8
Ṉoṉovalia Saula sa Ekelesia
1-3 Meke koa nana se Saula vasina, meke va ego ia sa sa minate te Sitivini. Podalae tugo pa rane asa, si ta ṉoṉovala va kaleana sa ekelesia pa Zerusalema. Kaiqa rina tie madidi pu lulia sa hiniva te Tamasa, si la takatakala na kabo va ululae, meke pomunu nia rini sa tinina e Sitivini.
Ba se Saula si podalae huaria sa sa ekelesia. La ene vetuvetu si asa meke hatai sari na tie, meke ririhi vura ni sa sari doduru palabatu na barikaleqe pu va hinokaria se Karisito, meke vekoi sa pa vetu varipusi si arini. Ke sari doduru tie te Zisu si ta hurakatae lamae pa doduruna sa popoa Ziudia meke Sameria. Sari na apositolo mo si koa hola pa Zerusalema.
Ta Tarae pa Sameria sa Inavoso Leana
4 Arini pu ta hurakatae la mae, si la tarae nia rini sa inavosona e Zisu Karisito koari vasina pu kamo la rini.
5 Keke arini si e Pilipi. La si asa koasa vasileana nomana pa Sameria d, meke tarae nia sa vasina sa guguana sa Karisito sapu e Zisu.
6-7 Totoso dogori tugo rini sari na tinavete variva magasadi pu evaṉi sa, si va avoso hola sari na puku tinoni koasa nana tinarae. Ura gagaemana sari na tomate kaleadi totoso hipuru pani sa sarini koari soku tie. Meke soku saripu mate limadi na nenedi meke na ike, si ta salaṉa tugo.
8 Ke qetuqetu hola sari na tiena sa vasileana asa.
9 Ego, koa seunae vasinahite vasina si keke tie vakuvakutae, pozana si e Saimone. Hoke magamagasa nia rina tie Sameria si asa koari nana tinavete variva magasadi pu hoke taveti sa koari nana potana. Hoke vahesi pule nia si asa, meke balabala pule nia sapu keke tie arilaena si asa, gua.
10 Doduru tie, hiteke na lavata pa popoa Sameria si va avoso la koa sa, meke zama, “Sa tie hie si na ṉiniraṉira te Tamasa, sapu ta pozae ‘Na Ṉiniraṉira Lavata’,” gunia rini si asa.
11 Va avosia rini si asa, sina ele seunae hola si va magasi sa si arini koasa nana potana.
12 Ba sipu va hinokaria rini sa Inavoso Leana te Pilipi koasa guguana sa Binaṉara te Tamasa, meke sa pozana e Zisu Karisito, si ta papitaiso sari doduru.
13 Se Saimone ba va hinokaria tugo meke ta papitaiso. Beto asa si lulia lamae sa se Pilipi, na magamagasa ni sa sari na tinavete variva magasadi, pu dogori sa koe Pilipi.
14 Avoso nia rina apositolo pa Zerusalema, sapu ele va hinokaria rina tie pa Sameria sa Inavoso Leana, ke garunu la ni rini sari Pita e Zone.
15 Meke sipu kamo pa popoa Sameria sari kara, si varavara ni ri kara sarini pu va hinokara, pude di vagia sa Maqomaqo Hope, gua.
16 Sina ta papitaiso mo pa pozana e Zisu sa Baṉara si arini, ba lopu ele vagia rini sa Maqomaqo Hope.
17 Ke va oponi limadi ri Pita e Zone si arini, meke tiqe vagia rini sa Maqomaqo Hope.
18 Dogoria e Saimone sa tie vakuvakutae sapu sari na tie pu va oponi limadi rina apositolo, ari Pita e Zone, si vagia rini sa Maqomaqo Hope. Ke hiva poni ni poata sa sari kara,
19 meke zama si asa, “Poni nau sa ṉiniraṉira sana, pude saripu va oponi limaqu rau, si kote vagia tugo sa Maqomaqo Hope,” gua si asa.
20 Ba olaṉa la koasa se Pita, “Mamu tava kilasa pa Heli turaṉi sari na mua poata sara! Sina balabala ia goi sapu boka holu nia poata goi sa vinariponi te Tamasa!
21 Namu na loke mua hinia hokara si agoi koasa tinavete pu korapa nia gami hie, sina sa bulomu si lopu toṉoto pa kenuna sa Tamasa.
22 Mu kekere koasa kinaleana hie, mamu varavara la koa Sa Baṉara. Hokara kote taleosae sa inokoro kaleana pa bulomu.
23 Ura gilania rau sapu siṉia na kinonokono sa bulomu, meke korapa ta pusi koasa mua kinaleana si goi,” gua si asa.
24 Meke olaṉa se Saimone, “Varavara nau koasa Tamasa, pude mani lopu ta evaṉa koa rau, gua sapu zama nia goi sana,” gua si asa.
25 Meke sipu beto helahelae vura nia rini sa guguana e Zisu, meke tarae nia rini sa zinama tanisa Baṉara, si kekere pule la dia pa Zerusalema sari kara. Tarae tokele nia rini sa Inavoso Leana tanisa Baṉara, koari na vasivasileana pa Sameria, koasa dia inene pule.
Pilipi meke sa Tie Itiopia
26 Keke mateana te Tamasa si la koe Pilipi, meke zama guahe: “Mu topue ene la gua pa kali matao koasa siraṉa sapu ene gua pa Zerusalema, meke la gua pa Qaza,” gua si asa. Na siraṉa sapu ene gua pa qega si asa.
27 Ke topue la gana se Pilipi. Meke pa korapana sa nana inene la si dogoria sa si keke tie Itiopia. Na koimata arilaena si asa, meke na nabulu pu kopu ni sari na tinagotago arilaedi; na qolo na siliva na gua, tanisa baṉara maqota pa Itiopia. Sa koimata hie si ele la somana pa vinahesina sa Tamasa pa Zerusalema.
28 Na korapa koi pule nana pa nana totopili. Meke habotu titiro tokelia sa sa kinubekubere tanisa poropita Aisea.
29 Meke zama ia sa Maqomaqo Hope se Pilipi, “La, mamu ene kapae tata koasa totopili sana,” gua si asa.
30 Ke haqala tata la koasa totopili se Pilipi, meke avosia sa sapu korapa tiroa sa sa kinubekubere tanisa poropita Aisea, ke nanasa la ia sa, “Gilania tugo goi ginuana sapu gua korapa tiroa goi sana?” gua se Pilipi.
31 Meke olaṉa sa tie, “Vegua meke kote boka gilania rau, be loke tie va bakalia koa rau?” gua si asa. Ke tiokia sa se Pilipi pude la suraṉa luli koasa pa totopili.
32 Sa kinubekubere te Aisea sapu tiroa sa si guahe:
“Kekeṉoṉo gua tugo na sipi d si Asa,
sapu ta turaṉa la pude tava mate,
meke gua tugo na lami pa kenuna sa tie kotokoto sipi si Asa,
sapu lopu hite kulu,
lopu hite zama nia Sa si keke zinama.
33 Tava kurekure si Asa koari na ṉinovaṉovala,
meke lopu ta tokae totosona ta pitu hoboro si Asa.
Esei boka zama nia sa ginore tuti Tanisa?
Ura ta vagi taloa pa pepeso sa nana tinoa,” gua.
34 Meke nanasia sa tie se Pilipi, “Esei si gunia sa poropita hie? Telena mo? Ba keke votiki tie tu?” gua si asa.
35 Meke tiqe vivinei se Pilipi koa sa. Podalae nia sa sa vivinei koasa tiniro pu tiroa sa tie, meke va bakala la nia sa koasa sa Inavoso Leana koasa guguana e Zisu.
36 Meke pa korapana la sa dia inene pa siraṉa, si kamoa ri kara si keke vasina sapu koa ia sa kolo, ke zama la koe Pilipi sa tie, “Ego, hie si sa kolo. Vegua, lopu boka ta papitaiso si rau?” gua si asa.
38 Meke va nosoa sa tie sa totopili, ke gore la pa kolo sari kara Pilipi, meke papitaiso ia Pilipi si asa.
39 Sipu popa sage pule mae pa kolo sari kara, si hinoqa turaṉa taloa nia sa Maqomaqona sa Baṉara se Pilipi, ke lopu dogoro pulea sa tie si asa, ba hola taloa nana sa tie. Qetuqetu hola si asa.
40 Ba se Pilipi si la kamo tu pa popoa Asidodi d. Meke ene tarae nia sa sa Inavoso Leana koari doduru vasileana osolae kamo tu pa Sizaria.