10
Sa Tamasa meke sari na Beku
1 Gamu pa butubutu Izireli, mi avosia sapu zama nia e Zihova koa gamu.
2 Hiera gua si zama nia e Zihova:
“Mi lopu tavete luli sari hahanana tadi na votiki butubutu
babe matagutu ni sari na vina gilagila pa galegalearane,
be vea ta matagutae gua si arini koa ri na votiki butubutu.
3 Ura sari na hahanana tadi kasa si loke laedi;
na mahoa rini si keke huda pa hiqohiqo,
meke na tie mo peqo va vura nia kineha pa sesala.
4 Beto si va sari nia siliva na qolo rini;
va nabu nia poka
pude lopu niu lamae.
5 Sari dia tamasa arini si guana beku sapu vekoi rini pa inuma pude va matamatagutu kurukuru,
na lopu boka zama bari;
kaqu ta paleke tu sari
sina lopu boka ene.
Mi lopu matagutu ni;
na lopu kaqu boka va sigiti gamu rini,
babe va leana gamu.”
6 Loke tie si gugua Agoi, Zihova,
na Tamasa lavata si Agoi,
meke sa Pozamu si ta gilana koasa Mua ṉiniraṉira.
7 Esei kote lopu todoṉo nigo si Agoi,
ura Agoi mo sa Baṉara tadi doduru butubutu?
Mua Goi sari doduru vina lavata.
Koari doduru tie gilagilana pa ninae butubutu
meke koari doduru dia binaṉara,
si lopu keke si gugua Agoi.
8 Doduru arini si na tie pupuhudi, loke dia ginilagilana;
na tava tumatumae si arini koari na beku huda sapu loke laedi.
9 Na siliva si mae guadi pa Sipeini
meke na qolo si pa Upazi.
Sapu tavetia sa tie peqopeqo meke sa tie tavetavete pa qolo,
si tava pokopoko pa poko buma meke pepolo,
doduru si ta tavete koari na tie pitipiti bokabokadi.
10 Ba e Zihova si na Tamasa hinokarana;
Asa sa Tamasa toana, meke sa Baṉara sapu loke vina betona.
Totoso bugoro Sa, si niu sa kasia popoa;
meke sari na butubutu si lopu boka turu va tia ia sa Nana tinaṉaziri.
11 Tozini sapu guahe: “Sari tamasa hire, sapu lopu tavetia sa maṉauru meke sa popoa pepeso, si kote murimuri koasa popoa pepeso meke pa kauruna sa maṉauru.”
Na Kinera Vinahesi La Koe Tamasa
12 Ba Tamasa tavetia sa popoa pepeso koasa Nana ṉiniraṉira;
va podakia Sa sa kasia popoa pa Nana ginilagilana lohina
meke repaha vura nia Sa sa maṉauru pa Nana ginilae.
13 Pana zama Sa pa paka maṉauru, sari kolo pa galegalearane si kurumu;
va ale sagei Sa pa hukihukiri popoa pepeso sari na lei.
Garuni Sa sari na kapi turaṉae na ruku
meke garunia Sa sa givusu guana maena pa Nana lose naqinaqitiana givusu.
14 Doduru tie si pupuhu meke loketoṉa tumae nia;
doduru tie tavetavete pa qolo si kurekure ni sari dia beku.
Sari nana kineha si na kokohadi;
na lopu boka siṉo si arini.
15 Na loke laedi si arini, na tiṉitoṉa variva hegeredi;
pana kamo sa dia totoso vinaripitui, doduru arini si kote ta huara palae.
16 Ba sa Tamasa tadigita pa tutina e Zekopi si lopu gugua arini,
ura Asa taveti sari doduru tiṉitoṉa,
turaṉae tugo se Izireli, sa butubutu sapu tago ia Sa,
e Zihova Tadi na Qeto Minate sa Pozana Sa.
Sa Tinaraovo sapu Kote Kamo
17 Va nama i sari mia vina qaqiri pude taluarae,
sari mia kana si ele koa vari likohae nia sa popoa Zerusalema.
18 Ura, hiera gua si zama nia e Zihova:
“Kamahire si kote buli vura ni Arau
si arini pu koa koasa popoa hie;
kote na tinasuna nomana si va kamo ni Rau si arini pude sa dia tinasigiti si nomana hola.”
19 Zerusalema si kabo vura,
“Tasuna si rau, na koa ta sigiti!
lopu boka ibu sa bakora!
Ba zama si rau telequ,
‘Hie si na qua minoho meke kaqu va hola ia mo arau,’ gua.
20 Ta huara sa qua ipi;
doduru ikuna si kumata.
Sari tuqu koreo si ta luarae koa rau meke lopu koa;
ke loke tie si koa pude va turu ia sa qua ipi
babe pude tavetia sa vasina kote aqoro si rau.”
21 Sari sepati si pupuhu
meke lopu nanasa la koe Zihova;
ke lopu bokaboka si arini
meke sari dia sipi si talahuarae.
22 Va avoso! Na inavoso si korapa mae,
na vevehe nomana si mae gua koari popoa pa kali gede!
Na kote huara pani sa qeto minate sari na vasileana pa Ziuda,
va evaṉa ni na tometomeana tadi na siki pinomo.
Sa Vinaravara te Zeremaea
23 Zihova, gilania rau sapu sa tinoa tanisa tie si lopu nana sa;
lopu nana sa tie pude totoli nia sa nana inene.
24 Mu nore au, Zihova, ba pa ṉinoṉo mo,
lopu pa Mua binugoro,
ura kote va mate au Goi.
25 Zoropo vura nia sa Mua tinaṉaziri koari na butubutu pu lopu gilana Igo si Agoi,
koari na tinoni pu lopu vahesi ia sa Pozamu.
Ura arini si ele va matei sari koburu te Zekopi;
ele va mate beto pani rini meke va ivulu pania rini sa nana popoa.