yekoni̱ya na bei̱ra baamwe, mu biro bi̱baanyagi̱i̱rwemwo kutwalwa Bbabbu̱looni̱.
12 B̯u̱baamaari̱ kutwalwa Bbabbu̱looni̱,
Yekoni̱ya yaabyeri̱ Salatyeri̱,
Salatyeri̱ yaabyala Zeru̱bbabbeeri̱.
13 Zeru̱bbabbeeri̱ yaabyeri̱ Abbi̱yu̱u̱di̱,
Abbi̱yu̱u̱di̱ yaabyala Eri̱yaki̱mu̱,
Eri̱yaki̱mu̱ yaabyala Azoori̱.
14 Azoori̱ yaabyeri̱ Zadoki̱,
Zadoki̱ yaabyala Aki̱i̱mu̱,
Aki̱i̱mu̱ yaabyala Eli̱yu̱di̱.
15 Eli̱yu̱di̱ yaabyeri̱ Eryeza,
Eryeza yaabyala Mataani̱,
Mataani̱ yaabyala Yakobbo.
16 Yakobbo yogwo, yooyo munyakubyala Yozefu̱ i̱ba Mali̱ya, Mali̱ya munyakubyala Yesu̱, Yesu̱ yogwo yeetwa Ku̱ri̱si̱to.
17 Nahab̯waki̱kyo kuruga hali I̱bbu̱rahi̱mu̱ kudwa hali Mukama Dau̱di̱, haalingiho mi̱hi̱hi̱ mya beizukulu i̱ku̱mi̱ na minei; na kuruga hali Mukama Dau̱di̱ kudwa ha Banyei̱saleeri̱ kutwalwa Bbabbu̱looni̱, nahoodede haalingiho mi̱hi̱hi̱ i̱ku̱mi̱ na minei. Kandi de, na kuruga ha kutwalwa Bbabbu̱looni̱ kudwa ha kubyalwa kwa Ku̱ri̱si̱to, naho haalingiho mi̱hi̱hi̱ i̱ku̱mi̱ na minei.
Kubyalwa kwa Yesu̱ Ku̱ri̱si̱to
(Lu̱u̱ka 2:1-7)
18 Bigambu bya kubyalwa kwa Yesu̱ Ku̱ri̱si̱to byalingi yati: Maawe Mali̱ya, b̯uyaali atakamu̱byeri̱, naali ali̱ndi̱ri̱i̱ri̱ kugab̯uka wu Yozefu̱, kandi b̯u̱b̯wo de, atakawonangaho ku mudulu, kyazooki̱ri̱ nti yaalingi naali na nda hab̯wa Mwozo Mu̱syanu̱.
19 Hab̯wakubba Yozefu̱, munyakubba naakugyenda kumugab̯ura, yaali mudulu akubalwa kubba naaku̱si̱i̱mwa mu mei̱so ga Ruhanga, yaacwi̱ri̱mwo kuleka Mali̱ya mu ki̱cei̱cei̱, mwa b̯utahemura Mali̱ya.
20 B̯uyaali naacaateekereza bi̱byo, malayika wa Mukama Ruhanga yaamu̱wonekeeri̱ mu kilooto naakoba, “Yozefu̱, mwizukulu wa Dau̱di̱, otati̱i̱na kugab̯ura Mali̱ya kubba mu̱kali̱ waamu, hab̯wakubba nda gyali nagyo, gili hab̯wa Mwozo Mu̱syanu̱.
21 Alibyala mwana wa b̯udulu, kandi olina kumweta ibara Yesu̱, hab̯wakubba yooyo alijuna bantu baamwe kifubiro kya bibii byab̯u.”
22 B̯u̱b̯wo nu, bi̱byo byensei̱ byabbeeri̱ho, aleke bi̱doosereerye bigambu bya Mukama bi̱yaakobi̱ri̱ kuraba mu mu̱ragu̱ri̱ waamwe nti:
23 “Muhala atakawonangaho ku mudulu alibba na nda, abyale mwana wa b̯udulu, kandi balimweta ibara Manweri̱.” Makuru gaalyo: “Ruhanga ali natwe.”
24 Yozefu̱ b̯u̱yaasi̱si̱mu̱ki̱ri̱, yaakora kya malayika wa Mukama Ruhanga ki̱yaamu̱weereeri̱ kukora, yaagab̯ura Mali̱ya;
25 bei̱tu̱ kandi, atakateerane nayo, atakabyeri̱ yogwo mwana wa b̯udulu. Yozefu̱ yeeti̱ri̱ yogwo mwana ibara, Yesu̱.