11
Sa Hinoqa Tadi na Baṉara Kaleadi
1 Tukeli sari mua sasada, agoi Lebanoni,
pude sulu i na nika sari mua huda sida!
2 Uui, agoi huda paeni, ura ele hoqa sari huda sida;
sari huda ta pamaṉaedi si ele ta huara!
Uui, huda oaku pa Basani;
sari hudahuda pa soloso si ele ta maho gore!
3 Avoso la i sari na uui tadi na sepati;
sari dia inuma duduli si ta ṉovala!
Avoso la i sari kurumu tadi na laione;
sa dia popoa pa hiqohiqo Zodani si ta huara!
Sari Karua Sepati
4 Hiera gua si zama nia e Zihova sa qua Tamasa: “La kopu nia sa rovana sipi sapu tava nama pude tava mate.
5 Va mate i ri tie pu holudi ba lopu tava kilasa nia rini. Meke arini pu vata holu ni si zama tu, ‘Mani tavahesi se Zihova, na tagotago si arau!’ gua. Sari dia sepati soti ba lopu tataru ni mo.
6 Ura kote noso sa Qua tataru la koari tiena sa popoa,” zama vura gua se Zihova. “Kote variponi ni Arau sari doduru la koari turaṉadia meke sa dia baṉara. Arini kote mae ṉoṉovala ia sa popoa, meke lopu kote harupi Rau pa limadia.”
7 Ke kopu nia rau sa rovana sipi sapu tana va mate, asa tugo sa rovana sapu ta ṉoṉovalana. Meke vagi rau si karua kolu hodu meke keke si poza nia Ta Tataruedi rau meke keke si Kinoa Keke poza nia rau, meke kopu nia rau sa rovana sipi.
8 Pa korapana keke sidara si ka ṉeta sepati si va beto i rau.
Lopu qetu nau sa rovana sipi, meke podalae mabo ni qua
9 ke zama si rau, “Beto si arau, lopu kote sepati ni gamu rau. Mani mate sapu kote mate, meke mani ta seke mate sapu kote ta seke va mate. Arini sapu koa hola si mani vari huara i mo teledia.”
10 Meke vagi ia rau sa qua kolu hodu sapu poza nia Ta Tataruedi rau meke moku pania, va kokoi ia rau sa vinariva egoi sapu tavete ia rau koari doduru butubutu.
11 Ke pa rane asa si noso sa qua vinariva egoi koa rini, meke doṉototo mae au ri pu ta ṉoṉovaladi koasa rovana sina tumae nia rini sapu na zinama te Zihova sapu asa.
12 Tozini rau si arini, “Pude leana koa gamu si poni nau sa qua tinabara; pude lopu gua si, kopu nia.” Ke ka toloṉavulu puta poata siliva tabara nau rini.
13 Meke zama guahe se Zihova koa rau, “La gona lani koasa tie tavete raro patu” Asa sa poata nomana sapu tabara nau rini! Ke vagi rau sari ka toloṉavulu puta poata siliva arini meke la gona nuquru lani rau pa Zelepade te Zihova koasa tie tavete raro patu.
14 Meke moku ia rau sa qua kolu hodu vina rua sapu poza nia rau Kinoa Keke arau, meke totoso asa si moku pania mo rau sa tinamatasi tadi Ziuda e Izireli.
15 Meke zama guahe se Zihova koa rau, “Mu tavetavete pule guana sepati pekipekina.
16 Ura na kote va turu ia Rau si keke sepati koasa popoa sapu lopu kote galagalani saripu muliuṉu, hata i saripu vaquradi, babe salaṉi sapu bakoradi, babe poni ginani sapu toadi va leana, ba kote hena i sa sari sipi bonabonadi meke kapolo pani ola nenedi.
17 Mani talotaṉa sa sepati kaleanana,
sapu veko pania sa rovana sipi!
Mani seke ia na vedara sa limana meke sa mata kali mataona!
Mani mate hokara sa limana,
mani behu taloa sa mata pa kali mataona!”