49
Sa Kinorokorotae pa Guguana Amoni
1 Pa guguana Amoni:
Hiera gua si zama nia e Zihova:
“Vea, loke tuna koreo se Izireli?
Loke koburu tu pude tagoi sari nana likakalae?
Na vegua, ke sa beku Moleki tu vagia sa popoa pa Qadi?
Vea ke gamu pu vahesia se Moleki si koa pa Qadi?”
2 Ba zama vura gua se Zihova, “Sari rane si korapa mae,
totoso kote ivua Rau sa buki va nama varipera
pude raza ia sa vasileana Raba pa Amoni;
meke kote ta evaṉae na kobi remoremo,
meke sari vasileana pa vari likohaena si kote ta sulu.
Meke kote hadu vurani Izireli
sarini pu hadu vura nia si asa,”
zama vura gua se Zihova.
3 “Kabo, agoi Hesiboni, ura Ai si ta huara!
Kabo vura, gamu pu koa pa Raba!
Va sage poko baika, mamu koa talotaṉa;
mamu bebeno la tani, la tana, gua pa korapa vasileana ta gobadi,
ura se Moleki si kote ta raovo taloa,
turaṉae sari nana hiama meke sari koimata.
4 Na vegua ke va titieni goi sari mua lolomo toqere,
va titie nia goi sapu vuvua hola sari linetelete?
Agoi tuqu vineki sapu lopu ta raṉemu,
raṉei goi sari mua tinagotago meke zama guahe,
‘Esei kote mae rapata au?’ gua.
5 Kote holoqoru ni gamu
sari soku kana pu koa vari likohaeni gamu, sapu kote va gevuri Rau pa vari kali mia,”
zama vura gua se Zihova tadi na Qeto Minate.
“Doduru gamu si kote ta hadu taloa,
meke loke tie kote vagi varigara ni sari tie govetedi.
6 Ba mumudi, si kote veko pulei Rau sari tinagotago te Amoni,”
zama vura gua se Zihova.
Sa Kinorokorotae pa Guguana Edomu
7 Pa guguana Edomu d:
Hiera gua si zama nia e Zihova Tadi na Qeto Minate:
“Vegua, loketoṉa sa ginilagilana lohina pa Temani?
Ele mate sari tie vari tokae pa binalabala, pa Edomu?
Ke ele murimuri palae sa ginilagilana?
8 Taliri, mamu govete taloa, la tome koari na bae lohidi,
gamu pu koa pa Dedani,
ura kote va kamo nia tinasuna Rau sa tutina Isoa
pa totoso sapu kote va kilasia Rau.
9 Be guana mae pakete qurepi sari tie koa goi,
si kote visavisa qurepi si veko hola i rini.
Be mae sari tie hikohiko pana boṉi,
si lopu kote doduru tiṉitoṉa si paleke taloani rini.
10 Ba Arau kote vagi pani betoi koe Isoa sari doduru;
sapu tomei sa ba kote hata vagi Rau,
asa ba kote lopu boka va paere pule nia.
Sari nana koburu, tasina, meke turaṉana si kote mate beto,
meke kote loke tie kote toa hola.
11 Vekoi sari mua koburu eapadi; Arau kote kopu ni.
Sari mua naboko ba boka raṉe Au tugo rini.”
12 Hiera gua si zama nia e Zihova: “Be guana arini pu lopu garodi pude napo koasa kapa vinakilasa, si napo tu koasa kapa, si vegua ke agoi sapu garomu pude napo si lopu kaqu napo tu?
13 Ura tokotokoro si Arau pa Pozaqu telequ,” zama vura gua se Zihova, “sapu sa vasileana Bozira si kote ta evaṉae na popoa ta huarana, meke guana keke tiṉitoṉa variva matagutuna, na vina sisireina, na pozapoza tana lineveleve, meke sari doduru nana vasileana si kote kaleadi eko mo ninae rane.”
14 Kamo mae si keke inavoso te Zihova koa rau:
Keke tie paleke inavoso si ta garunu la koari na butubutu pude zama guahe,
“Varigara gamu kasa pude rapatia!
Gasa turu pude varipera!”
15 “Kamahire kote la Rau meke va hiteke gore igo koari na butubutu
meke ta hakohakoe koari na tie.
16 Saripu variva matagutu sapu taveti goi
meke sa vina titie pa bulomu va kokoha igo si agoi,
agoi pu koa koari na lolomo ṉizupudi koari na patu,
pu koa i sari na vasidi ululudi pa toqere.
Vea be tavete va ululu vori si agoi gua tadi na atata,
ba vasina kote atu daku gore guni nigo Rau si agoi,”
zama vura gua se Zihova.
17 “Edomu si kote ta evaṉae keke tiṉitoṉa variva matagutu;
doduru pu ene hola si kote magasa meke kote va sisire
sina doṉo hikare hola sa vasina.”
18 Zama vura se Zihova, “Gua sapu ta huara sari pa Sodomu meke Qomora,
meke sari na vasileana pa vari kalina,
si kote loke tie si koa vasina;
loke tie si kote veko kinoa vasina.
19 Gua keke laione sapu vura mae pa hiqohiqo Zodani
meke la koasa pezara duduli tana sipi,
si kote hadua Rau se Edomu pa nana pepeso pa vasi totoso hite mo.
Esei si ta vizatana sapu kote tozi nia Arau pude tavetia si hie?
Esei si gugua Arau meke esei kote boka raza Au?
Meke na sepati savana kote toke mae Au?
20 Gua ke avosia, sa si kote hiva balabala tavetia e Zihova koe Edomu,
sa si va egoa Sa pude tavete la nia koarini pu koa pa Temani:
Sari koburu hite si kote ta ririhi taloa guana sipi;
meke sari dia vetu si kote ta huara palae hokara.
21 Pa mamalaiṉina sa dia hinoqa si kote niu sa popoa pepeso;
sa kabo tadirini si kote ta avoso kamo la pa Kolo Ziṉara.
22 Dotu! Na atata si tedoro gore sana,
sari tatapuruna si repaha hola nia sa sa popoa Bozira.
Pa rane asa si sari bulodi rina varane pa Edomu
si kote gua sa bulona sa barikaleqe podopodona.
Sa Kinorokorotae pa Guguana Damasikasi
23 Pa guguana Damasikasi:
Sari vasileana pa Hamati meke Arapadi si matagutu,
ura ele avoso nia rini sa inavoso kaleana.
Holoqoru si arini,
meke nunala guana qeo pa lamana.
24 Sari pa Damasikasi si ele malohoro,
ele taliri sarini pude govete
na kamoi na minatagutu;
talotaṉa meke ta sigiti si arini
guana barikaleqe podopodona.
25 Na vegua ke sa vasileana lavata sapu ta avosaena pa seu si lopu ta luara palae,
sa vasileana sapu qetu nia Rau?
26 Ura na kote hoqa mate pa sisiraṉa sari nana tie vaqura;
meke sari doduru nana tie varipera si kote tava noso pa rane asa,”
zama vura gua se Zihova.
27 “Kote va katu ni nika Rau sari gobana sa Damasikasi;
meke kote ta sulu palae sari vasina ta gobadi na ṉiṉiradi te Beni Hadadi.”
Sa Kinorokorotae pa Guguana Kedara meke Hazo
28 Pa guguana sa popoa Kedara meke sari butubutu baṉara pa Hazo, sapu la rapati e Nebukaneza sa baṉara pa Babiloni:
Hiera gua si zama nia e Zihova:
“Gasa turu, mamu rapatia si pa Kedara
mamu huara pani sari tie pa kali gasa rimata.
29 Sari dia ipi meke dia sipi si kote ta vagi taloa;
dia aqoroana si kote ta paleke taloa
turaṉae dia likakalae meke dia kameli tugo.
Sari tie si kote kukili la guahe koarini,
‘Variva matagutu sari doduru vari kali popoa,’ gua.
30 Tuturei govete taloa!
La tome pa bae lohidi, gamu pu koa pa Hazo,”
zama vura gua se Zihova.
“E Nebukaneza sa baṉara pa Babiloni si ele kuhanani gamu si gamu;
ele tavete binalabala si asa pude mae huara gamu.
31 Gasa turu, mamu rapatia sa butubutu koa muliuṉuna sana,
sapu koa loke gobana,”
zama vura gua se Zihova,
“keke butubutu sapu loke sasadana babe na rorotoana;
meke sari nana tinoni si kokoa eke dia.
32 Sari dia kameli si kote na vinagi pa vinaripera,
meke sari rovana bulumakao si kote ta hia guana pinudiki likakalae mudi vinaripera.
Arau kote talahuarae ni pa givusu sarini pu koa pa seu,
meke kote va kamo ni tinasuna Rau pa doduru vari kalina,”
zama vura gua se Zihova.
33 “Hazo si kote na tometomeana tadi na siki pinomo,
meke kote na popoa ta huarana ninae rane.
Loke tie si kote koa vasina;
loke tie si kote veko kinoa vasina.”
Sa Kinorokorotae pa Guguana Elami
34 Hiera sa zinama te Zihova sapu mae koe Zeremaea pa guguana Elami, tatasana sapu koa baṉara pa Ziuda se Zedekaea:
35 Hiera gua si zama nia e Zihova Tadi na Qeto Minate:
“Doṉo la, Arau kote moku ia sa bokala te Elami,
vasina koa sa dia ṉiniraṉira.
36 Kote va kamo la nia Rau koe Elami sari ka made givusu
mae guadi koari ka made iiona sa popoa pepeso;
kote va talahuarae ni Rau koari ka made givusu,
kote koa betoi ri na tie Elami govetedi sari doduru butubutu pa kasia popoa.
37 Arau kote va matagutu i sari pa Elami pa kenudia ri nana kana pu mae pude va matei.
Kote va kamo ni tinasuna noma hola Arau si arini,
koasa Qua tinaṉaziri nomana hola,”
zama vura gua se Zihova.
“Kote hadu lulini vedara Rau
osolae va mate betoi Rau si arini.
38 Kote vekoa Rau sa Qua habohabotuana baṉara pa Elami
meke kote va matei Rau sari dia baṉara meke koimata,”
zama vura gua se Zihova.
39 “Ba kote veko puleni Rau sari tinagotago te Elami
koari na rane pu korapa mae,”
zama vura gua se Zihova.