59
Vinaravara Vinasare koari na Kana
(Totoso garunu lani e Saula sari nana tie pana boṉi pude kopukopu nia koasa nana vetu se Devita pude tuqe vagia meke va matea.)
(1 Samuela 19:11)
1 Kei qua Tamasa, Mu va sare au koari na qua kana,
Mu toketoke hukata nau koarini pu varipera mae koa rau.
2 Va sare au koarini pu tavete va kaleana,
Mu harupu va seu au koari na tie variva mate sara.
3 Ura dotu, korapa pequ aqa nau rini si rau,
sari na tie kaleadi si varigara pude varipera mae koa rau.
Kei Zihova, lopu tavete gua asa sina lopu seke tinarae na sea si rau.
4 Loke qua sinea si rau sapu pada pude varigara mae pequ nau rini.
Mu tuturei mae dogorau, Mamu toka nau!
5 Zihova Tadi na Qeto Minate,
Agoi mo sa Tamasa tadi na tie Izireli.
Mu tuturei mae, Mamu va kilasi sari na butubutu huporodi;
lopu veko hola ia keke koari na tie kaleadi pu tavetavete va kaleana.
6 Doduru veluvelu si pule mae si arini,
kurumu variva nuli guana siki,
meke ene vari likohae nia rini sa vasileana nomana.
7 Avoso latu sari na dia zinama ṉoṉovala, na vina matagutu.
Sari na dia zinama pa ṉuzudi si ṉaru guana magu varipera.
Balabala ia rini sapu lopu kaqu ta avoso pa tie, gua.
8 Ba hegere ni Goi Zihova si arini,
meke va sisire ni Goi sari doduru butubutu huporo.
9 Kei Tamasa, raṉea rau sa Mua ṉiniraṉira,
Agoi mo sa qua Aqoroana.
10 Koasa Nana tataru nabuna si kaqu mae harupau sa qua Tamasa,
meke kaqu va dogoro nau Sa sapu va kilasi Sa sari na qua kana.
11 Kei Baṉara, mami lave,
Mu lopu tuturei va matei sari na kana hire,
ba Mamu vata hurakatae i gedi pa doduru vasina pude di kilasa,
pude madi lopu muliṉi nia rina qua tinoni sa Mua ṉiniraṉira.
12 Tale kaleadi mo si zama vura ni rini pa ṉuzudi na berudi.
Madi ta sipata gedi koari na dia vinahesi pule teledia,
sina leveleve na kokoha si arini!
13 Mu va puzuli pa Mua binugoro,
Mu va puzulu hokari gedi
pude madi gilania ri doduru tie
sapu Tamasa si koa totoli pa Izireli,
meke sa Nana tinolie si repaha la pa doduru kasia popoa.
14 Hopeke veluvelu si pule mae si arini,
mae variva nuli guana siki si arini.
Ene viṉohae ia rini sa vasileana nomana,
15 guana siki sapu hata ginani,
hohou si arini be lopu deṉa.
16 Ba arau si kaqu kera nia sa Mua ṉiniraṉira,
pana munumunu kaqu kera va ululae nia rau sa Mua tataru nabuna.
Ura Agoi mo sa qua Aqoroana,
meke na qua tinokae pa totoso tasuna.
17 Kei Tamasa, vahesi Igo rau si Goi,
raṉea rau sa Mua ṉiniraṉira.
Agoi mo sa qua Aqoroana,
sapu va dogoro nau sa tataru nabuna.