89
Sa Vina Tatara te Tamasa koe Devita
(Keke kinera te Etani keke tie pa tutina e Ezara)
1 Kei Zihova, kaqu kera nia rau doduru totoso sa Mua tataru nabuna;
kaqu tozi vura nia rau koari doduru sinage na sage sapu ta ronuemu si Goi.
2 Gilania rau sapu sa Mua tataru si koa hola ninae rane,
meke sa tina ronuemu Goi si koa va nabu hola guana maṉauru.
3 Ele zama si Goi, “Ele tavetia Rau si keke vinariva egoi koasa tie pu vizatia Rau,
ele va tatara nia Rau se Devita,
4 ‘Sari na tutimu goi si kaqu koa baṉara doduru totoso.
Kaqu kuria Rau sa mua habohabotuana baṉara koari doduru sinage.’ ”
5 Kei Zihova madi kera vahesi Igo ri doduru pa Maṉauru,
kera nia rini pa dia vinarigara rina tie madidi sapu va gorevura i Goi sari na Mua Zinama,
6 Ura esei koari na Maṉauru si boka ṉana kamoa se Zihova?
Esei koari na tinoni pa Maṉauru si kekeṉoṉo gua e Zihova?
7 Ta pamaṉae Mu si Goi koari na vinarigara tadi na maqomaqo madidi pa Maṉauru
meke turu matagutu hola sarini pa kenumu Goi.
8 Kei Zihova, na Tamasa Patutokaemu,
Esei si ṉiṉira kekeṉoṉo gua Agoi Zihova,
ta ronuemu si Goi koari doduru Mua tinavete.
9 Koa ṉati hiniva nia Goi sa kolo raneboṉi ṉiṉirana,
meke va bulei Goi sari na ololobagea lavalavata.
10 Ele muzara va mate pania Goi se Rehabi sa noki variva mate pa lamana;
ele va kilasi Goi sari na Mua kana.
11 Tamugoi sari na maṉauru, meke sa pepeso.
Va podakia Goi sa kasia popoa, meke sari doduru likakalae pu koa vasina.
12 Sari doduru popoa pa kali gede meke pa kali matao, si na Mua tinavetedi Goi.
Sa toqere Tabora meke sa toqere Hemoni si kera vahesi Igo pa dia qinetuqetu, gua tugo ri na tinoni.
13 Na Tamasa ṉiṉira hola si Goi,
patuarana sa lima mataomu.
14 Sa Mua binaṉara si ta sokirae pa tinoṉoto na vinilavilasa va toṉoto.
Sa tataru na tinaronue si ta dogoro koari doduru Mua tinavete.
15 Ta manae tugo sari na tie pu kera vahesi Igo,
saripu toa pa korapa kalalasana sa Mua tataru vatukana!
16 Pa guguamu Agoi si koa qetuqetu doduru rane si arini,
meke vahesi Igo rini koari na Mua tinoṉoto.
17 Agoi poni gami sa ṉiniraṉira pude va kilasi sari mami kana,
pa korapa Mua tataru si va mataqara gami Goi.
18 Kei Zihova, Agoi tugo vizatia sa mami tie kopu;
Agoi tugo sa Tamasa Hopemu pa Izireli,
sapu vizata poni gami sa mami baṉara.
Sa Vina Tatara Koe Devita
19 Ele vata dogoro pule nigo, meke ele zama guahe si Goi koari na Mua nabulu ta ronuedi pukerane,
“Ele va baṉaria Rau sa tie varane pa vinaripera,
Ele ponia Rau sa binaṉara koa sa sapu ele vizata vagia Rau koari nana tinoni.
20 Ele va baṉaria Rau se Devita sa Qua nabulu;
ele zoropo nia oela Rau si asa pa vina madina.
21 Sa Qua ṉiniraṉira nabuna si kaqu koa koasa ninae rane
sa Qua ṉiniraṉira si kaqu va ṉiṉira ia si asa.
22 Sari na nana kana si lopu kaqu boka koa mataqara hola nia,
lopu boka va kilasia rina tie kaleadi si asa.
23 Kaqu va huara ineti Rau sari nana kana,
meke kaqu va mate pani Rau sarini pu kukiti nia si asa.
24 Kaqu tataru nia Rau meke koa turaṉia Rau,
meke pa pozaqu Rau si kaqu koa mataqara si asa.
25 Kaqu va noma la ia Rau sa nana binaṉara,
kamoa pa kolo Meditareniani
meke sa nana ṉiniraṉira si kaqu kamo la pa Ovuku Iuparetisi.
26 Kaqu poza Nau, ‘Qua Tamasa, Tamaqu,
na qua Patu aqoroana, na qua Hinarupu,’ gua.
27 Kaqu va evaṉae nia na tuqu koreo kenuna Rau si asa;
meke na baṉara pu noma hola ni sari doduru baṉara pa pepeso.
28 Kaqu kopu nia Rau sa Qua tataru nabuna koa sa doduru totoso.
Sa Qua vinariva egoi koasa si kaqu koa hola ninae rane.
29 Sa nana habotuana baṉara si kaqu koa hola gua tugo sa mamaṉa lavata,
meke sari na tutina sa si kaqu koa baṉara doduru totoso.
30 Ba pude sekei ri na tutina sa sari na Qua tinarae,
meke lopu luli sari na Qua zinama,
31 meke be lopu luli rini sari na Qua vina tumatumae,
meke lopu taveti rini gua saripu garunu ni Rau,
32 si kaqu va kilasi Rau sarini koari na dia sinea;
kaqu va sigiti Rau si arini koari na dia tinavete seadi.
33 Ba lopu kaqu beto sa Qua tataru koe Devita,
meke lopu kaqu va karia Rau sa Qua vina tatara koasa.
34 Lopu kaqu hite kumatia Rau sa Qua vinariva egoi koasa,
babe vagi pania si keke Qua vina tatara koasa.
35 Kekeke totoso mo tavetia Rau pa Pozaqu Hopena
sa Qua vina tatara koe Devita.
Lopu kaqu kokoha si Rau koe Devita.
36 Lopu kaqu tava murimuri palae sa tutina sa,
kaqu koa baṉara ninae rane ka rane.
Gua sapu koa hola ninae rane sa rimata,
si kaqu koa hola gua tugo asa sa nana binaṉara.
37 Kaqu ta sokirae va nabu gua tugo sa sidara sapu koa ninae rane si asa.
Kaqu turu va ṉiṉira gua tugo sa mamaṉa lavata si asa, sapu koa hola ninae rane,” gua si Goi.
Kabo nia sa sa Vina Kilasana sa Baṉara
38 Ba kamahire si bugoro nia tu Goi sa baṉara pu ele vizatia Goi;
ele etulu pania, na veko pania tugo Goi si asa,
39 ele kumatia Goi sa Mua vina tatara koasa Mua nabulu,
ele va gore pania Goi sa nana binaṉara, guana gona la nia Goi pa kosiri sa nana toropae baṉara.
40 Ele huari Goi sari na gobana sa nana vasileana nomana,
meke huara pani Goi sari na dia vasina varipera ṉiṉiradi.
41 Sari doduru tie ene holadi vasina si hiko vagi sari nana likakalae,
sari doduru butubutu pu koa tata koa sa si hegehegere nia si asa.
42 Ele va mataqari Goi sari nana kana,
meke va qetuqetu i Goi si arini.
43 Sari nana tiṉitoṉa varipera si va lokelaedi i Goi,
meke ele va kilasia Goi si asa pa vinaripera.
44 Ele vagi pania Goi sa nana ṉiniraṉira,
meke va gore pania Goi si asa pa nana binaṉara.
45 Lopu sana va kamo ia Goi sa nana binarogoso,
meke va kurekurea Goi si asa.
Vinaravara pude Ta Harupu pa Tinasuna
46 Kei Zihova, ve seunae gua si kaqu va paere pule Nigo si Goi, ninae rane?
Ve seunae gua si kaqu huruṉu gua na nika sa Mua binugoro?
47 Kei Zihova, Mu balabala ia sapu papakana mo sa qua tinoa;
Mu balabala ia sapu Agoi tu tavete gami si gami pude lopu kaqu toa hola pa tinoa hie.
48 Doduru tie si kaqu kamo pa minate,
loke tie si boka va sare pule nia sa nana tinoa koasa lovu.
49 Baṉara, avei sa Mua tataru nabuna
sapu na Mua vina tatara pu tozia Goi koe Devita?
50 Kei Baṉara, Mu balabala i sari na zinama ṉoṉovala pu evaṉa ni rini koa rau,
meke sa qua tinuru va nabu koari na lineveleve tadi na tie huporo koa rau.
51 Kei Zihova, sari na Mua kana si ṉoṉovalia sa Mua baṉara pu ele vizatia Goi,
pa doduru nana inene si ta ṉoṉovala si asa.
52 Mani tavahesi se Zihova ninae rane ka rane!
Emeni. Emeni.