41
Vinaravara Tana Keke Tie Mohona
(Keke vinaravara te Devita)
1 Tamanae tugo saripu galagala ni sari na habahuala,
ura kaqu va sarei e Zihova si arini pa totoso tasuna.
2 Kaqu va aqori sa Tamasa si arini,
meke va sarei Sa pa dia tinoa.
Kaqu va qetui e Zihova si arini pa dia popoa soti,
meke lopu kaqu vata luari Sa si arini koari na dia kana.
3 Kaqu kopu ni e Zihova si arini pana moho rini,
meke kaqu salaṉi Sa si arini.
4 Ba arau si maqu zama guahe,
“Kei Zihova, Mu tataru nau, na taleoso nau, Mamu salaṉau,
sina ele sekei rau sari na Mua tinarae.”
5 Sari na qua kana si zama ṉoṉovalau.
Hiva nia rini pude turei mate si rau meke ta muliṉae palae.
6 Totoso mae si arini koa rau si zama qetuqetu kokoha,
ba pa bulodi si varigara ni rini sari na inavoso ṉoṉovala koasa guguaqu rau,
beto meke la tozi urahae ni rini pa doduru vasina.
7 Sari doduru pu kukiti nau si vari manamanasa nau rini,
balabala hata ia rini vegugua sapu kaleana hola pude tavete nau gua.
8 Zama si arini, “Tata mate si asa,
ke lopu kaqu boka magogoso pa nana minoho,” gua.
9 Sa qua baere soti sapu raṉe hola ia rau,
asa sapu somana henahena pa qua tevolo,
ba kukiti nau tugo.
10 Mu tataru nau na taleoso nau ba Zihova.
Salaṉau, Mamu va mataqara pule au,
pude maqu hobea sa dia kinaleana koa rau.
11 Lopu boka va kilasau rina qua kana si rau,
vasina gilana gunia rau sapu qetuqetu nau Goi si rau.
12 Kaqu toka nau Goi si rau,
sina tavetia rau gua sapu toṉoto,
meke kaqu koa tata pa kenumu Goi ninae rane ka rane.
13 Mi vahesia se Zihova, sa Tamasa tadi na tie Izireli,
mada vahesia si Asa kamahire,
meke ninae rane ka rane, Emeni! Emeni!