4
Tioko Pule Ni Zihova sari pa Izireli
1 Zama vura se Zihova, “Izireli, be hiva pule mae mo si gamu,
mi pule mae koa Rau.
Be veko pani mo gamu sari beku variva malederedi, va seu i pa kenuqu Rau,
meke be lopu ruarabeke si gamu pa linuliqu Rau,
2 meke be pa siraṉa hinokara, ṉoṉo, meke toṉoto
si tokotokoro guahe si gamu, ‘Hinokara gua sapu toana se Zihova,’ gua,
si kote ta manae sari soku butubutu koe Zihova,
meke kote mae sari tie meke vahesia sa Pozaqu Rau.”
3 Hiera gua si zama nia e Zihova koari na tinoni pa Ziuda meke Zerusalema,
“Mi gelia sa pepeso sapu lopu ele ta pikina,
mi lopu lelete koari na hiqohiqo rakihi.
4 Mi va keke puleni gamu koe Zihova,
sari bulo mia si poni lani koa Sa pa vina tabena,
gamu na tie pa popoa Ziuda meke na tinoni pa Zerusalema,
pude lopu gua si sa Qua tinaṉaziri si kote poraka vura meke sulu guana nika
koa gua koasa kinaleana sapu tavetia gamu,
kote sulu meke loke tie kote boka va mate ia.
Sa Popoa Ziuda si Kote Ta Rapata
5 Mi tozi vura nia pa Ziuda meke zama nia pa Zerusalema sapu guahe:
‘Ivua sa buki pa doduruna sa popoa!’
Kukili va ululae mamu zama:
‘Mae varigara!
Mada govete la koari na vasileana ta gobadi!’
6 Va sage ia sa pitipiti pude la pa Zaione!
Mi govete, lopu va sasanae!
Ura na tinasuna si turaṉa mae nia Rau pa kali gede,
na tinahuara kaleana hola.”
7 Na laione si ene vura pa nana bae;
na tie huhuara butubutu si ele topue vura.
Ele topue vura pa nana vasina
pude ilasia sa mia popoa.
Sari mia vasileana si kote na popoa ta huaradi
sapu loke tie si koa i.
8 Ke mi va sagei sari poko baika,
mi kabo mamu uui,
ura sa binugoro ṉiṉirana te Zihova
si lopu rizu taloa koa gita.
9 Zama vura guahe se Zihova, “Pa rane asa, sa baṉara meke sari nana koimata
si kote malohoro bulodia,
sari hiama si kote tarazuzu,
meke sari poropita si kote holoqoru,” zama vura gua se Zihova.
10 Meke zama si rau, “Kei, Baṉara Zihova, namu koha va leana i Goi sari na tinoni hire meke sa popoa Zerusalema totoso zama guahe si Agoi, ‘Kote koa bule si gamu,’ gua, sina sa vedara tu si vekoa Goi pa leodia.”
11 Pa totoso asa sari tie hire meke sa popoa Zerusalema si kote tozi ni e Zihova, “Na givusu maṉinina si kote mae gua koari na toqere pa qega, lopu pude vari paqahani sari tie babe va vivia i,
12 ba kote ṉiburuna sa givusu asa, sapu Arau kote garunu atu nia. Maqu tozi vura nia sapu gua pitu guni ni Arau si arini.”
Koa Vari Likohae nia ri Kana se Ziuda
13 Dotu! Korapa zozoro mae gua ri na lei,
sari nana totopili varipera si mae guana vivirua
sari Nana hose si rerege hola ni sari atata.
Tasuna si gita! Gita si kaleada mo!
14 Agoi Zerusalema, ṉuzapa pani sari kinaleana pa bulomu, mamu ta harupu.
Vea seunae gua kote pausi goi sari binalabala kaleadi?
15 Keke mamalaiṉi si zama vura pa vasileana lavata pa Dani,
koari na toqere pa Iparemi si tozi vura nia sa sa tinasuna.
16 Zama vura se Zihova, “Mi tozi va ene ia si hie koari na butubutu,
la helahelae nia koari pa Zerusalema:
‘Na qeto minate mataqarana si korapa mae gua pa popoa seu,
na iraṉa va ululae si arini meke rapata la koari na vasileana pa Ziuda.
17 Koa vari likohae nia rini si asa gua rina tie kopu pa inuma,
sina va karikari mae Au Ziuda si Arau,’
18 Sari mua hahanana na tinavete
si va kamo nigo sa ginugua hie.
Na mua vina kilasa si hie!
Kei, na vari sigiti hola!
Kei, na suvulu kamo pa bulo si hie!”
zama vura gua se Zihova.
Talotaṉa ni Zeremaea sari Nana Tinoni
19 Kei, sa buloqu, sa buloqu!
Pekutu lamae si rau pa tinasigiti.
Kei, sa sigiti pa buloqu!
Duṉaduṉana sa buloqu,
lopu boka koa noso si rau.
Ura ele avosia rau sa kabona sa buki;
ele avosia rau sa iraṉa tana varipera.
20 Vari luli mo sari tinahuara,
ke sa doduruna sa popoa si koa ta huara eko mo.
Pa totoso papakana mo si ta huara sa qua ipi,
sa qua aqoroana si lopu sana ele lopu koa tu.
21 Vea seunae gua si kaqu dogoria rau sa pitipiti vinaripera
meke avosia sa kabona sa buki?
22 Zama pule se Zihova, “Sari Qua tie si pekipekidi;
lopu gilana Au rini si Arau.
Na koburu loke dia binalabala si arini;
loke dia ginilagilana.
Na bokabokadi hola pa tinavete kaleana;
na tinavete leadi si lopu tumae ni arini,” gua.
Dogoria Zeremaea pa Pinutagita sa Tinahuara sapu Korapa Mae
23 Doṉo la si rau koa sa popoa pepeso,
loke kinehana meke loketoṉa si koa;
meke pa maṉauru,
si loketoṉa kalalasana.
24 Doṉo la si rau koari na toqere,
meke korapa niu si arini;
doduru toa si korapa qeno.
25 Doṉo la si rau ba loke tie si koa;
doduru kurukuru tapuru si ele tapuru taloa dia.
26 Doṉo la si rau ba sa pepeso masuruna si na qega mo,
doduru nana vasileana si koa ta huara eko mo
pa kenuna e Zihova, kenuna sa Nana tinaṉaziri.
27 Hiera gua si zama nia e Zihova:
“Sa doduruna sa popoa si kote ta huara,
gua ba lopu kote ta huara beto palae.
28 Gua ke sa popoa pepeso si kote taruqoqo
meke sa maṉauru pana ulu si kote tava huporo,
sina ele zama si Rau meke lopu kote hobea Rau,
ele vizata si Rau meke lopu kote kekere pulea Rau,” zama vura gua se Zihova.
29 Pa mamalaiṉidi ri na tie koi hose meke tie gona tupi
si govete taloa sari doduru vasileana.
Kaiqa si la tome pa hiqohiqo;
kaiqa si govete sage koari na toqere patupatu.
Doduru vasileana si ivulu beto;
loke tie na koa i.
30 Agoi Zerusalema, na sa si tavetia goi, agoi pu ta huaramu?
Na vea ke va sage poko ziṉara tu si agoi
meke va sari patu qolo?
Vea ke pedi tu goi sari matamu?
Na tinavete hoboro sari vinasari tamugoi.
Ele kilu igo rina mua babaere si agoi
meke korapa hata igo pude va mate igo gua.
31 Na kinabo si avosia rau tana barikaleqe podopodo,
na silava nia sa sa nana koburu kekenu,
na kabo tadina tinoni pa Zerusalema pu siṉo mamata, nadoro vurai sari limadia meke zama, “Tokani gami! Malohoro mami! Sari mami tinoa si vagi hobei ri na tie va mate tie.”