11
Sari Karua Tie Paleke Inavoso te Tamasa
1 Meke ta poni nia rau si keke kolu padapadana, meke zamau sa mateana si rau: “Mamu la pada ia sa Zelepade te Tamasa meke sa hope, mamu nae i tugo saripu vahesihesi pa korapa Zelepade.
2 Ba mu lopu pada ia sa varivarigarana lavata pa sadana sa Zelepade, sina ele ta vala koari na tie huporo sa vasina asa. Meke kote ene viṉohae hoboria rini sa vasileana hopena koari ka made ṉavulu rua sidara.
3 Meke kote ponini ṉiniraṉira rau sari karua Qua tie paleke inavoso te Tamasa saripu va sage poko baika, pude vata dogoro nia sa dia tinalotaṉa koari na sinea, meke kote tarae nia rini sa inavoso te Tamasa koari keke tina karua gogoto onomo ṉavulu puta rane,” gua.
4 Arini sari karua huda olive, meke sari karua tuturuana zuke, sapu turu pa kenuna sa Baṉara tanisa popoa pepeso.
5 Meke pude podekia rina tie pude ṉoṉovali sarini, si vura mae pa ṉuzudi ri kara sa nika, meke sulu pani sari na kana. Ke koasa siraṉa gua mo asa, si kote tava mate si arini pu hiva ṉoṉovali sari kara.
6 Meke ta vala tugo koa ri kara sa ṉiniraṉira pude va nosoa sa ruku pa galegalearane, pude loke ruku koasa doduruna sa totoso sapu hoke tozi vura nia rini sa Inavoso te Tamasa. Meke ta poni ṉiniraṉira sari kara pude va ilirae ni ehara sari na kolo, meke pude vata evaṉi tugo sari na oza votivotikaedi pa popoa pepeso, totoso hiva nia ri kara.
7 Meke sipu ele va hokoti ri kara sari na dia totoso, pude tozi vura nia sa Inavoso te Tamasa, si kote vura mae pa korapa pou loke kokoina sa kurukuru kaleana, meke kote razai sa sari kara, meke kote va kilasi na va matei sa si arini.
8 Meke sari na tomatedi ri karua tie paleke inavoso si kote eko pa korapa siraṉana sa vasileana nomana. Koasa vasileana asa si tava mate pa korosi sa dia Baṉara, meke hoke ta pozae kekeṉoṉo gua tugo Sodomu meke Izipi sa vasileana asa.
9 Meke koari ka ṉeta rane kukuruna, si kote dogori ri doduru tie pa ninae butubutu, na vinekala, na popoa, sari na tomatedi ri kara, meke kote korodia pomunu ni rini sari kara.
10 Meke kote qetuqetu hola sari doduru tinoni pa popoa pepeso koasa minate tadi kara, meke kote varivariponi vinariponi sarini, sina ṉoṉovala sisigiti ri kara hire sari doduru tinoni pa vina kilasa te Tamasa.
11 Meke sipu hola tugo ka ṉeta rane kukuruna, si siṉo lani tinoa Tamasa sari kara, ke gasa turu sari kara. Meke matagutu na tarazuzu si arini pu dogorodi sari kara.
12 Meke avosia ri karua tie paleke inavoso te Tamasa sa mamalaiṉi pa maṉauru, sapu velavela va ululae mae guahe koa rini, “Sage mae tani!” Meke dogori rina dia kana sagedi la pa Maṉauru pa korapa lei si arini.
13 Meke pa totoso tugo asa si kamo si keke niu nomana hola, meke hoqa ta huara inete si keke koari ka manege puta pinaqahadi rina vetuvetu koasa vasileana, meke ari ka zuapa tina tie si mate. Meke sari na tie pu koa holadi si matagutu na tarazuzu, ke vahesia mo rini sa Tamasa lavata pa Maṉauru.
14 Ego, sa tinalotaṉa vina rua meke kaleana si ele hola, ba sa tinalotaṉa vina ṉeta si tata kamo hokara mo!
Sa Buki Vina Zuapa
15 Meke ivua sa mateana vina zuapa sa nana buki, meke ta avoso sa mamalaiṉidi ri pa Maṉauru pu zama va ululae guahe:
“Sa binaṉara pa popoa pepeso
si na Binaṉara tanisa nada Baṉara meke sa Nana Karisito d kamahire,
meke kote koa Baṉara si Asa ninae rane ka rane!”
16 Meke sari ka hiokona made koimata ta ronuedi pu habotu pa dia habohabotuana baṉara pa kenuna sa Tamasa, si hoqa todoṉo, meke vahesia rini sa Tamasa,
17 meke zama pa vinahesi sapu guahe:
“Ke, Baṉara, sa Tamasa pu tagoi sari doduru ṉiniraṉira,
sapu koa pukerane, meke sapu korapa koa kamahire,
zama valeana si gami koa Goi,
sina koasa Mua ṉiniraṉira lavata,
si podalae nia Goi sa Mua Binaṉara!
18 Ta ṉaziri sisigiti sari na tie huporo,
meke kamahire si ta ṉaziri tugo si Goi.
Ele kamo sa totoso pude di ta pitu sari doduru pu matedi,
meke pude ta pia tugo sari na Mua nabulu poropita,
meke sari na Mua tie,
meke sari doduru pu pamaṉa nigo hiteke na lavata.
Meke ele kamo sa totoso pude va kilasi pa tinahuara sarini
pu huara va ineti sari na tiena sa popoa pepeso.”
19 Ta tukele sa sasadana sa Zelepade te Tamasa pa Maṉauru. Meke ta dogoro pa korapana sa Nana Zelepade sana sa Bokese tanisa Vinariva Egoi te Tamasa. Meke malara va hodaka sari na kapi, meke pidala, na lulusu sari na paka maṉauru, niu sa popoa pepeso, meke na rane boṉi nomana si va hoqa gore mae i sari na kabukabue aesi nomadi.