16
Ehazi sa Baṉara pa Ziuda
(2 Koronikolo 28:1-27)
1 Pa vina manege zuapa vuahenina sa binaṉara te Peka, sa tuna koreo e Remalia, sa baṉara pa Izireli, si tava baṉara pa Ziuda se Ehazi sa tuna koreo Zotamu.
2 Totoso tava baṉara sa si hiokona puta vuahenina si asa, meke koa baṉara pa Zerusalema si asa ka manege onomo vuaheni. Lopu luli sa sari na hahanana leadi te Devita sa tutina, ba taveti sa sari tinavete sapu lopu toṉoto pa dinoṉo te Zihova sa nana Tamasa.
3 Tavete luli sa sari na hahanana kaleadi tadi na baṉara pa Izireli. Sa tuna koreo soti mo ba va matea sa meke va vukivukihi va uququ la nia sa koari na beku, gugua puta rina tinavete variva malederedi tadi na tie saripu hadu vura ni e Zihova koari na popoa totoso nuquru la sari na tinoni Izireli.
4 Koari na hope tadi na beku, koari na batu toqere meke pa kaurudi ri ninae huda aqaqoro si va vukivukihi meke va uququ oto huda humaṉa lea se Ehazi.
5 La rapata pa Zerusalema sari Rezini, sa baṉara pa Siria, meke e Peka, sa baṉara pa Izireli, meke raza seunae ia rini, ba lopu boka va kilasia ari karua se Ehazi.
6 Koasa totoso asa si vagi pule nia sa baṉara pa Edomu sa vasileana nomana pa Elati, meke hadu vura ni sa sari na tie pa Ziuda saripu koadi vasina, meke va koa nuquru lani sa sari na tie Edomu, arini si koa vasina kamoa rane ṉinoroi.
7 Garunu tie paleke inavoso se Ehazi la koe Tiqalati Pilesa sa baṉara pa Asiria, meke zama si asa, “Na mua nabulu meke na tumu si rau. Mae mamu harupau koari na limadia rina baṉara pa Siria meke Izireli saripu korapa raza au.”
8 Garunu vala ni e Ehazi gua na vinari poni sari na qolo na siliva saripu vagi ni sa pa Zelepade meke pa lose kopu poata koasa vetu baṉara.
9 Koasa inolaṉana sa tinepa te Ehazi, si taluarae vura la se Tiqalati Pilesa meke sari nana qeto minate varipera meke raza ia si pa Damasikasi meke tuqe vagia. Va mate ia sa se Rezini sa baṉara, meke sari tiedi si raovo lani sa pa popoa Kiri.
10 Sipu la pa Damasikasi sa baṉara Ehazi pude la tutuvia se Tiqalati Pilesa, si dogoria sa sa hope vasina meke garunu pule la nia sa koe Uraea, sa hiama, si keke kinehana sa hope asa, sapu minaminaka gugua puta tugo asa.
11 Gua puta tugo mo sapu kubere goreni e Ehazi sa baṉara si tavete luli ia e Uraea, sa hiama, koasa hope, meke va hokotia sa sipu lopu ele kamo pule la se Ehazi.
12 Totoso taluarae pa Damasikasi meke kamo pule sa baṉara Ehazi si dogoria sa sapu ele hokoto sa hope.
13 Ke la vala nana vina vukivukihi vina uququ, na palava huiti, meke zoropo nia nana vinariponi tana napo vaeni meke siburu ni sa sari na eharana sa kurukuru ta vukivukihi pa hinenahena binaere.
14 Sa hope boronizi sapu tava madi la koe Zihova sapu koa pa vari korapana sa hope vaqura meke sa Zelepade, si va rizu la nia e Ehazi pa kali gede koasa nana hope vaqurana.
15 Meke garunia e Ehazi se Uraea sa hiama, “Tavetia sa vina vukivukihi vina uququ kurukuru pana munumunu, meke sa vina uququ huiti pana veluvelu koasa qua hope vaqura, meke tavete guni ni tugo sari na vina vukivukihi va uququ kurukuru meke sa vina uququ huiti tanisa baṉara meke tadi na tie, meke gua tugo sa dia vinariponi napo vaeni. Zoropo lani sari na eharadi ri doduru kurukuru ṉame saripu tava vukivukihi koasa hope vaqura. Ba sa hope boronizi si veko mae nia pude na qua vasina pude hata ia sa hiniva te Tamasa,” gua si asa.
16 Tavetia Uraea gua sapu tozi nia sa baṉara.
17 Ruparupaha pani sa baṉara Ehazi sari na tuturuana boronizi saripu tavetetavete ni arini pa Zelepade meke va rizu pani sa sari na besini saripu hakedi koarini. Meke vagi gore nia tugo sa sa besini boronizi lavata sapu hake pa mudidi ri ka manege rua bulumakao boronizi meke va habotu ia sa pa keke hatara patu,
18 pude va qetu ia sa baṉara pa Asiria, gua se Ehazi. Ke va rizua tugo sa koasa Zelepade sa hatarana sa habohabotuana baṉara, meke tuku pania sa sa siraṉa tanisa baṉara sapu ene nuquru la pa Zelepade.
19 Sari doduru ginugua saripu taveti sa baṉara Ehazi si ta kubere gore koasa Buka Tinozi tadi na Baṉara pa Ziuda.
20 Mate meke ta pomunae se Ehazi koasa popomunuana baṉara pa vasileana lavata te Devita, meke e Hezikaea, sa tuna koreo si baṉara hobe koasa.