೨ ಕರಿನ್ಥಿನಃ ಪತ್ರಂ
Ⅰ
Ⅰ ಈಶ್ವರಸ್ಯೇಚ್ಛಯಾ ಯೀಶುಖ್ರೀಷ್ಟಸ್ಯ ಪ್ರೇರಿತಃ ಪೌಲಸ್ತಿಮಥಿರ್ಭ್ರಾತಾ ಚ ದ್ವಾವೇತೌ ಕರಿನ್ಥನಗರಸ್ಥಾಯೈ ಈಶ್ವರೀಯಸಮಿತಯ ಆಖಾಯಾದೇಶಸ್ಥೇಭ್ಯಃ ಸರ್ವ್ವೇಭ್ಯಃ ಪವಿತ್ರಲೋಕೇಭ್ಯಶ್ಚ ಪತ್ರಂ ಲಿಖತಃ|
Ⅱ ಅಸ್ಮಾಕಂ ತಾತಸ್ಯೇಶ್ವರಸ್ಯ ಪ್ರಭೋರ್ಯೀಶುಖ್ರೀಷ್ಟಸ್ಯ ಚಾನುಗ್ರಹಃ ಶಾನ್ತಿಶ್ಚ ಯುಷ್ಮಾಸು ವರ್ತ್ತತಾಂ|
Ⅲ ಕೃಪಾಲುಃ ಪಿತಾ ಸರ್ವ್ವಸಾನ್ತ್ವನಾಕಾರೀಶ್ವರಶ್ಚ ಯೋಽಸ್ಮತ್ಪ್ರಭೋರ್ಯೀಶುಖ್ರೀಷ್ಟಸ್ಯ ತಾತ ಈಶ್ವರಃ ಸ ಧನ್ಯೋ ಭವತು|
Ⅳ ಯತೋ ವಯಮ್ ಈಶ್ವರಾತ್ ಸಾನ್ತ್ವನಾಂ ಪ್ರಾಪ್ಯ ತಯಾ ಸಾನ್ತ್ವನಯಾ ಯತ್ ಸರ್ವ್ವವಿಧಕ್ಲಿಷ್ಟಾನ್ ಲೋಕಾನ್ ಸಾನ್ತ್ವಯಿತುಂ ಶಕ್ನುಯಾಮ ತದರ್ಥಂ ಸೋಽಸ್ಮಾಕಂ ಸರ್ವ್ವಕ್ಲೇಶಸಮಯೇಽಸ್ಮಾನ್ ಸಾನ್ತ್ವಯತಿ|
Ⅴ ಯತಃ ಖ್ರೀಷ್ಟಸ್ಯ ಕ್ಲೇಶಾ ಯದ್ವದ್ ಬಾಹುಲ್ಯೇನಾಸ್ಮಾಸು ವರ್ತ್ತನ್ತೇ ತದ್ವದ್ ವಯಂ ಖ್ರೀಷ್ಟೇನ ಬಹುಸಾನ್ತ್ವನಾಢ್ಯಾ ಅಪಿ ಭವಾಮಃ|
Ⅵ ವಯಂ ಯದಿ ಕ್ಲಿಶ್ಯಾಮಹೇ ತರ್ಹಿ ಯುಷ್ಮಾಕಂ ಸಾನ್ತ್ವನಾಪರಿತ್ರಾಣಯೋಃ ಕೃತೇ ಕ್ಲಿಶ್ಯಾಮಹೇ ಯತೋಽಸ್ಮಾಭಿ ರ್ಯಾದೃಶಾನಿ ದುಃಖಾನಿ ಸಹ್ಯನ್ತೇ ಯುಷ್ಮಾಕಂ ತಾದೃಶದುಃಖಾನಾಂ ಸಹನೇನ ತೌ ಸಾಧಯಿಷ್ಯೇತೇ ಇತ್ಯಸ್ಮಿನ್ ಯುಷ್ಮಾನಧಿ ಮಮ ದೃಢಾ ಪ್ರತ್ಯಾಶಾ ಭವತಿ|
Ⅶ ಯದಿ ವಾ ವಯಂ ಸಾನ್ತ್ವನಾಂ ಲಭಾಮಹೇ ತರ್ಹಿ ಯುಷ್ಮಾಕಂ ಸಾನ್ತ್ವನಾಪರಿತ್ರಾಣಯೋಃ ಕೃತೇ ತಾಮಪಿ ಲಭಾಮಹೇ| ಯತೋ ಯೂಯಂ ಯಾದೃಗ್ ದುಃಖಾನಾಂ ಭಾಗಿನೋಽಭವತ ತಾದೃಕ್ ಸಾನ್ತ್ವನಾಯಾ ಅಪಿ ಭಾಗಿನೋ ಭವಿಷ್ಯಥೇತಿ ವಯಂ ಜಾನೀಮಃ|
Ⅷ ಹೇ ಭ್ರಾತರಃ, ಆಶಿಯಾದೇಶೇ ಯಃ ಕ್ಲೇಶೋಽಸ್ಮಾನ್ ಆಕ್ರಾಮ್ಯತ್ ತಂ ಯೂಯಂ ಯದ್ ಅನವಗತಾಸ್ತಿಷ್ಠತ ತನ್ಮಯಾ ಭದ್ರಂ ನ ಮನ್ಯತೇ| ತೇನಾತಿಶಕ್ತಿಕ್ಲೇಶೇನ ವಯಮತೀವ ಪೀಡಿತಾಸ್ತಸ್ಮಾತ್ ಜೀವನರಕ್ಷಣೇ ನಿರುಪಾಯಾ ಜಾತಾಶ್ಚ,
Ⅸ ಅತೋ ವಯಂ ಸ್ವೇಷು ನ ವಿಶ್ವಸ್ಯ ಮೃತಲೋಕಾನಾಮ್ ಉತ್ಥಾಪಯಿತರೀಶ್ವರೇ ಯದ್ ವಿಶ್ವಾಸಂ ಕುರ್ಮ್ಮಸ್ತದರ್ಥಮ್ ಅಸ್ಮಾಭಿಃ ಪ್ರಾಣದಣ್ಡೋ ಭೋಕ್ತವ್ಯ ಇತಿ ಸ್ವಮನಸಿ ನಿಶ್ಚಿತಂ|
Ⅹ ಏತಾದೃಶಭಯಙ್ಕರಾತ್ ಮೃತ್ಯೋ ರ್ಯೋ ಽಸ್ಮಾನ್ ಅತ್ರಾಯತೇದಾನೀಮಪಿ ತ್ರಾಯತೇ ಸ ಇತಃ ಪರಮಪ್ಯಸ್ಮಾನ್ ತ್ರಾಸ್ಯತೇ ಽಸ್ಮಾಕಮ್ ಏತಾದೃಶೀ ಪ್ರತ್ಯಾಶಾ ವಿದ್ಯತೇ|
Ⅺ ಏತದರ್ಥಮಸ್ಮತ್ಕೃತೇ ಪ್ರಾರ್ಥನಯಾ ವಯಂ ಯುಷ್ಮಾಭಿರುಪಕರ್ತ್ತವ್ಯಾಸ್ತಥಾ ಕೃತೇ ಬಹುಭಿ ರ್ಯಾಚಿತೋ ಯೋಽನುಗ್ರಹೋಽಸ್ಮಾಸು ವರ್ತ್ತಿಷ್ಯತೇ ತತ್ಕೃತೇ ಬಹುಭಿರೀಶ್ವರಸ್ಯ ಧನ್ಯವಾದೋಽಪಿ ಕಾರಿಷ್ಯತೇ|
Ⅻ ಅಪರಞ್ಚ ಸಂಸಾರಮಧ್ಯೇ ವಿಶೇಷತೋ ಯುಷ್ಮನ್ಮಧ್ಯೇ ವಯಂ ಸಾಂಸಾರಿಕ್ಯಾ ಧಿಯಾ ನಹಿ ಕಿನ್ತ್ವೀಶ್ವರಸ್ಯಾನುಗ್ರಹೇಣಾಕುಟಿಲತಾಮ್ ಈಶ್ವರೀಯಸಾರಲ್ಯಞ್ಚಾಚರಿತವನ್ತೋಽತ್ರಾಸ್ಮಾಕಂ ಮನೋ ಯತ್ ಪ್ರಮಾಣಂ ದದಾತಿ ತೇನ ವಯಂ ಶ್ಲಾಘಾಮಹೇ|
ⅩⅢ ಯುಷ್ಮಾಭಿ ರ್ಯದ್ ಯತ್ ಪಠ್ಯತೇ ಗೃಹ್ಯತೇ ಚ ತದನ್ಯತ್ ಕಿಮಪಿ ಯುಷ್ಮಭ್ಯಮ್ ಅಸ್ಮಾಭಿ ರ್ನ ಲಿಖ್ಯತೇ ತಚ್ಚಾನ್ತಂ ಯಾವದ್ ಯುಷ್ಮಾಭಿ ರ್ಗ್ರಹೀಷ್ಯತ ಇತ್ಯಸ್ಮಾಕಮ್ ಆಶಾ|
ⅩⅣ ಯೂಯಮಿತಃ ಪೂರ್ವ್ವಮಪ್ಯಸ್ಮಾನ್ ಅಂಶತೋ ಗೃಹೀತವನ್ತಃ, ಯತಃ ಪ್ರಭೋ ರ್ಯೀಶುಖ್ರೀಷ್ಟಸ್ಯ ದಿನೇ ಯದ್ವದ್ ಯುಷ್ಮಾಸ್ವಸ್ಮಾಕಂ ಶ್ಲಾಘಾ ತದ್ವದ್ ಅಸ್ಮಾಸು ಯುಷ್ಮಾಕಮಪಿ ಶ್ಲಾಘಾ ಭವಿಷ್ಯತಿ|
ⅩⅤ ಅಪರಂ ಯೂಯಂ ಯದ್ ದ್ವಿತೀಯಂ ವರಂ ಲಭಧ್ವೇ ತದರ್ಥಮಿತಃ ಪೂರ್ವ್ವಂ ತಯಾ ಪ್ರತ್ಯಾಶಯಾ ಯುಷ್ಮತ್ಸಮೀಪಂ ಗಮಿಷ್ಯಾಮಿ
ⅩⅥ ಯುಷ್ಮದ್ದೇಶೇನ ಮಾಕಿದನಿಯಾದೇಶಂ ವ್ರಜಿತ್ವಾ ಪುನಸ್ತಸ್ಮಾತ್ ಮಾಕಿದನಿಯಾದೇಶಾತ್ ಯುಷ್ಮತ್ಸಮೀಪಮ್ ಏತ್ಯ ಯುಷ್ಮಾಭಿ ರ್ಯಿಹೂದಾದೇಶಂ ಪ್ರೇಷಯಿಷ್ಯೇ ಚೇತಿ ಮಮ ವಾಞ್ಛಾಸೀತ್|
ⅩⅦ ಏತಾದೃಶೀ ಮನ್ತ್ರಣಾ ಮಯಾ ಕಿಂ ಚಾಞ್ಚಲ್ಯೇನ ಕೃತಾ? ಯದ್ ಯದ್ ಅಹಂ ಮನ್ತ್ರಯೇ ತತ್ ಕಿಂ ವಿಷಯಿಲೋಕಇವ ಮನ್ತ್ರಯಾಣ ಆದೌ ಸ್ವೀಕೃತ್ಯ ಪಶ್ಚಾದ್ ಅಸ್ವೀಕುರ್ವ್ವೇ?
ⅩⅧ ಯುಷ್ಮಾನ್ ಪ್ರತಿ ಮಯಾ ಕಥಿತಾನಿ ವಾಕ್ಯಾನ್ಯಗ್ರೇ ಸ್ವೀಕೃತಾನಿ ಶೇಷೇಽಸ್ವೀಕೃತಾನಿ ನಾಭವನ್ ಏತೇನೇಶ್ವರಸ್ಯ ವಿಶ್ವಸ್ತತಾ ಪ್ರಕಾಶತೇ|
ⅩⅨ ಮಯಾ ಸಿಲ್ವಾನೇನ ತಿಮಥಿನಾ ಚೇಶ್ವರಸ್ಯ ಪುತ್ರೋ ಯೋ ಯೀಶುಖ್ರೀಷ್ಟೋ ಯುಷ್ಮನ್ಮಧ್ಯೇ ಘೋಷಿತಃ ಸ ತೇನ ಸ್ವೀಕೃತಃ ಪುನರಸ್ವೀಕೃತಶ್ಚ ತನ್ನಹಿ ಕಿನ್ತು ಸ ತಸ್ಯ ಸ್ವೀಕಾರಸ್ವರೂಪಏವ|
ⅩⅩ ಈಶ್ವರಸ್ಯ ಮಹಿಮಾ ಯದ್ ಅಸ್ಮಾಭಿಃ ಪ್ರಕಾಶೇತ ತದರ್ಥಮ್ ಈಶ್ವರೇಣ ಯದ್ ಯತ್ ಪ್ರತಿಜ್ಞಾತಂ ತತ್ಸರ್ವ್ವಂ ಖ್ರೀಷ್ಟೇನ ಸ್ವೀಕೃತಂ ಸತ್ಯೀಭೂತಞ್ಚ|
ⅩⅪ ಯುಷ್ಮಾನ್ ಅಸ್ಮಾಂಶ್ಚಾಭಿಷಿಚ್ಯ ಯಃ ಖ್ರೀಷ್ಟೇ ಸ್ಥಾಸ್ನೂನ್ ಕರೋತಿ ಸ ಈಶ್ವರ ಏವ|
ⅩⅫ ಸ ಚಾಸ್ಮಾನ್ ಮುದ್ರಾಙ್ಕಿತಾನ್ ಅಕಾರ್ಷೀತ್ ಸತ್ಯಾಙ್ಕಾರಸ್ಯ ಪಣಖರೂಪಮ್ ಆತ್ಮಾನಂ ಅಸ್ಮಾಕಮ್ ಅನ್ತಃಕರಣೇಷು ನಿರಕ್ಷಿಪಚ್ಚ|
ⅩⅩⅢ ಅಪರಂ ಯುಷ್ಮಾಸು ಕರುಣಾಂ ಕುರ್ವ್ವನ್ ಅಹಮ್ ಏತಾವತ್ಕಾಲಂ ಯಾವತ್ ಕರಿನ್ಥನಗರಂ ನ ಗತವಾನ್ ಇತಿ ಸತ್ಯಮೇತಸ್ಮಿನ್ ಈಶ್ವರಂ ಸಾಕ್ಷಿಣಂ ಕೃತ್ವಾ ಮಯಾ ಸ್ವಪ್ರಾಣಾನಾಂ ಶಪಥಃ ಕ್ರಿಯತೇ|
ⅩⅩⅣ ವಯಂ ಯುಷ್ಮಾಕಂ ವಿಶ್ವಾಸಸ್ಯ ನಿಯನ್ತಾರೋ ನ ಭವಾಮಃ ಕಿನ್ತು ಯುಷ್ಮಾಕಮ್ ಆನನ್ದಸ್ಯ ಸಹಾಯಾ ಭವಾಮಃ, ಯಸ್ಮಾದ್ ವಿಶ್ವಾಸೇ ಯುಷ್ಮಾಕಂ ಸ್ಥಿತಿ ರ್ಭವತಿ|