☰ Zakaraea 4
4
Sa Tuturuana Zuke Qolo meke Karua Huda Olive
1 Meke pule mae sa mateana sapu zama koa rau meke va vaṉunau sa, guana sapu putaqu tu si arau. 2 Nanasau sa si arau, “Nasa si dogoria agoi?”
Olaṉa si arau, “Na tuturuana zuke qolo sapu koa ia na baolo panauluna. Ka zuapa zuke si koa koasa tuturuana zuke, sapu koa i ka zuapa lozi zuke. 3 Meke koa dia tugo si karua huda olive pa vari kalina sa tuturuana zuke, keke pa kali matao meke keke pa kali gedena sa tuturuana zuke.”*
4 Nanasa ia rau sa mateana sapu zamazama koa rau, “Qua baṉara, nasa si hire?”
5 Olaṉa si asa, “Vea, lopu tumae nia tu goi sapu nasa si hire?”
“Lokari, qua baṉara,” olaṉa gua si arau.
6 Ke zama si asa koa rau, “Hierana sa zinama te Zihova la koe Zerubabele: ‘Lopu pa vinaripera, lopu pa ṉiniraṉira ba koasa Maqomaqoqu mo,’ gua se Zihova Tadi na Qeto Minate.*
7 Nasa si agoi, toqere nomamu? Pa kenuna e Zerubabele si kote tava pezara si agoi. Meke pana va hake ia Zerubabele sa patu vina betobeto si kote kukili guahe sari tie, ‘Mani mana nia Tamasa! Mani mana nia Tamasa!’ kote gua.”
8 Meke kamo mae koa rau sa inavoso te Zihova: 9 “Sari limana e Zerubabele tavetena sa vina sokiraena sa Zelepade hie; sari limana tugo kote va hokoto ia.” Gua, pude mi tumae nia sapu e Zihova Tadi na Qeto Minate si garunu mae nau si arau koa gamu.
10 Esei kilu ia sa rane tadi na tiṉitoṉa hitekedi? Kote qetu sari tie pana dogoria rini sa padapadana tinoṉoto pa limana e Zerubabele.
Meke olaṉia sa mateana sa qua ninanasa,
“Sari ka zuapa zuke si sari matana e Zihova sapu doṉo beto la ia sa doduruna sa popoa pepeso.”*
11 Meke nanasa ia rau sa mateana, “Nasa sari karua huda olive, keke pa kali matao meke keke pa kali gedena sa tuturuana zuke?”*
12 Meke nanasa pule la ia rau si asa, “Nasa sari karua lelaṉa olive pa kalidi sari karua paipa qolo sapu zoloro vura i na oela qolo?” gua si arau.
13 Olaṉa si asa, “Vea, lopu tumae nia tu agoi sapu nasa si arini?”
“Lokari, qua baṉara,” gua si arau.
14 Ke zama si asa, “Hire sari karua sapu tava madidi pude koa nabulu koe Zihova sapu sa Baṉara pa doduruna sa popoa pepeso.”
* 4:3 Rev 11:4 * 4:6 Ezr 5:2 * 4:10 Rev 5:6 * 4:11 Rev 11:4
☰