Buka Hope 1 Baṉara 18

Ilaiza meke sari na Poropita te Beolo

1 Meke koasa vuaheni vina ṉeta sipu hola soku ṉavulu rane sapu lopu ruku sa popoa, si zama la koe Ilaiza se Zihova, “La mamu tutuvia se Ehabi sa baṉara, meke kaqu va rukua Rau sa popoa,” gua si Asa. 2 Ke taluarae se Ilaiza pude la tutuvia se Ehabi. Koasa totoso hie si kaleana hola sa dada pa popoa Sameria. 3 Ke tiokia Ehabi se Obadaea, sa tie sapu palabatu nia sa vetu baṉara. Obadaea si keke tie sapu pamaṉa nia meke vahesia se Zihova. 4 Meke sipu ele va matei e Zezibelo sari na poropita te Zihova, si ari ka keke gogoto si vagi e Obadaea meke tomei sa koari karua bae, hopeke lima ṉavulu puta tie pa keke bae meke ponini ginani na kolo sa si arini. 5 Meke zama la koe Obadaea se Ehabi, “Aria mada la hatai sari doduru bukaha na tototolo pa doduru vasina, mada la dogori be guana boka dogoro vasi duduli pude poni sari na hose na miulu na gua, pude lopu kaqu mate sari nada kurukuru,” gua si asa. 6 Meke variva ego nia rini sari na vasidi pu kote hopeke la dogori ri karua, meke topue la koari hopeke vasidi si arini.

7 Meke sipu korapa ene la se Obadaea, si tutuvu va hodakia mo sa se Ilaiza pa siraṉa. Meke doṉo gilania sa si asa, meke kokotuṉu gore pa kenuna sa si asa, meke nanasa guahe, “Palabatu. Hinokara, agoi tugo se Ilaiza?”

8 “Uve, arau Ilaiza mo si hie,” olaṉa gua si asa. “Ego, la mamu tozi nia sa mua palabatu se Ehabi sa baṉara, sapu arau si korapa koa tani, mamu gunia.”

9 Meke olaṉa se Obadaea, “Nasa si tavetia rau meke hiva vala nau goi sa mua nabulu, pa tinasuna, meke kote va mate au sa baṉara Ehabi? 10 Gua sapu toana se Zihova sa mua Tamasa, si zama va hinokara atu si rau, se Ehabi si hata igo si agoi koari doduru popoa na butubutu, meke sipu tozi vura nia sa baṉara pa popoa sapu lopu koa si agoi pa nana popoa, si hoke hiva nia Ehabi si pude zama tokotokoro sa baṉara koasa popoa sana sapu lopu boka dogorigo sa si goi, gua. 11 Ego, kamahire si hiva nau goi pude la tozi nia si asa sapu korapa koa mua tani si goi. 12 Ba lopu gilania rau be guana mae paleke taloa nigo sa Maqomaqona e Zihova si goi pa keke vasina lopu ta gilanana pa mudiqu, sipu taluarae si rau koa goi. Meke be la tozi nia rau se Ehabi sapu korapa koa mua tani si goi, meke be lopu mae dogorigo sa, si kote va mate au mo sa si arau. Mu balabala ia sapu arau si keke tie sapu vahesia se Zihova podalae sipu korapa koreo vaquraqu si rau. 13 Vegua lopu ele avoso nia tu goi sapu totoso va matei Zezibelo sari na poropita te Zihova, si tomei rau sari ka keke gogoto koari na bae, hopeke lima ṉavulu puta tie pa keke bae meke poni ginani na kolo rau si arini? 14 Ba na vegua, ke garunau tu goi pude la tozi nia sa baṉara sapu koa mua tani si goi, gua? Na kote va mate au mo sa si rau!” gua si asa.

15 Meke olaṉa la koasa se Ilaiza, “Gua sapu turu pa kenuna e Zihova Tadi na Qeto Minate, sa Tamasa toana sapu nabulu nia arau, si tozi va hinokara igo rau sapu kaqu turu pa kenuna sa baṉara si rau pa rane ṉinoroi,” gua si asa.

16 Ke topue la meke la tozi nia Obadaea se Ehabi sa baṉara, ke taluarae sa baṉara Ehabi pude la tutuvia se Ilaiza, gua 17 Meke totoso dogoria Ehabi si asa, si zama si asa, “Isa si goi, sa tie sapu tavete tinasuna lamo pa popoa Izireli?”

18 Meke olaṉa se Ilaiza, “Lokari, lopu arau sa tie sapu vata sunaia sa popoa Izireli, ba agoi tu, meke sa tamamu. Gamu tu va kari sari na tinarae te Zihova meke vahesi gamu sari na beku te Beolo. 19 Ego, mu la tozi ni sari doduru tie pa popoa Izireli pude atu tutuvau pa toqere Kameli. Mamu turaṉa mae ni sari ka made gogoto lima ṉavulu puta poropita te Beolo, meke sari ka made gogoto poropita te Asera, sa tamasa barikaleqe, saripu koa pa kinopu te Zezibelo sa kalaho,” gua si asa.

20 Ke tioki Ehabi sari doduru tinoni pa popoa Izireli meke sari na poropita te Beolo pude la varitutuvi pa toqere Kameli, gua. 21 Meke sipu varigara rini si turu pa kenudi rina tinoni se Ilaiza meke zama, “Vea seunae gua si kaqu koa rabeke ni gamu sari karua binalabala? Be e Zihova si na Tamasa hinokara, si mamu vahesia, ba be se Beolo si na Tamasa hinokara si mamu vahesia.” Ba lopu va kulu sari na tinoni. 22 Beto asa si zama se Ilaiza, “Arau mo telequ sa poropita te Zihova sapu koa hola, ba sari na poropita te Beolo si ari ka made gogoto lima ṉavulu puta tie. 23 Ego, mi turaṉa maeni karua bulumakao. Madi vizatia ri na poropita te Beolo si keke, madi va matea, magumagua, meke va hakei koari na huda, ba lopu va katu nia nika. Arau ba kaqu tavete gunia tugo si keke bulumakao. 24 Beto asa madi varavara la koasa dia tamasa sari na poropita te Beolo, meke arau ba kaqu varavara la tugo koe Zihova. Meke asa sapu garunu ia sa nika meke sulu betoi sari na huda si asa tugo sa Tamasa hinokara.” Meke va ego betoa ri doduru tie sapu gua asa.

25 Meke zama la koari na poropita te Beolo se Ilaiza, “Gamu si soku hola, ke mamu vizatia keke bulumakao, mamu va nama kenua, mamu varavara la koasa mia tamasa, ba lopu va katuni nika sari na huda,” gua si asa.

26 Meke vagia rini sa bulumakao sapu ta poni nia rini, meke va tana ia rini si asa, meke zama va ululae na kukili la koe Beolo si arini podalae munumunu kamo pa korapa rane, “Kei Beolo, mu olaṉa gami,” gua. Meke peka gasa si arini pa vari likohaena sa hope sapu tavetia rini, ba loke inolaṉa si hite kamo mae.

27 Kamo korapa rane si podalae va sisire ni e Ilaiza si arini, meke zama, “Mi varavara va ululae tu! Na tamasa bisa, gina korapa balabala sisigiti si Asa, babe tupiti sisigiti, babe korapa enene nana pa kaiqa vasina! Babe korapa puta gana; la mamu va vaṉunia!” 28 Ke varavara va ululae latu sari na poropita te Beolo, meke va bakora puleni magu na hopere rini sari na tinidia, sa dia hahanana si gua asa, osolae vura i tu ehara sari tinidia. 29 Meke hola sa korapa rane, ba lopu noso sa vevehe tadi kasa osolae kamo sa totoso vina vukivukihi veluvelu. Ba namu loke inolaṉa na mamalaiṉi si hite ta avoso.

30 Meke zama la koari na tinoni se Ilaiza, “Mi tata mae gamu,” meke mae varigara vari likohae nia rini si asa. Meke kuri pulea Ilaiza sa hope te Zihova sapu ele ta huara. 31 Meke vagi sa sari ka manege rua patu, hopeke keke koari ka manege rua butubutu saripu ta pozae luli koari tuna koreo e Zekopi, sa tie sapu poza nia Izireli e Zihova.* 32 Koari na patu hire si kuri pule nia sa sa hope pude vahesia se Zihova. Meke geli vari likohae nia pou sa, sapu tata garona ka manege made lita kolo. 33 Beto asa si vekoi sa sari na huda pana uluna pa batuna sa hope, meke magumagua sa sa bulumakao meke va hakei sa si arini koari na huda. Meke zama si asa, “Va siṉini kolo ka made zagi, meke zoropo lani pa korapa hope.” Meke evaṉia tugo rini.

34 Meke zama si asa, “Mi tavete pulea,” meke tavetia tugo rini. Meke zama pule si asa, “Keke totoso pule,” gua, ke tavetia rini pa vina ṉeta totoso. 35 Meke gore la pa vari likohaena sa hope sa kolo meke va siṉia sa sa gineli pou koasa vari likohaena.

36 Koasa totoso va vukivukihi pana veluvelu si tata la koasa hope sa poropita Ilaiza meke varavara guahe, “Ke Zihova, sa Tamasa te Ebarahami, Aisake, meke te Zekopi, mamu va dogoroni kamahire sapu Agoi sa Tamasa tadi pa Izireli, meke arau sa mua nabulu sapu taveti sari doduru tinavete hire pa Mua zinama. 37 Mamu va tabe au, ke Zihova, Mu olaṉau, pude madi gilania rina tie hire, sapu Agoi, e Zihova sina Tamasa sapu korapa va kekere pule atu ni koa Goi sari bulodi,” gua si asa.

38 Meke garunu gore mae nia Zihova sa nika, meke sulua sa vina vukivukihi, sari na huda na patu, meke na pepeso, meke tava popa sa kolo koasa pou pa vari likohaena sa hope. 39 Meke sipu dogoria ri na tinoni sapu gua asa si hoqa oporapaha pa pepeso si arini meke zama va ululae guahe: “E Zihova tugo sa Tamasa, e Zihova mo telena sa Tamasa!” gua si arini.

40 Meke garuni e Ilaiza sari na tinoni, “Tuqe vagi sari na poropita te Beolo; meke lopu keke arini si kaqu govete taloa!” Ke tuqe varigarani ri doduru tie si arini, meke turaṉa gore lani Ilaiza koasa kolo pa Kisoni meke va mate betoi sa si arini vasina.

Sa Vinabetona sa Dada

41 Meke zama la koasa baṉara Ehabi se Ilaiza, “Ego, mu la henahena na napo kamahire. Ele avosia rau sa ovaṉana sa luturu sapu korapa tata mae.” 42 Meke sipu topue la henahena se Ehabi, si haele sage la pa batuna sa toqere Kameli se Ilaiza, vasina si la kokotuṉu gore pa pepeso si asa, sa batuna si pa vari korapadi rina tuṉutuṉu nenena.* 43 Beto hoi si zama la koasa nana nabulu si asa, “Ego, la mamu doṉo la pa hubi lamana;” gua si asa. Meke topue la sa nabulu meke pule mae meke tozia sapu lopu dogoria sa si keke lei, gua. Meke tozi nia Ilaiza si asa pude la hopikae ka zuapa totoso. 44 Meke pa vina zuapa totoso si pule mae koe Ilaiza si asa meke zama, “Kamahire si tiqe dogoria rau si keke lei hitekena hite, sapu nomana gua limana keke tie, sapu vura sage mae pa hubi lamana,” gua si asa. Meke garunia Ilaiza sa nana nabulu, “La tozi nia se Ehabi pude mani va nama nia sa nana totopili pude mani pule la pa nana vetu sipu lopu ele hoqa hukata ia na ruku si asa,” gunia Ilaiza si asa.

45 Meke lopu seunae si opoadumu sa popoa, meke podalae hiru sa givusu, meke podalae hoqa gore sa ruku nomana. Meke suraṉa pa nana totopili se Ehabi, meke topue pule la pa vasileana Zezireli. 46 Meke kamo koe Ilaiza sa ṉiniraṉira te Zihova meke ilupu va nabu nia sa sa nana poko pa tinina, meke haqala va kenue koe Ehabi si asa koasa doduruna sa siraṉa la gua pa Zezireli.