16
Sa Vinaravara pa Rinaṉeraṉe Nabuna
(Keke kinera te Devita)
1 Kei Tamasa, Mu kopu nau pude lopu ta ṉoṉovala,
ura koa Agoi mo si aqorae rau.
2 Ele zama la koe Zihova si rau,
“Agoi mo sa qua Baṉara,
Doduru tiṉitoṉa pu tagoi rau
si mae guadi mo koa Goi.”
3 Sari na tie toṉoto pa popoa pepeso
si na tie ta ronuedi koe Zihova,
ke qetu hola ni rau si arini.
4 Sarini pu vizata pulea si keke votiki tamasa,
si va soku lala i rini sari na dia tinalotaṉa.
Lopu kaqu hiva somana zoropo ni rau sari na dia ehara tana vina vukivukihi,
meke lopu kaqu pozai rau pa vinahesi pozadi sari na dia tamasa.
5 Kei Zihova, Agoi mo sa qua hinia pu vizatigo rau,
meke na qua tinagotago.
Sa qua tinoa vugo na repere
si koa mo pa Limamu Goi.
6 Ele pada valeana poni nau Goi sari na Mua vinariponi koa rau,
meke taguedi hola si arini.
7 Vahesia rau se Zihova,
sina totoli nau Sa, na turaṉau Sa.
Pana boṉi ba va balau pule nau tugo si rau pa qua binalabala.
8 Doduru totoso si balabala ia rau se Zihova,
sina koa tata si Asa koa rau,
ke lopu kaqu matagutu si rau.
9 Gua asa ke qetu sa buloqu,
meke qetuqetu tugo sa qua tinoa,
ke koa tava sare si rau,
10 sina lopu kaqu veko hola au Goi si rau pa lovu,
meke lopu kaqu va malumia Goi sa mua Nabulu Hopena pude muzi tinina.
11 Va dogoro nau Goi sa siraṉana sa tinoa,
meke va siṉi nau qinetuqetu Goi pa kenumu,
meke pa kali mataomu Goi si vagia rau sa qinetuqetu sapu loke vinabetona.