13
Vinaripera La koari na Tie Pilisitia
1 Sipu ka toloṉavulu puta vuahenina se Saula si tava baṉara si asa, meke totoli ni sa sari na tinoni ka made ṉavulu rua vuaheni.
2 Vizata vagi Saula sari ka ṉeta tina tie, meke karua tina tie si koa turaṉi sa pa Mikimasi, koasa popoa toqetoqerena pa Betolo, meke garunu luli ni sa koe Zonatani sa tuna si keke tina pude la pa Qibea pa popoa tadi na butubutu te Benisimane. Sari doduru tie pule si garunu pule lani Saula pa dia popoa.
3 Razaia Zonatani sa puku tie varipera Pilisitia pa Qeba meke va kilasi sa si arini, meke avoso nia ri doduru tie Pilisitia sapu gua asa. Meke garuni Saula sari na tie paleke inavoso pude la ivua sa buki pa ninae vasina pude tioko va mae i sari na tie Hiburu pude mae varipera, gua.
4 Ta tozi nia ri doduru tie Izireli sapu va matei Saula sari na puku tie varipera tadi na tie Pilisitia, gua asa ke kukiti ni ri na tie Pilisitia si arini. Ke va tabea rina tinoni sa tinioko pude somana koe Saula pa Qiliqali.
5 Varigara sari na tie Pilisitia pude razai sari na tie Izireli, gua; ka toloṉavulu puta tina totopili varipera si tagoi rini, ka onomo tina tie koi pa hose, meke soku hola sari na tie varipera saripu soku gua tugo na onone pa masa. Topue la pa Mikimasi si arini pa kali gasa rimata pa Beti Aveni, meke koa vasina.
6 Sipu dogoria ri na tie varipera tadi na tie Izireli, sapu ele koa pa tinasuna si arini gua, si la tome koa ri na bae, na bara patu, meke na berukehe, na raqo si arini.
7 Kaiqa arini si ene karovia sa Ovuku Zodani meke nuquru la koasa kali popoa tanisa butubutu Qadi meke Qileadi.
Se Saula si korapa koa nana tu pa Qiliqali, meke sari na tie pu koa somanae koasa si matagutu na neneqara.
8 Aqa nia sa se Samuela ka zuapa rane, gua sapu ele tozi nia Samuela, ba lopu mae si asa pa Qiliqali, ke podalae luara pania rina tinoni se Saula.
9 Ke zama si asa koa rini, “Mi paleke mae nia sa vina vukivukihi vina uququ meke sa vina vukivukihi binaere.” Meke tavetia Saula sa vina vukivukihi vina uququ.
10 Sipu beto tugo si asa, si kamo mae mo se Samuela, ke la tutuvia Saula si asa meke va kamoa.
11 Ba zama se Samuela, “Na sa si tavetia goi?”
Olaṉa se Saula, “Na veko pani au rina tinoni si arau, meke agoi ba lopu maea sa totoso sapu mutia goi, meke sari na tie Pilisitia si ele varigara pa vasileana Mikimasi.
12 Ke balabala la ia rau, ‘Sapu kote mae rapata nau mo rina tie Pilisitia si rau tani pa Qiliqali, meke lopu ele tepa ia rau sa tinokae koe Zihova.’ Ke balabala ia rau sapu ta hivae pude tavetia mo sa vina vukivukihi, gua.”
13 “Na tinavete pekipeki si pude tavete gua asa,” olaṉa gua se Samuela. “Lopu va tabea goi sa tinarae te Zihova sa mua Tamasa sapu vatua Sa. Be va tabe si goi, si kaqu va malumigo Sa meke sari na tutimu pude koa baṉara ninae rane pa popoa Izireli.
14 Ba kamahire sa mua binaṉara si lopu kaqu koa hola. E Zihova si kaqu hata ia sa tie sapu kaqu lulia sa hiniva Tanisa pude baṉara ni sari Nana tinoni sina lopu va tabea goi si Asa.”
15 Taluarae pa Qiliqali se Samuela meke taloa nana. Taluarae tugo pa Qiliqali se Saula meke sari na tie meke la somana koari na tie varipera pa Qibea pa kali popoa te Benisimane. Sipu kamo si arini si vilitia Saula sa nana qeto minate, meke ka onomo gogoto tie mo si koa.
16 E Saula, Zonatani sa tuna, meke sari dia tie varipera si koa pa dia ipi pa Qeba pa popoa te Benisimane; sari na tie Pilisitia si koa pa Mikimasi.
17 Sa qeto minate tadi na tie Pilisitia si vura taloa koari dia ipi koari ka ṉeta pukuna. Keke puku minate si ene la gua pa Opira pa popoa Suala.
18 Keke pule si la gua pa Beti Horoni, meke keke pule si la gua koasa voloso sapu doṉo la gua pa lolomo Zeboimi meke pa soloso qega.
19 Loketoṉa tie tavetavete aeana pa si koa pa Izireli, sina hukati rina tie Pilisitia sari na tie Hiburu pude lopu tavete magu varipera na hopere na gua.
20 Sari na tie Izireli si hoke la mo koari na tie Pilisitia pude va ṉarui sari dia palau, piki, maho, meke na magu kotokotoana.
21 Sa tinabara si keke poata hite pude vilui sari na maho meke sari na tiṉitoṉa pude tuturaṉa bulumakao, meke karua poata si pude va ṉarui sari na piki babe na palau tana geli va malohoro pepeso.
22 Meke koa gua asa pa totoso varipera si lopu keke ari na tie varipera Izireli si ari dia magu varipera na hopere, ba e Saula meke Zonatani mo si ari dia.
23 Garuni rina tie Pilisitia sari na puku tie varipera pude la kopu nia sa siraṉa pa Mikimasi gua.