19
Sa Ṉiniraṉira Lavata te Tamasa koari Nana Vinapodaka
(Keke kinera te Devita)
1 Sa maṉauru si va dogoroni gita sa ṉiniraṉira tanisa Tamasa,
meke va dogoro va bakalani gita sari na tinavete tana limana.
2 Hopeke rane si tozi vura nia sa vina lavatana Sa,
meke hopeke boṉi si tozi vura nia sa tinumatumae Tanisa.
3 Lopu vivinei na zama vura si Asa,
meke lopu ta avoso sa mamalaiṉina Sa,
4 ba sa Nana inavoso si vura la pa doduruna sa kasia popoa,
meke sa vevehena Sa si ta avoso pa doduru vasina pa popoa pepeso.
Ele kuria e Zihova pa maṉauru sa vasina tanisa rimata.
5 Vasina gasa mae gua si asa,
gua na tie qetuqetu pu la pude varihaba,
meke guana tie lopilopi pu va qaqiri la pa vinarivose haqala.
6 Gasa mae pa keke hukihukirina sa maṉauru si asa,
meke ene karovo la gua pa keke kalina pule.
Loketoṉa si boka tome pa minaṉini tanisa.
Sa Tinarae te Zihova
7 Sari na tinarae te Zihova si gotogoto,
pude va ṉiṉira ia sa tinoa.
Sari na ginarunu te Zihova si ta ronuedi tugo,
pude va tumatumaei saripu pupuhu.
8 Sari na tinarae te Zihova si toṉoto,
pude va qetui sari na bulo tie.
Sari na ginarunu te Zihova si hinokara,
va kalalasia sa binalabala.
9 Sa pinamaṉana e Zihova si via,
ninae rane ka rane.
Sa vinilasa te Zihova si gotogoto,
meke toṉoto doduru totoso!
10 Sa inokorodi rini si noma hola nia sa inokorona sa qolo taguena,
lomoso hola nia rini sa zipale sapu viana hola!
11 Va tumatumae au rini si arau, sa Mua nabulu,
meke koasa vinatabedi rini si vagia rau sa pinia nomana.
12 Esei si boka gilana puleni sari nana sinea tomedi soti telena?
Kei Zihova, Mu taleoso nau koari na qua sinea,
pu lopu va nonogai rau!
13 Mu va sare au koari na qua sinea pu evaṉi rau pa qua hiniva soti.
Toka nau pude madi lopu va pinausu au rini,
ba pude maqu koa va gilae si arau,
meke tava leseve pa sinea.
14 Sari na zinama pa ṉuzuqu,
meke sari na binalabala pa buloqu,
si madi va qetu Igo.
Kei Zihova, qua Patu aqoroana,
meke na qua tie kopu!