5
Sa Kinubekubere Ta Viqusuna meke sa Lami
1 Meke dogoria rau si keke pepa ta viqusuna pa kali lima mataona si Asa pu habotu koasa habotuana Baṉara. Sa pepa si koa betoi na kinubekubere pa karu kalina, meke ka zuapa tokoro si tuku va nabua.
2 Meke dogoria rau si keke mateana ṉiṉirana, sapu velavela va ululae guahe: “Esei si garona pude va maluari sari na tokoro koa sa, meke repahia sa pepa ta viqusuna?” gua.
3 Ba namu loke tie pa Maṉauru babe pa pepeso babe pa kauruna sa pepeso si garo pude va maluari, meke tiro ia si asa.
4 Ke kabo lamo si rau, sina loke tie hokara si ta dogoro, sapu garona pude tukelia meke tiro ia sa kinubekubere ta viqusuna asa.
5 Meke zama mae guahe koa rau si keke ri kasa koimata ta ronuedi: “Mu lopu kabo. Dotu, sa Laione pa butubutu te Ziuda, sapu tuti gorena mae gua koe Devita, si ele koa mataqara. Asa si garona pude va maluari sari ka zuapa tokoro, meke repahia sa pepa ta viqusuna,” gua.
6 Meke doṉo la si rau, meke dogoria rau si keke Lami d, korapa turu Nana pa kokorapana sa ṉati habotuana Baṉara, meke vari likohae nia ri ka made kurukuru toadi, meke sari na koimata, si Asa. Ba sa Lami, si guana ele tava matena tu. Ka zuapa sari na kikihona meke ka zuapa matana, sapu sari ka zuapa Maqomaqona sa Tamasa, pu ta garunu la pa doduruna sa kasia popoa.
7 Meke la vagia sa Lami sa pepa ta viqusuna pa kali lima mataona si Asa, pu habotu koasa ṉati habotuana Baṉara.
8 Meke sipu ele ade vagia sa Lami sa pepa ta viqusuna, si hoqa todoṉo sari ka made kurukuru toadi, meke sari ka hiokona made koimata pa kenuna sa Lami. Hopeke taṉini mike, na baolo qolo si arini, saripu siṉi na vina uququ ruqa humaṉa lea, sapu sari na vinaravara tadi na tie te Tamasa.
9 Meke kera nia rini si keke kinera vaqurana, sapu guahe:
“Garomu tugo Goi pude ade vagia sa pepa ta viqusuna,
meke va maluari sari na tokoro koa sa.
Ura ele tava mate si Goi,
meke koasa eharamu Goi
si holu vagi Goi sari kaiqa rina tie koari ninae butubutu, na vinekala, meke na popoa, pude na tie te Tamasa.
10 Ele vata evaṉae ni keke butubutu hiama Goi si arini,
pude nabulu nia sa nada Tamasa,
meke kaqu va baṉari rini sari na tie pa popoa pepeso,” gua.
11 Meke doṉo la si rau, meke avosi rau sari na mamalaiṉidi rina vuro tina mateana. Turu vari likohae nia rini sa ṉati habotuana Baṉara, meke sari ka made kurukuru toadi, meke sari ka hiokona made koimata.
12 Meke kera va ululae guahe si arini:
“Sa Lami sapu ele tava mate, si garona tugo pude tava lavata,
sina tanisa tugo sa binaṉara, sa tinagotago, sa tinumatumae, sa ṉiniraṉira, sa tinolava, sa vina lavata, meke sa vinahesi!” gua.
13 Beto asa si avosi rau mamalaiṉidi sari doduru vina podaka pa Maṉauru na pepeso, meke pa kauruna sa pepeso, meke pa kolo, meke sari doduru pu koa pa doduru vasina, saripu kera guahe:
“Mani koa koa Sa pu habotu koa sa ṉati habotuana Baṉara meke sa Lami,
sa vinahesi, sa vina lavata, sa tinolava, sa ṉiniraṉira ninae rane ka rane!” gua.
14 Meke olaṉa sari ka made kurukuru toadi, “Emeni!” Meke hoqa todoṉo sari ka hiokona made koimata ta ronuedi, meke vahesia si Asa.