19
Kwian ulita nga ngaña giti gerule no
nga suga no ole Chube giti
1-2 Chube ji gbu kwian una Babiloniamu giti ene, bigire kwian ngle kerua sugedu chage kiraske nga ngaña giti, ama ulita kledu gerule ene:
“Alelulla, Chube noare, cha ulita gerule no no Chube giti.
Chube cha Chugagwalla kweri kira molen ama ñage age ulita mo kirallaske, Chube no trate agenga no.
Chube cha ulita jun siere ji chugege Chube kirachku cha dolladi, e giti cha gerule no no Chube giti.
Chube diali gerule trate, ulia Chube kle age kwian ole kwian kle age mangire batre, Chube kle kwian gbe ji chuge kwian kle age me no giti.
Chube kweri e amaña ji gbu muinga gdaite giti muinga e chagenga kwian onbre tanre ole, muinga e amaña kwian nga ulitamu gbanga age me no Chube dollale, muinga e kwian Chubenu gbu boi daga ngwale kaire ama kwian Chubenu tanre guda, Chube kwian maunu jia junnga ulita muinga ege, Chube muinga e gbu ji chuge jabale muinga agedu me no ulita giti.”
3 Geru sugedu ene chage gire cha geru keruchugu nakwaiteni gerule ene:
“Alelulla, Chube kweri, Chube kira molen tanre.
Chube ji gbu kwian una Babiloniamu giti, una e kle gugaba ulita gire una e jiangwalla be kle chie bdugu diali chui tangle.”
4 Kwian ulita kle nga ngaña giti kerua sugedu chage gerule no ene Chube giti gire kwian daba Chubenu chugagwalla juma veinticuatro kaire lle gwade gdabaga ama ulita jongnagwa skutu dba mo ñeu kaboge gwadbiguda skadagda gbu dba Chube kle toiba dba toigda kweri giti gwangnagu, gerudu:
“Alelulla, Chube che Chugagwalla kiraske ulita, noare ama ji gbu kwian me no una ege giti ulita.”
5 Kwian daba Chubenu chugagwalla juma ulita kaire lle gwade gdabaga gerudu ene ulita Chube giti, bigire geru chiu Chube che Chugagwalla kweri toigdalla ngwadige, gerudre ene:
“Ba mangire batre ulita bai kaire kle mo ta gbe lle boi Chube alin ama takalin kare kle Chube gai dage, ba ulita kwian juma kaire kirogwa ulita gerudale no che Chugagwalla Chube giti, Chube kle age no ulita.”
Cha geru keruchugu ene ulita.
6 Gire cha kwian tanre tanre keruchugu gerule, ama kerua sugedunga chage chi kweri kle gdade kare kaire keru sugedu salengwli enusulindra kle gdade kweri kare, gdade eneske cha geru keruchugu gerule ai kare:
“Alelulla, Chube che Chugagwalla kle chege nege kwian ulita Chugagwalla, che Chubea noare kweri kira molen tanre.
7 Nga sugadale no che ulitadi, che ta kledale no nga suga no ole kaire che gerudale no Chube giti, che Chube gbadale kweri no kwian na ulita gwa giti.
Ulia chui chku Bda Cordero Chubenu kada Jesucristo be mo jwen chuiage, Bda Cordero muingalla e kle gerule kwian Jesucristo gerua gaba ama kle biale mo jwen.
8 Chube ñometra no jutre jagere trate ketu muinga ege mo ngama tkagda mo jwen chuiage alin.
Ñometra no jutre jo ketaba muinga ege chege salengwli kwian Jesucristo gerua ganga ulita kle age ulita no trate Chube gwa giti kare.
Malen e giti nege che ulita chui olladale nga suga no ole.”
9 Lle boanga Chube alin gerudu nakwaite cha ole ene: “Ba chada degadale ene: ‘Kwian ulita mangire batre jo kadaba Bda Cordero be mo jwen chuia ollade ulita, ama ulitadi nga suga nodale.’ ” Lle boanga gerudu dare ene: “Geru ai ulita Chube gerua ulia.”
10 Lle boanga gerudu ene cha ole gire cha jongnagwa skutu dba lle boanga sera ngena ama gai dage mo chugagwalla kare, agwa lle boanga gerudu chage ene: “Ba me jongnagwa skute dba chadige. Cha lle boanga Chube alin salengwli ba kare salengwli kwian ba daballale ulita Jesucristo gerua ganga ulia kle toi no trate Jesucristo takalin kare, cha ama kare. Che ulita salengwli che ulita lle boanga Chube alin, che Chube alin gadale dage mo Chugagwallale. Geru ulita Jesucristo ketu kwiange, ba kaire kwian ba daballale ulita geru e gau ulia, geru e kle chege salengwli kwian Chube gerua ketanga ulita unsuialin geru ketu kare. Geru e ulita kle boi nege tangle, malen e giti che Chube gadale dage che gerudale no Chube giti.” Lle boanga Chube alin gerudu ene cha ole.
Juan gwage kwian gdaitedi skwenba ja jutre giti
11 Gire cha gwagedu nga ngañadi nga kledu degabanga gire ja jutre gdaite kledu ne ngwadi, kwian kledu chage ja e giti kwian e ka gbere KWIAN GERUNGA ULIA NO TRATE, kaire ama ka gbere KWIAN AGENGA ULITA AMA KLE GERULE KARE. Ama chegu kwian ulita Chugagwalla no, ama kledu age mangire batre kwian ole kwian kle age giti no o me no. Ama kledu kira bate kwian ulita ole kwian bai kaire mo tku dole Chube ole.
12 Kaire agwe ama gwagwa kledu gwadenga salengwli jita teankle kle gwatige kle gwadenga kare. Kaire ama chugage ama kledu lle no tanre sombrerolla kare dbe, kaire ama kledu chage ka gweale dbe, ka e kledu gbaba ama giti, amage alin allabi sugedu geru e kle degaba mine.
13 Kaire ama kledu chage ñometraske ñometra e kledu ulita bere. Ama kledu chage ka na dbe ka e kledu gerule ene: GERU ULIA CHUBENU.
14 Lle boanga Chube alin nga ngaña giti tanre tanre kledu chage ule kwian gdaite kle skwenba ja jutre giti nate. Kaire agwe lle boanga e ulita gdaite gdaite kledu skwenba ja na jutre giti, ama ulita kledu mo ngama tkaba ñometra no trate jutreske.
15 Kwian gdaite kledu skwenba ngeru ja giti ama kate sbadi gaite kledu chie, sbadi e dau degaba no trate, sbadi e ama kledu chage dbe kwian nga ulitamu Chube dollale boagda daga ngwale. Ama be chege kwian e ulita Chugagwalla kweri kiraske ama be chege kwian ulita kaganga gbe boi ama takalin kare. Ama be kwian gbe boi daga ngwale tanre be ji gbe tirare kwian kle age me no Chube dollale giti. Chube ta skochiu tanre kwian kle age me no ama dollale gdale, malen e giti Chube kwian gdaite kle chage ja giti e kagu kwian nga ulitamu gbe ji chuge tirare. Chube kiraske tanre ama ma kiraske ulitage ama kwian gdaite e kagu age kwian ole salengwli kwian kle age uvagba ole kare. Kwian kle skite uvagba giti uvagba chia jwennga ulita kare, gire kwian ñage uvagba chia jwanbanga jai. E kare ene kwian gdaite kle chage ja giti sbadi ole kate be age kwian ole kwian gbe boi daga ngwale kwian kle age me no giti gdale.
16 Kwian gdaite ji gbanga kledu skwenba ja giti, ama ñometralla giti kaire ama skwagda giti ama kledu chage ka degaba ene: CHUGAGWALLA MA KWERI MA KIRASKE CHUGAGWALLA NA ULITAGE. Chada kledu gbaba ene ama ñometralla giti ama skwagda gitige.
17-18 Gire cha gwagedu lle boanga Chube alin nga ngaña giti gdaitedi jagebanga gdate chuira giti, ama kledu ngaute kiraske junten ulitage ene: “Bai ulita mo lite ole ule, Chube be bligda kete bage gutadale. Ene ba ñage kwian chugagwalla ulita uda gute kaire guardia donga chugagwalla uda gute, kaire kwian kle suge moge kiraske ama uda gute, kaire ja samlalla gute, kaire guardia donga skwenba ja e giti uda gute, kaire kwian lle boanga mo mauña alin ama uda gute, kaire kwian lle boanga igi gai mau alin naskuni ama uda gute, kaire kwian juma kaire kirogwa uda gute ulita.”
19 Lle boanga Chube alin ngautu ene juntenge gire cha gwagedu lle gude chadale karedi kaire ama skatemanalla kwian chugagwalla ulita nga ulitagedi ama ulita kledu chage donga tanre dbe ule kira bate mo giti, ama ulita kledu mo gbaba ule biale kira batadale kwian gdaite skwenba ja jutre giti ole kaire kwian e chudaboangalla ulita ole.
20 Kwian gdaite chage ja jutre giti ama chudaboangalla ulita ole ama kirachku lle gude chadale karedi kaire lle gude chadale kare chudaboangalla ulitadi. Lle gude chadale kare jo gaba ji chugadale ule lle bdale ama ka chudaboanga geru jinanga ngwale ole. Lle gude chadale kare ka chudaboanga e ageba tanre lle gude chadale kare kirallaske kwian na gwa giti kwian gwa gbagda lle gude chadale kare giti. Lle gude chadale kare ka chudaboanga gerunga ngwale, ama agedu giti kwian ulita mo anblitangu kwian bai kaire mo chugu ngwadi mo gbange egdage lle gude chadale kare kalla giti ama ulita lle gude chadale oña dodadre mo kodi gau dage mo chubeale, gire e kbiale lle gude chadale kare kaire ama ka chudaboanga ama gdabonate jo mliaba gwade jitaske, jita e kle gwade chege salengwli lle mnuñale kada azufre kare.
21 Agwa kwian na ulita lle gude chadale kare gatudige mo tke dole kwian kle chage ja jutre giti dollale, ama ulita jo gwabada sbadi giti, sbadi e chiu kwian gdaite kle skwenba ja jutre giti kate, sbadi e giti kwian jo gwabada gire junten ulita kwian gwabada e uda gutu, junten e ulita unchku kwian udadi.