9
Zobi
1 Meke olaṉa se Zobi,
2 “Hinokara, gilania qua rau si arini visoroihe.
Ba vegua meke boka toṉoto sa tie pa kenuna sa Tamasa?
3 Vea meke kote boka tokea keke tie si Asa?
Kote nanasa ni Tamasa si ka tina ninanasa
sapu lopu keke tie kaqu boka olaṉi.
4 Sa Tamasa si tumatumaena meke ṉiṉirana hola;
loke tie si boka kilu ia sa Nana hiniva meke koa bule eko nana.
5 Va rizui Sa sari na toqere meke lopu va nonoga ia rini,
meke pa Nana tinaṉaziri si huara pani Sa.
6 Va niu ia Tamasa sa kasia popoa meke va rizua Sa pa nana kokoana,
meke madidiri sari dedegerena sapu tuqena.
7 Zama si Asa meke va nosoa Sa sa rimata pude loke kalalasa pana rane,
meke sari na pinopino pude lopu kalalasa pana boṉi.
8 Loke tie toka nia sa Tamasa pude repahia sa maṉauru,
meke neti va nosoi sari na bogusu nomadi.
9 Tamasa va podaki pa maṉauru sari na vinarigarae pinopino nomadi, guari na mola valusa, sagauru, habia, na toropae baṉara.
10 Lopu kaqu boka tumaeni gita sari tinavete nomadi saripu taveti Sa,
meke sari nana tinavete variva magasadi si loke vina betodi.
11 Ene hola sa Tamasa, ba lopu boka dogoria rau,
hola mo si Asa, ba lopu gilania rau.
12 Be taṉini vagi Sa gua sapu hivani Sa, esei boka heki nia?
Esei kote boka nanasia, ‘Na sa si tavetia goi?’ gua.
13 E Tamasa si lopu kaqu tuqe pule Nana binugoro.
Se Rehabi sa noki variva mate pa lamana meke sari nana minate ba kokotuṉu pa nenena.
14 Vea meke kote olaṉia rau sa Tamasa?
Pae kote vagi ni rau sari zinama pude tokea?
15 Be toṉotoqu si rau ba lopu boka olaṉia arau,
sapu boka ia arau si pude tepa ia mo sa tataru tanisa qua Tie Varipitui.
16 Be tioko la ia arau meke olaṉau Sa,
ba lopu rovea rau sapu kote va avoso au sa qua Tie Varipitui.
17 Kote va kilasa nau raneboṉi Sa pa ginugua loke laedi,
meke va sokui sari tubuqu pa ginugua hoborodi.
18 Lopu kote poni au totoso Sa pude siṉo paki,
ba kote va siṉi nia tinasigiti Sa sa qua tinoa.
19 Pa ṉiniraṉira, si Asa si ṉiṉira hola.
Pa vinari pitui, si esei kote boka pitu ia si Asa?
20 Be toṉoto qua si rau, ba sa ṉuzuqu kote zutu au,
be loke tinazutuqu, ba Tamasa kote va sosodea sapu tie kaleaqu si rau.
21-22 Loke tinazutuqu si rau, ba ele lopu kiluna.
Ele mabo nia rau sa tinoa hie, loketoṉa si leana.
Be sea babe toṉoto, ba kote tava kilasa beto mo koasa Tamasa.
23 Totoso raza sa oza meke mate va hodaka sari tie loke dia sinea,
si va sisire ni tu sa Tamasa.
24 Sa doduruna sa kasia popoa si ta vala pa limadia ari tie kaleadi.
Meke va behu i sa Tamasa sari na tie varipitui.
Pude lopu Asa si tavete gua hie, si esei pule tavetia?
25 Sari na rane pa qua tinoa si rerege taloa,
lopu keke si leadi pude qetu ni.
26 Nipulu taloa guana vaka rerege,
guana atata sapu sopata vagi dia kokorako.
27-28 Be balabala si arau pude muliṉini sari qua qinumiqumi,
meke komolo va paere pani sari tinalotaṉa;
ba kote korapa mala ni rau sari qua tinasigiti.
Na gilania rau sapu korapa zutu au Tamasa si arau.
29 Sina ele ta zutu mo si rau,
ke na tinokae sa pule si hiva hata ia rau?
30 Be guana ṉuzapa ni sopu rau sari na qua sinea,
meke ṉuzapi rau sari na limaqu,
31 ba kote voi lani au mo Tamasa pa pou nelaka
meke qua poko ba kote maledere nau mo.
32 Be sa Tamasa si na tie si kote olaṉia rau si Asa,
be kote boka la si gami karua pa vetu varipitui meke variva toṉoti vasina.
33 Leana hola be koa nana si keke tie pu boka mae pa vari korapa mami,
na tie pu boka vari pitu ni gami.
34 Be boka va rizu pania sa linipulipu te Tamasa koa rau,
pude qu beto koa matagutu ni sari na vina kilasa Tanisa.
35 Be gua asa, si kote lopu matagutu si rau pude zama,
ba pa qua ṉiniraṉira soti telequ, si lopu boka si arau.